ޗެލްސީއާއެކު ޔޫރޮޕާ ލީގު ކާމިޔާބުކުރަން ބޭނުން: ހަޒާޑް

ޗެލްސީއާއެކު ޔޫރޮޕާ ލީގު ކާމިޔާބުކުރަން ބޭނުންވާ ކަމަށް އެ ކްލަބަށް ކުޅެމުން އަންނަ ބެލްޖިއަމްގެ ކެޕްޓަން އެޑެން ހަޒާޑް ބުނެފިއެވެ.

ބެލްޖިއަމްގެ ޓީވީއަކަށް ދިން އިންޓަވިއުއެއްގައި ހަޒާޑް ބުނީ، ޗެލްސީއާއެކު ކުރިއެރުން ހޯދަން ބޭނުންވާ ކަމަށާއި، ޓާގެޓަކީ އެ ކްލަބާއެކު މި ސީޒަނުގައި ޔޫރޮޕާ ލީގު ކާމިޔާބުކުރުން ކަމަށެވެ.

ހަޒާޑް ބުނީ، ކުރިޔަށް އޮތް ސީޒަނުގައި ޗެމްޕިއަންސް ލީގުން ޖާގަ ކަށަވަރުކުރަން ޖެހޭ ކަމަށާއި، އެގޮތުން ޔޫރޮޕާ ލީގު ކާމިޔާބުކުރުން ނުވަތަ ޕްރިމިއާ ލީގުގެ ގަދަ ހަތަރަކުން ޖާގަ ކަށަވަރުކުރުން ޗެލްސީއަށް މަޖުބޫރު ކަމަށެވެ.

ސަޕޯޓަރުންނާއި، ކްލަބުގެ މެނޭޖްމަންޓުން ހާސިލްކުރަން ބޭނުންވާ ޓާގެޓަށް ވާސިލުވާން ބުރަ މަސައްކަތް ކޮށްދޭނެކަން ފާހަގަކުރަމުން ހަޒާޑް ބުނީ، ހުރިހާ ކުޅުންތެރިންވެސް ބުރަކޮށް މަސައްކަތް ކުރަމުން އަންނަ ކަމަށެވެ.

ހަޒާޑް މިހެން ބުނެފައިވާއިރު، މި ސީޒަނަށްފަހު އޭނާ ޗެލްސީ ދޫކޮށްލާނެ ކަމަށް ރިޕޯޓްތައް ބުނެއެވެ. އަދި ބައެއް ރިޕޯޓްތައް ބުނާ ގޮތުން އޭނާ ރެއާލް މެޑްރިޑަށް ބަދަލުވާނެއެވެ.

ނަމަވެސް އެއްވެސް ކްލަބަކަށް ހަޒާޑްއާއެކު އެއްބަސްވުމަކަށް އައިސްފައިނުވާ ކަމަށް ރިޕޯޓްތައް ބުނެއެވެ. ޗެލްސީއާއެކު ހަޒާޑް ހަދާފައިވާ އެއްބަސްވުން ހަމަވާނީ 2020 ވަނަ އަހަރެވެ.

ދާދި ފަހުން ނޫސްވެރިންނަށް މައުލޫމާތު ދެމުން ހަޒާޑް ބުނީ އެއްބަސްވުން ކުރިޔަށް އޮތް ދުވަސްތަކުގައި އާނުކުރެވިއްޖެ ނަމަ އެހެން ކްލަބަކަށް ބަދަލުވުމުގެ ފުރުސަތު އެބަ އޮތް ކަމަށާއި، އަމިއްލަ އަށް ކްލަބް ދޫކޮށްލުމުގެ ވިސްނުމެއް އަދި ނެތް ކަމަށެވެ.

ފްރާންސްގެ ލިއްލޭ އިން ކެރިޔަރު ފެށި ހަޒާޑް ވަނީ އެޓީމަށް ކުޅުނު 194 މެޗުގައި 50 ލަނޑު ކާމިޔާބުކޮށްފައެވެ. އޭނާ ޗެލްސީއަށް ބަދަލުވީ 2012 ވަނަ އަހަރު އެވެ. އޭނާ ވަނީ ޗެލްސީއަށް މިހާތަނަށް ކުޅުނު 339 މެޗުގައި 105 ލަނޑު ކާމިޔާބުކޮށްފައެވެ.

ޗެލްސީއާ އެކު ޔޫރޮޕާ ލީގު ކާމިޔާބުކޮށްފައިވާ ހަޒާޑް ވަނީ އެޓީމާއެކު ޕްރިމިއާ ލީގު ދެ ފަހަރު އަދި ފުޓްބޯލް ލީގު ކަޕް ވެސް ކާމިޔާބުކޮށްފައެވެ. އޭނާ ވަނީ ބެލްޖިއަމް ގައުމީ ޓީމަށް ކުޅުނު 98 މެޗުގައި 27 ލަނޑު ކާމިޔާބުކޮށްފައެވެ.