ލޯނާއިއެކު ކުރިޔަށް ރާވާފައި ހުރި މަޝްރޫއުތައް ވަރަށް އަވަހަށް ފެށިގެންދާނެ: ފިނޭންސް މިނިސްޓަރު
ފައިސާ ބޭނުން ކުރަން ހަމަޖެހިފައިވަނީ ފެނާއި ނަރުދަމާގެ މަސައްކަތުގެ އިތުރުން އެހެނިހެން މުހިއްމު މަޝްރޫއުތަކަށް: އަމީރު
ފިނޭންސް މިނިސްޓަރު އަމީރު މީޑިއާ އަށް މައުލޫމާތު ދެނީ
އަވަށްޓެރި އިންޑިއާއިން ރާއްޖެއަށް ދީފައިވާ 800 ޑޮލަރުގެ ލޯނުގެ ދަށުން ކުރިޔަށް ރާާވާފައި ހުރި މަޝްރޫއުތަކުގެ އަމަލީ މަސައްކަތް ވަރަށް އަވަހަށް ފެށިގެންދާނެ ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.
އިންޑިއާއިން ރާއްޖެއަށް ދޭން ހަމަޖެހިފައިވާ ލޯނުގެ އެއްބަސްވުމުގައި ސޮއިކުރުމުގެ ރަސްމިއްޔާތަށް ފަހު މީޑިއާ ވާހަކަ ދައްކަމުން މިނިސްޓަރު ވިދާޅުވީ، އިންޑިއާއިން ދީފައިވާ ފައިސާ ބޭނުން ކުރަން ހަމަޖެހިފައިވަނީ ފެނާއި ނަރުދަމާގެ މަސައްކަތުގެ އިތުރުން އެހެނިހެން މުހިއްމު މަޝްރޫއުތަކަށް ކަމަށެވެ. މިހާރުވެސް ބައެއް މަޝްރޫއުތަކުގެ މައުލޫމާތު އެކްޒިމް ބޭންކުގެ އިތުރުން އިންޑިއާގެ ސަރުކާރާއި ހިއްސާކޮށްފައިވާނެ ކަމަށް ވިދާޅުވިއެވެ.
''މިއަދު އަޅުގަނޑުމެންނަށް މި ސޮއިކުރުމުގެ ނަތިއްޖާ އަކަށް ވެގެންދާނީ އަޅުގަނޑުމެންނަށް ވަރަށް އަވަހަށް މި މަސައްކަތް ފެށިގެން ވަރަށް އަވަހަށް މި ޕޮރްޖެކްޓް ތަކުގެ އަމަލީ މަސައްކަތްތައް ފެށިގެންދާނެ. ވަރަށް އަވަހަށް ފެށިގެންދާނެ ކަމަށް ލަފާކުރެވޭ '' ފިނޭންސް މިނިސްޓަރު ވިދާޅުވިއެވެ.
ކޮމާޝަލް ޕޯޓް ތިލަފުއްޓަށް ބަދަލު ކުރުމުގެ އިތުރުން އެހެނިހެން ޕްރޮޖެކްޓްތައް ވެސް ހިމެނިފައިވާ ކަމަށާއި، މިހާރުވެސް 30 ރަށުގެ ފެނާއި ނަރުދަމާގެ މަސައްކަތްތައް ކުރިޔަށް ގެންދިއުމަށްޓަކައި ހުރިހާ ތަފްސީލްތައް ހުށައަޅާފައިވާ ކަމަށް އަމީރު ވިދާޅުވިއެވެ.
އިންޑިއާ އިން ރާއްޖެއަށް 800 ޑޮލަރު ދޭގޮތަށް ނިންމާފައިވަނީ ރައީސް ސޯލިހު އިންޑިއާ އަށް ކުރެއްވި ދަތުރުފުޅުގައެވެ. އެ ފައިސާއަކީ ސަރުކާރުން ކުރިއަށް ގެންދަން ބޭނުންވާ ޕްރޮޖެކްޓްތައް އިންޑިއާ ސަރުކާރަށް ހުށަހެޅުމުން އިންޑިޔާގެ އެގްޒިމް ބޭންކު މެދުވެރިކޮށް ދިނުމަށް ނިންމާފައިވާ ލޯންތަކެއް ކަމަށް މިނިސްޓަރު އަމީރު ވަނީ ވިދާޅުވެފައެވެ.
