ޝުކުރިއްޔާ ދިވެހި ރައްޔިތުން، ތިޔަ ދެއްކެވީ ތަފާތު ބޮޑު ކާމިޔާބީއެއް: ނައިބު ރައީސް

ހޮނިހިރު ދުވަހު ކުރިއަށް ދިޔަ މަޖިލިސް އިންތިހާބުގައި ދިވެހި ރައްޔިތުން ދައްކަވާފައި ވަނީ ތަފާތު ބޮޑު ނަތީޖާއެއް ކަމަށާއި، ދިވެހި ރައްޔިތުންނަށް ޝުކުރު އަދާ ކުރައްވާ ކަމަށް ނައިބު ރައީސް ފައިސަލް ނަސީމް ވިދާޅުވެއްޖެއެވެ.

ހޮނިހިރު ދުވަހު ފައިސަލް ކުރެއްވި ޓްވީޓެއްގައި ވިދާޅުވީ، ދިވެހި ރައްޔިތުން ދައްކަވާފައި ވަނީ ތަފާތު ބޮޑުު ކާމިޔާބީއެއް ކަމަށާއި، ރައްޔިތުން ދެއްކެވި ތަފާތު މި ސަރުކާރުން ފެނިގެންދާނެ ކަމަށެވެ.

ނައިބު ރައީސް އެހެން ވިދާޅުވެފައިވާއިރު، އިންތިޚާބުގެ ވަގުތީ ނަތީޖާ ދައްކާ ގޮތުން މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އަށް ބޮޑު އަޣުލަބިއްޔަތެއް ވަނީ ލިބިފައެވެ.

އެމްޑީޕީއަށް ކާމިޔާބު ލިބުނު ދާއިރާތަކަށް ބަލާއިރު މައްޗަންގޮޅި މެދު ދާއިރާއަށް ހޮވިފައި ވަނީ ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދެވެ. އޭގެ އިތުރުން ވަގުތީ ނަތީޖާ ދައްކާ ގޮތުން އެމްޑީޕީއަށް އައްޑޫ ސިޓީގެ ހުރިހާ ދާއިރާއެއް ވަނީ ކާމިޔާބު ވެފައެވެ.