ގދ. ފަރެސްމާތޮޑާ އެއާޕޯޓު އެޅުމުގެ މަޝްރޫއު މި އަހަރުގެ ތެރޭގައި ނިމޭނެ ކަމަށް މިނިސްޓަރ އޮފް ނޭޝަނަލް ޕްލޭނިންގ އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވެއްޖެއެވެ.

އާދިއްތަ ދުވަހުގެ ރޭ ފަރެސްމާތޮޑާގައި އެމްޑީޕީން ބޭއްވި ކެންޕޭން ޖަލްސާގައި މިނިސްޓަރު އަސްލަމް ވިދާޅުވީ އަމާޒަކީ މިއަހަރު ނިމެންވާއިރަށް ފަރެސްމާތޮޑާ އެއާޕޯޓު ނިންމުން ކަމަށާއި، އުންމީދާކީ އެއީ ކަމަށެވެ.

މިނިސްޓަރު އަސްލަމް ވިދާޅުވީ އެއާޕޯޓުގެ މަޝްރޫއަކީ މުޅި ދާއިރާ ގުޅިފައިވާ މަޝްރޫއެއް ކަމަށާއި، އެ ދާއިރާގެ ރައްޔިތުންގެ އެންމެ ބޮޑު އެއް ހުވަފެން ކަމަށެވެ. މި އަހަރުގެ މި މަޝްރޫއު ނިންމާ ރައްޔިތުންނަށް އެއާޕޯޓު ބޭނުންކުރެވޭ ގޮތް ހެދުމަށް، ރައްޔިތުން ސަރުކާރަށް ފުރިހަމަ އެއްބާރުލުންދޭން ޖެހޭ ކަމަށާއި، ރައްޔިތުންގެ މަޖިލީހުގެ އެއްބާރުލުން ފުރިހަމައަށް ބޭނުންވާ ކަމަށް މިނިސްޓަރު ވިދާޅުވިއެވެ.

"ސަރުކާރު ހިންގުމަށްޓަކައި ރައްޔިތުން މަޖިލީހުގައި އަޅުގަނޑު މީގެ ކުރިން ރައީސް ނަޝީދުގެ ސަރުކާރުގަ މަސައްކަތްކޮށްފިން ރައްޔިތުން މަޖިލީހުގެ އަގުލަބިއްޔަތެއް ވެރިކަން ކުރާ ޕާޓީއަށް ނެތި. ކަންތައްތައް ކުރެވުނީ ވަރަށް ދަތިކޮށް. މަޖިލީހުގައި ތިއްބަވާ އިދިކޮޅު މެންބަރުގެ ހުރަސްއަޅުއްވާ ކަންކަން ވަރަށް ބައިވަރުހުރޭ،" މިނިސްޓަރު އަސްލަމް ވިދާޅުވިއެވެ.

މިނިސްޓަރު އަސްލަމް ވިދާޅުވީ ގައުމާއި ރައްޔިތުންގެ ކުރިމަގަށް ކުރާ މަސައްކަތުގައި ބަޖެޓެއް ހޯދަން ވިޔަސް، ލޯނެއް ހޯދަން ވިޔަސް އަދި ބަޔަކާ އެކު އެއްބަސްވުމެއްގައި ސޮއިކުރަން ވިޔަސް މަޖިލިސް މެންބަރުން އުނދަގޫތައް ތަޖުރިބާ ކުރެވިފައިވާ ކަމަށެވެ. އެހެންކަމުން ރައީސް އިބްރާހިމް މުހައްމަދު ސޯލިހުގެ މި ވެރިކަމުގައި މިކަންކަން ތަޖުރިބާ ކުރަން ބޭނުންނުވާ ކަމަށް މިނިސްޓަރު ވިދާޅުވިއެވެ.

އާބާދީގައި 1200 އެއްހާ މީހުން ދިރިއުޅޭ ފަރެސްމާތޮޑާ އެއާޕޯޓަކީ ސަރުކާރުން ހަތަރު މިލިއަން ޑޮލަރު ޚަރަދުކޮށްގެން ކުރިއަށްގެންދާ މަޝްރޫއެކެވެ. މިދިޔަ އަހަރު ސެޕްޓެމްބަރު މަހުން ފެށިގެން އެ ރަށުގައި އެއާޕޯޓު އެޅުމަށް އެއަޕޯޓު ހިމެނޭ ސަރަހައްދުގެ ބިން ހިއްކުމުގެ މަސައްކަތް ދަނީ ކުރަމުންނެވެ.

ފަރެސްމާތޮޑާ އެއަރޕޯޓް މަޝްރޫއާ، އެއަރޕޯޓް އެޅުމަށް ބިންހިއްކުމުގެ މަސައްކަތް ކުރުމަށް މިއަހަރުގެ ބަޖެޓްގައި 40.3 މިލިއަން ރުފިޔާ ވަނީ ހިމަނާފައެވެ.