ޕްރިމިއާ ލީގުގައި އަންގާރަ ދުވަހު ކުޅުނު މެޗުން ބަލިވެ ލީގުގެ ގަދަ ހަތަރަކަށް އެރުމަށް މެންޗެސްޓާ ޔުނައިޓެޑްއަށް ލިބުނު ފުރުސަތު ނަގާލައިފިއެވެ. 

މެންޗެސްޓަރ ޔުނައިޓެޑް ބަލިވީ ވޮލްވްހެމްޕްޓޮން އާއި ވާދަކޮށް 1-2 ގެ ނަތީޖާއަކުންނެވެ. 

ވުލްވްސް މޮލިނެއުކްސް ސްޓޭޑިއަމްގައި ކުޅުނު މި މެޗު ފެށިގެން ޔުނައިޓެޑްގެ ފަރާތުން ރަނގަޅު ކުޅުމެއް ފެނިގެންދިޔައެވެ. އެ ގޮތުން މެޗުގެ ފުރަތަމަ ލަނޑު ޖަހައި ލީޑް ނެގީވެސް އެ ޓީމުންނެވެ. މި ލަނޑު މެޗުގެ 13 ވަނަ މިނެޓުގައި އެ ޓީމަށް ކާމިޔާބުކޮށް ދިނީ ފްރެޑްރިކޯ ރޮޑްރިގޭޒްގެ އެހީތެރި ކަމާއިއެކު ސްކޮޓް މެކްޓޮމީނޭއެވެ. 

މި ލަނޑަށް ފަހުގައިވެސް ޔުނައިޓެޑުން ވަނީ ވޮލްވްސްގެ ގޯލާއި އަމާޒުކޮށް ވަރުގަދަ ހަމަލާތަކެއް ފޮނުވާލާފައެވެ. އެހެން ނަމަވެސް ރުއީ ޕެޓްރީސިއޯ ވަނީ ދިފާއު ކޮށްފައެވެ. 

ފުރަތަމަ ހާފްގެ ކުރީ ކޮޅުގައި ޔުނައިޓެޑުން ލީޑް ނެގިނަމަވެސް ވޮލްވްސްއިން ވަނީ ޔުނައިޓެޑްގެ ފަހަތަށް ބާރުބޮޑުކޮށް ރަނގަޅު ހަމަލާތަކެއް އުފައްދާފައެވެ. ނަތީޖާއެއްގެ ގޮތުން މެޗުގެ 25  ވަނަ މިނެޓުގައި ރައުލް ޖިމިނޭޒްގެ އެހީތެރި ކަމާއިއެކު ޑިއޭގޯ ޖޯޓާ ވަނީ ވޮލްވްސްއަށް ނަތީޖާ ހަމަހަމަ ކޮށްދީފައެވެ. 

ފުރަތަމަ ހާފް ނިމުނީ 1-1 ގެ ނަތީޖާ އަކުން ދެ ޓީމް އެއްވަރު ވެގެންނެވެ. 

ދެވަނަ ހާފް ފެށިގެން ރަނގަޅަށް ކުޅެމުން އައީ ވޮލްވްސްހެމްޕްޓޯންއިންނެވެ. އެ ޓީމުން ވަނީ މެންޗެސްޓާގެ ފަހަތަށް ބާރުބޮޑުކޮށް ރަނގަޅު ހަމަލާތަކެއް އުފައްދާފައެވެ. 

މެޗުގެ 57 ވަނަ މިނެޓުގައި ޔުނައިޓެޑްގެ އޭޝްލީ ޔަންގްއަށް ދެ ރީނދޫ ކާޑާއިއެކު ދަނޑުން ފޮނުވާލުމުން އެ ޓީމުން މެޗުގެ ބާކީބައި ކުޅުނީ 10 ކުޅުންތެރުންނާއި އެކުއެވެ. 

ވޮލްވްސްހެމްޕްޓޮންއަށް މެޗުގެ ލީޑް 77 ވަނަ މިނެޓުގައި ނަގައިދިނީ އެ ޓީމުގެ ކްރިސް ސްމޯލިންގްއެވެ. 

މި ސީޒަނުގައި ވޮލްވްސްއިން ޔުނައިޓެޑް ބަލިކުރި މިއީ ދެވަނަ ފަހަރެވެ. މާރޗް މަހު އެފްއޭ ކަޕުން ޔުނައިޓެޑް ކެޓީ ކުއާޓާ ފައިނަލުގއި ވުލްވްސް އަތުން 2-1 އިން ބަލިވުމުންނެވެ. ޕްރިމިއާ ލީގުގައި ޔުނައިޓެޑް ދަނޑުގައި ވުލްވްސްއާ ދެކޮޅަށް ކުޅުނު މެޗު ނިމުނީ 1-1 ގެ ނަތީޖާއަކުން ދެ ޓީމް އެއްވަރުވެގެންނެވެ.

މި ނަތީޖާ އާއިއެކު ގަދަ ހަތަރަކަށް ވަންނަން ޔުނައިޓެޑަށް ލިބުނު ފުރުސަތު ގެއްލުނުއިރު، ބުދަ ދުވަހު ޗެލްސީ ކުޅޭ މެޗުން ނަތީޖާ ނުކުންނަ ގޮތަކުން ޔުނައިޓެޑް ހަ ވަނަ އަށް ވެއްޓުމުގެ ފުރުސަތު އެބައޮތެވެ. ޔުނައިޓެޑް މި ވަގުތު ފަސް ވަނައިގައި އޮތީ 32 މެޗުން ހޯދި 61 ޕޮއިންޓާ އެކު އެވެ. ހަ ވަނައިގައި އޮތް ޗެލްސީ މިރޭ އަމިއްލަ ދަނޑުގައި ބްރައިޓަންއާ ދެކޮޅަށް ކުޅޭއިރު، އެ ޓީމު މި ވަގުތު އޮތީ ތާވަލުގެ ހަވަނާގައި ކުޅުނު 31 މެޗުން ހޯދި 60 ޕޮއިންޓް އާއި އެކުއެވެ.