ޗެމްޕިއަންސް ލީގު: ޕޯޓޯ ބަލިކޮށް ލިވަޕޫލުން ސެމީގެ އުންމީދު އާކޮށްފި

ޗެމްޕިއަންސް ލީގުގައި ޕޯޓޯ ބަލިކޮށް ލިވަޕޫލުން ސެމީ ފައިނަލުގެ އުންމީދު އާކޮށްފިއެވެ.

އަންގާރަ ދުވަހުގެ ރޭ ކުޅުނު ފުރަތަމަ ލެގުގެ މެޗު ޕޯޓޯއާ ވާދަކޮށް ލިވަޕޫލުން މެޗު ކާމިޔާބުކުރީ 0-2 ގެ ނަތީޖާއަކުންނެވެ.

ލިވަޕޫލް ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށް ރަނގަޅަށް ކުޅެމުންދިޔައީ އެޓީމުންނެވެ. އެގޮތުން ފަސްވަނަ މިނެޓުގައި ލިވަޕޫލުން ވަނީ މެޗުގެ ލީޑު ނަގާފައެވެ. މި ލަނޑު ރޮބާޓޯ ފިރްމީނޯގެ އެހީތެރިކަމާއެކު ކާމިޔާބުކުރީ ނަބީ ކެއިޓާއެވެ.

މި ލަނޑަށްފަހު ވެސް ރަނގަޅަށް ކުޅެމުންދިޔައީ ލިވަޕޫލުންނެވެ. އެގޮތުން 26 ވަނަ މިނެޓުގައި އެޓީމުން ވަނީ ލީޑު ފުޅާ ކޮށްފައެވެ. މި ލަނޑު އެލެގްޒެންޑްރާ އާނޯލްޑްގެ އެހީތެރިކަމާއެކު ކާމިޔާބުކުރީ ފިރްމީނޯއެވެ.

ދެވަނަ ހާފް ފެށިގެން ވެސް ލިވަޕޫލްގެ ފަރާތުން ގިނަ ހަމަލާތައް ފެނިގެންދިޔައިރު، ލަނޑު ޖެހުމަށް ވެސް ހުސް ފުރުސަތުތައް ލިބި ވަނީ ބޭކާރުވެފައެވެ.

މެޗުގައި ޕޯޓޯއަށް ވެސް ލަނޑު ޖެހުމަށް ފުރުސަތުތަކެއް ލިބިގެންދިޔައެވެ. ނަމަވެސް އެ ފުރުސަތުތަކުގެ ބޭނުން އެޓީމަށް އެންމެ އެދެވޭ ގޮތެއްގައި ހިފޭގޮތް ނުވެއެވެ.

ލިވަޕޫލް އަދި ޕޯޓޯ ބައްދަލުކުރާ ދެވަނަ ލެގުގެ މެޗު އޮންނާނީ މި މަހުގެ 17 ވަނަ ދުވަހުގެ ރޭ ޕޯޓޯ ދަނޑުގައެވެ. ސެމީން ޖާގަ ކަށަވަރުކުރަން މި މެޗު ޕޯޓޯއިން ތިން ލަނޑުގެ ތަފާތުން ކާމިޔާބުކުރަން ޖެހޭނެއެވެ.

ލިވަޕޫލް އާއި ޕޯޓޯގެ ތެރެއިން ދެވަނަ ލެގުން މޮޅުވާ ޓީމެއް ސެމީގައި ބައްދަލުކުރަން ޖެހޭނީ މެންޗެސްޓާ ޔުނައިޓެޑް ނުވަތަ ބާސެލޯނާއާއެވެ.