ޗެމްޕިއަންސް ލީގު: ބަޔާން ދަނޑުގައި އެ ޓީމު ބަލިކޮށް ލިވަޕޫލް ކުއާޓާއަށް

ޔުއެފާ ޗެމްޕިއަންސް ލީގުގައި ބަޔާން މިއުނިކް ދަނޑުގައި އެ ޓީމު ބަލިކޮށް، ލިވަޕޫލް ކުއާޓާ އިން ޖާގަ ހޯދައިފިއެވެ.

ބުދަ ދުވަހުގެ ރޭ ކުޅުނު ދެވަނަ ލެގުގެ މެޗު ބަޔާންއާ ވާދަކޮށް ލިވަޕޫލުން މެޗު ކާމިޔާބުކުރީ 1-3 ގެ ނަތީޖާއަކުންނެވެ. ބަޔާން އަދި ލިވަޕޫލް ބައްދަލުކުރި ފުރަތަމަ ލެގުގެ މެޗު ނިމުނީ 0-0 ގެ ނަތީޖާއަކުން އެއްވަރުވެގެންނެވެ. އެގޮތުން ލިވަޕޫލް ކުއާޓާއަށް ދަތުރުކުރީ 1-3 ގެ އެގްރިގޭޓް ނަތީޖާއަކުންނެވެ.

ބަޔާން ދަނޑުގައި ކުޅުނު މި މެޗު ފެށިގެން ރަނގަޅަށް ކުޅެމުންދިޔައީ ލިވަޕޫލުންނެވެ. އެގޮތުން 26 ވަނަ މިނެޓުގައި އެ ޓީމުން ވަނީ ލީޑު ނަގާފައެވެ. މި ލަނޑު ކާމިޔާބުކުރީ ވެންޑައިކްގެ އެހީތެރިކަމާ އެކު ސާޑިއޯ މާނޭއެވެ.

ނަމަވެސް ބަޔާނުން ވަނީ 39 ވަނަ މިނެޓުގައި ނަތީޖާ ހަމަހަމަކޮށްފައެވެ. މި ލަނޑަކީ ލިވަޕޫލްގެ މަޓިޕް އަތުން ބައިކޮޅަށް ވަތް ލަނޑެކެވެ. މި ލަނޑަށް ފަހު ވެސް ބަޔާންއަށް ލަނޑު ޖެހުމަށް ފުރުސަތުތަކެއް ލިބި ވަނީ ބޭކާރުވެފައެވެ.

ދެވަނަ ހާފް ފެށިގެން ލިވަޕޫލްގެ ފަރާތުން މޮޅު ކުޅުމެއް ފެނުނުއިރު، 69 ވަނަ މިނެޓުގައި އެޓީމުން ވަނީ ލީޑު އަނބުރާ ހޯދާފައެވެ. މި ލަނޑު ޖޭމްސް މިލްނާ ނަގައިދިން ކޯނަރަކުން ކާމިޔާބުކުރީ ވެންޑައިކްއެވެ.

މި ލަނޑަށްފަހުވެސް ލިވަޕޫލަށް ވަނީ ލަނޑު ޖެހުމަށް ގިނަ ފުރުސަތުތަކެއް ލިބި ބޭކާރުވެފައެވެ. އެގޮތުން މުހައްމަދު ސަލާހް އަދި މާނޭއަށް ލިބުނު ހުސް ފުރުސަތުތައް ފާހަގަކޮށްލެވެއެވެ.

ލިވަޕޫލުން މެޗުގެ ލީޑު ފުޅާކުރީ 84 ވަނަ މިނެޓުގައެވެ. މި ލަނޑު ސަލާހްގެ އެހީތެރިކަމާއެކު ކާމިޔާބުކުރީ މާނޭއެވެ. މެޗުގައި މާނޭ ވަނީ މޮޅު ކުޅުމެއް ދައްކާފައެވެ.