ޕްރިމިއާ ލީގު: ފުލަމް ބަލިކޮށް ސިޓީން އެއްވަނައިގައި އެއް ޕޮއިންޓްގެ ލީޑެއް ނަގައިފި

ޕްރިމިއާ ލީގުގައި ފުލަމް ބަލިކޮށް މެންޗެސްޓާ ސިޓީން ޕޮއިންޓް ތާވަލުގެ އެއް ވަނައިގައި އެއް ޕޮއިންޓްގެ ލީޑެއް ނަގައިފިއެވެ.

ހޮނިހިރު ދުވަހު ކުޅުނު މެޗު ފުލަމްއާ ވާދަކޮށް ސިޓީން ކާމިޔާބުކުރީ 0-2 ގެ ނަތީޖާއަކުންނެވެ.

ފުލަމް ދަނޑުގައި ކުޅުނު މި މެޗު ފެށިގެން ފަސްވަނަ މިނެޓުގައި އެ ޓީމުން ވަނީ މެޗުގެ ލީޑު ނަގާފައެވެ. މި ލަނޑު ސާޖިއޯ އަގުއެރޯގެ އެހީތެރިކަމާ އެކު ކާމިޔާބުކުރީ ބެނާޑޯ ސިލްވާއެވެ.

މި ލަނޑަށް ފަހު ވެސް ލީޑު ފުޅާކުރަން ގިނަ ފުރުސަތުތަކެއް ސިޓީއަށް ވަނީ ލިބި ބޭކާރުވެފައެވެ. އެގޮތުން އަގުއެރޯއަށް ލިބުނު ހުސް ފުރުސަތުތައް ފާހަގަކޮށްލެވެއެވެ.

ސިޓީން މެޗުގެ ލީޑު ފުޅާކުރީ 27 ވަނަ މިނެޓުގައެވެ. މި ލަނޑު ބެނާޑޯ ސިލްވާގެ އެހީތެރިކަމާ އެކު ކާމިޔާބުކުރީ އަގުއެރޯއެވެ. މި ހާފްގައި ފުލަމްއަށް ލަނޑު ޖެހުމަށް މާ އެދެވޭ ފުރުސަތެއް ލިބިފައެއް ނުވެއެވެ.

ދެވަނަ ހާފް ފެށިގެން ވެސް ސިޓީއަށް ވަނީ ލަނޑު ޖެހުމަށް ގިނަ ފުރުސަތުތަކެއް ލިބި ބޭކާރުވެފައެވެ. ފުރަތަމަ ހާފެކޭ އެއްގޮތަށް މި ހާފްގައިވެސް ފުލަމްއަށް ލަނޑު ޖެހުމަށް މާ އެދެވޭ ފުރުސަތުތަކެއް ލިބިފައެއް ނުވެއެވެ.

މި ނަތީޖާއާ އެކު ސިޓީ އޮތީ ކުޅުނު 31 މެޗުން ލިބުނު 77 ޕޮއިންޓާއެކު ޕޮއިންޓް ތާވަލުގެ އެއްވަނައިގައެވެ. މެޗުން ބަލިވި ފުލަމް އޮތީ ކުޅުނު 32 މެޗުން ލިބުނު 17 ޕޮއިންޓާއެކު ޕޮއިންޓް ތާވަލުގެ 19 ވަނައިގައެވެ.