ހާސް ކަނޑާލާ، ގޯއްޗެއް ދޭނަމޭ: ނަޝީދު
ޕާޓީ ބަދަލު ނުކުރާނެ މެމްބަރެއްގެ މިސާލަކީ އިވާ: ނަޝީދު
އެމްޑީޕީގެ ރައީސް މުހައްމަދު ނަޝީދު
ބޯހިޔާވަހިކަމުގެ ދަތިކަން ދިމާވެފައިވާ މާލޭގެ ކޮންމެ ރައްޔިތަކަށް ''އެޖެންޑާ 19'' ދަށުން ގޯއްޗެއް ލިބޭ ގޮތް ހަމަޖައްސައި ދެއްވާނެ ކަމަަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެމްޑީޕީގެ ޓިކެޓްގައި ގަލޮޅު އުތުރު ދާއިރާ އަށް ކުރިމަތިލާފައިވާ އިވާ އަބްދުﷲގެ ކެމްޕޭނު ޖަލްސާގައި ވާހަކަފުޅު ދައްކަވަމުން އެމްޑީޕީގެ ރައީސް ނަޝީދު ވިދާޅުވީ، ބޯހިޔާވަހިކަމުގެ ދަތިކަމަކީ މާލޭގެ އިތުރުން ރާއްޖޭގެ އެކި ކަންކޮޅުތަކަށް ދިމާވެފައިވާ އެންމެ ބޮޑު އެއް މައްސަލަ ކަމަށެވެ. އެ ކަމަށް ހައްލެއް ހޯދޭނީ އެމްޑީޕީން 19 ވަނަ މަޖިލީހަށް ހުށަހަޅަން ހަމަޖެހިފައިވާ ''އެޖެންޑާ 19''ގެ ދަށުން ކަމަށް ވިދާޅުވިއެވެ.
''އަޅުގަނޑުމެން ނިކުމެ މި ތިބީ އިރާދަކުރެއްވިއްޔާ މި މާލޭގެ ރައްޔިތުންނަށް ގޯއްޗެއް ކަނޑާފައި ދޭން، ފްލެޓެއް ދޭން، ބޯހިޔާވަހިކަން ދޭން. އެޖެންޑާ 19 ގެ އަމާޒަކީ ހާސްކަމެއްނެތް ދިރިއުޅުމެއް ހޯދައިދިނުން. ހާސް ކަނޑާލާށޭ. ގޯއްޗެއް ދޭނަމޭ. '' އެމަނިކުފާނުި ވިދާޅުވިއެވެ.
އެ ޖަލްސާގައި ވާހަކަފުޅު ދައްކަވަމުން ނަޝީދު ވިދާޅުވި، ބޯހިޔާވަހި ކަމަށް އެދި ރައްޔިތުން ޖަހާ ސަލާން އެމްޑީޕީ ކެންޑިޑޭޓުންނަށް ވުރެ ބޮޑަށް އެކަން ދެނެގަނެފައިވާ ބަޔަކު ނުދިބޭނެ ކަމަށާއި، ވެށިފަހި މާލޭ ޕްރޮގްރާމްގެ ދަށުން ބޯހިޔާވަހި ކަމަށް ހައްލެއް ލިބިގެންދާނެ ކަމަށް ގަބޫލުފުޅު ކުރައްވާ ކަމަށެވެ.
ރައްޔިތުންގެ މަޖިލީހުގައި ތިއްބަވާ މެމްބަރުން ޕާޓީ ބަދަލުކުރައްވާ މައްސަލަ އަށް އިޝަރާތް ކުރައްވާ ނަޝީދު ވިދާޅުވީ، ޕާޓީ ބަދަލު ނުކުރާނެ މެމްބަރެއްގެ މިސާލަކީ އިވާ ކަމަށެވެ. އީވާއަށް ތައުރީފު ކުރައްވަމުން ނަޝީދު ވިދާޅުވީ، ކުރިއަށް އޮތް މަޖިލީހަށް އީވާ އިންތިހާބު ގަލޮޅު ރައްޔިތުންގެ އަރިހުން އާދޭހާ އެކު ދަންނަވާފައެވެ.
މިހާރު ހިނގަމުންދާ 18 ވަނަ ރައްޔިތުން މަޖިލީހުގެ ގަލޮޅު އުތުރު ދާއިރާގެ މެމްބަރު ކަމަށް އީވާ ވަޑައިގަތީ މަޖިލީސް އިންތިހާބުގައި 62 ޕަސެންޓް ކާމިޔާބު ކުރައްވައިގެންނެވެ. ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި ގަލޮޅު އުތުރު ދާއިރާއަށް އީވާގެ އިތުރުން ހަތަރު ކެންޑިޑޭޓުން ވާދަކުރެއެވެ.
