ރަނގަޅު ފާހަގަ ފިޔަވައި އިތުރު ކުރެހުމެއް ކުރަހައިފިނަމަ ވޯޓު ބާތިލްވާ އިސްލާހު ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ތަސްދީގު ކުރައްވާފިއެވެ.
ވޯޓު ކަރުދާހުގައި ކުރަހައިފިނަމަ ބާތިލުވާ ގޮތަށް އިންތިޚާބާއި ބެހޭ ގާނޫނަށް އިސްލާހު ގެނައުމަށް ރައްޔިތުންގެ މަޖިލީހަށް ހުށަހެޅުއްވީ ޕީޕީއެމްގެ މެމްބަރު އައްޑޫ ހުޅުދޫ ދާއިރާގެ މެމްބަރު މުހައްމަދު ޝާހިދު (ޝާޑު)އެވެ. އެ ބިލް ފާސްކޮށްފައި ވަނީ މި މަހުގެ ހަތަރު ވަނަ ދުވަހު އޮތް ރައްޔިތުންގެ މަޖިލީހުގެ ފުރަތަމަ ދައުރުގެ ފަސް ވަނަ ޖަލްސާގައެވެ.
އަންގާރު ދުވަހު ގެޒެޓް ކުރެވުނު އިސްލާހާ އެކު، އިންތިހާބުތަކާ ބެހޭ ގާނޫނުގެ 51 ވަނަ މާއްދާގެ ހ އާ އެއްގޮތްވާ ގޮތުގެމަތިން ވޯޓު ކަރުދާހުގައި އެމީހަކަށް ފެންނަ ކެންޑިޑޭޓެއްގެ ނަމާ ދިމާގައި ރަނގަޅު ފާހަގަ ޖެހުމުގެ އިތުރުން، އިތުރު އެހެން ފާހަގައެއް ޖަހާފައިވާ ނުވަތަ ލިޔުމެއް ލިޔެފައިވާ ނުވަތަ ކުރެހުމެއް ކުރަހާފައިވާ ވޯޓޯ ބާތިލްވާނެއެވެ.
އަންނަ މަހުގެ ހަ ވަނަ ދުވަހު ބާއްވާ ރައްޔިތުންގެ މަޖިލީހުގެ އިންތިހާބުގައި ވޯޓު ކަރުދާހުގައި ހުންނަ ސެކިއުރިޓީ ފީޗާގެ އިތުރުން ޔަގީން ކުރުމެއް ހިމެނުމަށް އިލެކްޝަން ކޮމިޝަންގެ ފަރާތުން ކޮންމެ ވޯޓު ކަރުދާސް ކޮޅެއް ތައްގަނޑެއް ޖަހާނެ ކަމަށް އެ ކޮމިޝަންގެ ރައީސް އަހްމަދު ޝަރީފް ވަނީ ވިދާޅުވެފައެވެ. ހާއްސަ ތައްގަނޑެއް ޖެހުމުގެ ބޭނުމަކީ ވޯޓު ފޮއްޓަށް ލާ ވޯޓު ކަރުދާހަކީ ސައްހަ ވޯޓު ކަރުދާހެއްކަން، ވޯޓު ފޮށި ބަލަހައްޓާ މީހާއަށް ފަސޭހައިން ޔަގީންވާނެ ގޮތެއް ހެދުން ކަމަށް އީސީން ވަނީ ބުނެފައެވެ.
