އޭސީސީ އިން ބަލަނީ ކެންޑިޑޭޓުންގެ 8 މައްސަލަ!
ދެ ކެންޑިޑޭޓެއްގެ މައްސަލަ ވަނީ ބަލާ ނިންމާފައި
އޭސީސީގެ ނައިބު ރައީސް މުއައްވިޒު ރަޝީދު
އެންޓިކަރަޕްޝަން ކަމިޝަން (އޭސީސީ) އިން ބަލަމުންދަނީ ރައްޔިތުންގެ މަޖިލީހަށް ކުރިމަތިލާފައިވާ ކެންޑިޑޭޓުންގެ އަށް މައްސަލަ ކަމަށް އެ ކަމިޝަނުން ބުނެފިއެވެ.
އޭސީސީގެ ނައިބު ރައީސް މުއައްވިޒު ރަޝީދު ރާއްޖެއެމްވީއަށް ވިދާޅުވީ އަށް މައްސަލައިގެ ތެރެއިން ދެ މައްސަލަ އެކަމިޝަނުން ބަލާ ނިންމާފައިވާ ކަމަށެވެ. އަދި އެކަން އެ ކެންޑިޑޭޓުންނަށް އަންގާފައިވާ ކަމަށް ވިދާޅުވިއެވެ. އެހެން ނަމަވެސް އެއީ ކޮން ކެންޑިޑޭޓުންނެއް ކަމެއް ވިދާޅެއް ނުވިއެވެ.
"މި ކަމިޝަނުން ބެލީ ކެންޑިޑޭޓުންގެ 8 މައްސަލަ. އޭގެ ތެރެއިން ދެ މައްސަލަ ބަލާ ނިންމާފައި ވާނީ،" މުއައްވިޒު ވިދާޅުވިއެވެ.
މުއައްވިޒު ވިދާޅުވީ މައްސަލަ ނިމިފައިވާ ދެ ކެންޑިޑޭޓުންގެ ވެސް ކަރަޕްޝަންގެ އެއްވެސް މައްސަލައެއް ނުހިމެނޭ ކަމަށެވެ. އަދި ރައްޔިތުންގެ މަޖިލީހުގެ އިންތިޚާބުގެ ކުރިން ބާކީ ހުރި ހަ މައްސަލަ ބަލައި ނިންމުމަށް މަސައްކަތް ކުރަމުންދާ ކަމަށް ވިދާޅުވިއެވެ.
އެނގިފައިވާ ގޮތުގައި އޭސީސީ އިން ބަލާ ނިންމާފައިވާ މައްސަލައިގެ ތެރޭގައި ހެންވޭރު ދެކުނު ދާއިރާ އަށް ވާދަކުރައްވާ އެމްޑީޕީގެ ކެންޑިޑޭޓް، ހުސެއިން ޝަމީމް (އަނދުން ހުސެއިން)ގެ މައްސަލައަކާއި ހެންވޭރު އުތުރު ދާއިރާ އަށް ވާދަކުރައްވާ އަލްހާން ފަހުމީގެ މައްސަލައެކެވެ. އެހެން ނަމަވެސް އޭސީސީއިން ވަނީ އެ ދެ ކެންޑިޑޭޓުންގެ ކަރަޕްޝަންގެ މައްސަލައެއް ނެތް ކަމަށް ނިންމާފައެވެ.
އޭސީސީ އިން މައްސަލަ ބަލާ ކެންޑިޑޭޓުންގެ ތެރޭގައި ޕާޓީތަކާއި އަމިއްލަ ގޮތުން މަޖިލީހުގެ މެމްބަރުކަމަށް ކުރިމަތިލައްވާފައިވާ ކެންޑިޑޭޓުން ހިމެނެއެވެ.
ކުރިއަށް އޮތް ރައްޔިތުންގެ މަޖިލީސް ބާއްވާނީ އަންނަ މަހުގެ 6 ވަނަ ދުވަހުއެވެ. މި ފަހަރުގެ އިންތިޚާބުގައި 386 ކެންޑިޑޭޓުން ވާދަކުރެއެވެ.
