ދިވެހިރާއްޖޭގެ ތަރިކައިގެ ދަފްތަރެއް އެކުލަވާލައި ތަރިކައިގެ ބިލު މަޖިލީހަށް ފޮނުވައިފި
ސަގާފީ ތަރިކައިގެ ވަގުތީ ދަފްތަރެއް އެކުލަވާލުމަށް ވަނީ ގެޒެޓްކޮށްފައި
ކަޅުވަކަރު މިސްކިތް
ދިވެހިރާއްޖޭގެ ތަރިކައިގެ ދަފްތަރެއް އެކުލަވާލައި ތަރިކައިގެ ބިލު މަޖިލީހަށް ފޮނުވައިފިއެވެ.
ސަރުކާރުގެ ފުރަތަމަ 100 ދުވަހުގެ ތެރޭގައި މިނިސްޓްރީއިން ކުރަން ވައުދުވެފައިވާ ކަންތަކުގެ ތެރޭގައި ހިމެނޭ ކޮންމެ ރަށެއްގައިވެސް ހުރި ތަރިކައާއި، ދުވަސްވީ ބިނާތަކާއި، އާސާރު އެކުލެވޭ ތަންތަނާއި، ތާރީޚާ ގުޅިފައިވާ ތަކެއްޗަކީ އެރަށެއްގެ އެންމެ މުހިންމު އައިޑެންޓިޓީކަމުން، މިފަދަ ތަންތަނާއި ތަކެތި ހިމާޔަތްކުރުން އެންމެހާ ފަރާތްތަކަށް ލާޒިމްވާގޮތަށް ގާނޫނީ ޒިންމާ ކަނޑައެޅި، ތަރިކައިގެ ލިސްޓެއް އެކުލަވާލެވި، ހަރުދަނާ އުސޫލަކުން އާސާރުބެލެހެއްޓޭން ފެށުމުގެ ތެރެއިން ތަރިކައިގެ ގާނޫނުގެ ބިލުގެ ދެލި ކޮޕީ ތައްޔާރުކުރުމަށް ފަހު ރައްޔިތުންގެ މަޖުލީހަށް ވަނީ ފޮނުވާފައެވެ.
މީގެ އިތުރުން ސަގާފީ ތަރިކައިގެ ވަގުތީ ދަފްތަރެއް އެކުލަވާލުމަށް ފަހު މިހާރު ވާނީ ގެޒެޓްކޮށްފައެވެ.
މި ލިސްޓު ތައްޔާރުކޮށްފައިވަނީ ރަށު ކައުންސިލްތަކާއި ދާއިރާގެ މާހިރުންނާއި އާންމުންގެ އެހީތެރިކަމާއި އެކުގައެވެ. މި ލިސްޓު އަދާ ހަމަކޮށް، ލިސްޓުގައި ހިމެނިފައިވާ މައުލޫމާތުތައް އުނި އިތުރު ގެނައުމަށާއި މައުލޫމާތު ކަށަވަރުކުރުމަށް އާންމުންގެ ޚިޔާލު މިނިސްޓްރީގެ ވެބްސައިޓު މެދުވެރިކޮށް އަބަދުވެސް ފޮނުވޭނެ އިންތިޒާމު ވަނީ ހަމަޖެހިފައެވެ.
ތަރިކައިގެ ޤާނޫނު މަޖުލީހުން ފާސްކޮށް ރައީސުލްޖުމްހޫރިއްޔާ ތަޞްދީޤު ކުރެއްވުމުން ރާއްޖޭގެ ތަރިކަ ދެމެހެއްޓެނިވި ގޮތަކަށް ކަނޑައެޅިފައިވާ އުސޫލުތަކެއްގެ ތެރެއިން ބަލަހައްޓަންފަށައި، ތަރިކައިގެ ލިސްޓަށް ޤާނޫނީ ބާރު، ލިބި އާސާރީ ސަރަހައްދުތައް ޙިމާޔަތް ކުރުމަށް ކުރަމުންދާ މަސައްކަތްތައް އިތުރަށް ކުރިއަށްގެންދިއުމަށް މަގުފަހިވެގެންދާނެ ކަމަށްވެސް ހެރިޓޭޖް މިނިސްޓްރީން ބުންޏެވެ.
މީގެ އިތުރުން ފުރަތަމަ 100 ދުވަހުގެ ތެރޭގައި ކުރުމަށް ހަމަޖެހިފައިވަނީ ކަޅުވަކަރު މިސްކިތް އަލުން ރާވައި ބެހެއްޓުމުގެ މަސައްކަތެކެވެ.
މި މިސްކިތަކީ ރާއްޖޭގެ ހިރިގަލު މިސްކިތްތަކުގެ ތެރެއިން ފާހަގަކޮށްލެވޭ އިމާރާތެކެވެ. ގިނަ އަދަދަކަށް ކަޅުވަކަރު ބޭނުން ކޮށްގެން ހަދާފައިވުމުގެ އިތުރުން މުހިންމު އާސާރެކެވެ. މިފަދަ ތަނެއް މަރާމާތުކޮށް، އެއްތަނުން އަނެއްތަނަށް ބަދަލުކޮށް ރޭވުމަކީ ވަރަށް ފަންނީ އަދި އެހާމެ ފަރުވާތެރިކަމާއެކު ކުރަންޖެހޭ މަސައްކަތެކެވެ.
މިފަދަ ދުވަސް ވީތަންތަނަށް ދޭންޖެހޭ ފަރުވާއަކީ ވަރަށް ވަގުތުނަގާ އަދި ވަކި މުއްދަތުތަކެއް އެކަމަށް ހޭދަކުރަންޖެހޭ ކަމެއް ވެސްމެއެވެ.
ކަޅުވަކަރު މިސްކިތް ބަހައްޓާ ސަރަހައްދުގައި ކުރިން ހުރި އިމާރާތުގެ ތަޅުންގަޑާއި ފައުންޑޭޝަން ތެޅުމަށް ފަހު ބިންގަނޑު ތައްޔާރުކުރުމުގެ މަސައްކަތް ނިންމައި، އެ ސަރަހައްދުގައި ސެކިއުރިޓީ ފެންސު ޖެހުމުގެ މަސައްކަތް ދަނީ ކުރިއަށް ކަމަށާއި މިސްކިތް ބަހައްޓާ ސަރަހައްދާއި ސަލްޓަން ޕާކު ގުޅިގެންދާނޭ ފަދަ ވެއްޓެއް ތައްޔާރު ކުރުމަށް މިސްކިތް ބަހައްޓާ ސަރަހައްދުގެ ކުރެހުންތައް މިހާރު ވަނީ ތައްޔާރުކޮށް ނިމިފައި ކަމަށް ވެސް އެމިނިސްޓްރީން ވަނީ ބުނެފައެވެ.
ކަޅުވަކަރު މިސްކިތުގެ ހިރިގަލުގެ ހުރިހާ ބައިތައް މަރާމާތުކޮށް އާބާތުރަ ފިލުވުމުގެ މަސައްކަތްވަނީ ނިމިފައެވެ. މި މަސައްކަތްތަކާއި އެއްކޮށް މިސްކިތުގެ ލަކުޑިއަށް ދޭންޖެހޭ ފަރުވާ ދިނުމުގެ މަސައްކަތް ކުރިއަށްދާ ކަމަށް މިނިސްޓްރީން ބުންޏެވެ.
މީގެ ތެރޭގައި އަލުން ހަދަން ޖެހޭ ބައިތަކާއި އާބާތުރަ ފިލުވުމުގެ ބައިތަކާއި މަރާމާތުކުރަން ޖެހޭ ބައިތައް ހިމެނޭއިރު، މި މަސައްކަތުގެ %70 ވަނީ މިހާރު ނިމިފައި ކަމަށްވެސް މިނިސްޓްރީން ވަނީ ބުނެފައެވެ.
