އައްޑޫއަށް ތަރައްގީ ގެނެވޭނީ އެޖެންޑާ 19 އިން: ކެންޑިޑޭޓުން
8 މާރިޗު 2019 | ހުކުރު 20:59އައްޑޫގައި 800އަށް ވުރެ ގިނަ ބެޑް ތަރައްގީ ކުރެވޭނީ އެޖެންޑާ 19 އިން: ޝަރީފް
އައްޑޫ ސިޓީ ހުޅުދޫ ދާއިރާ އަށް ވާދަ ކުރައްވާ އިލްޔާސް (ކ) އާއި ފޭދޫ ދާއިރާ އަށް ވާދަކުރާއްވާ ނިހާދު (މ) އިތުރުން މަރަދޫ ދާއިރާގެ މެމްބަރު މުހައްމަދު ޝަރީފް
އައްޑޫ ސިޓީއަށް ތަރައްގީ ގެނެވޭނީ އެމްޑީޕީން ކުރިއަށް އޮތް މަޖިލީހަށް ހުށަހަޅަން ހަމަޖެހިފައިވާ ''އެޖެންޑާ 19'' އިން ކަމަށް އެމްޑީޕީގެ ފަރާތުން ރައްޔިތުންގެ މަޖިލީހަށް ކުރިމަތިލާފައިވާ އައްޑޫ ސިޓީގެ ކެންޑިޑޭޓުން ވިދާޅުވެއްޖެއެވެ.
އެމްޑީޕީގެ އައްޑޫ ސިޓީ ކެންޑިޑޭޓުންގެ ކެމްޕޭން ލޯންޗު ކުރުމުގެ ހަފްލާގައި ވާހަކަ ދައްކަމުން ހުޅުދޫ ދާއިރާގެ އެމްޑީޕީ ޕްރައިމަރީ ކާމިޔާބު ކުރެއްވި އިލްޔާސް ލަބީބު ވިދާޅުވީ، ރިޔާސީ އިންތިހާބަށް އެމްޑީޕީން ނުކުތީ މުޅި ރާއްޖެ ބަދަލުކޮށްލާ ފަދަ މެނިފެސްޓޯއަކާ އެކު ކަމަށެވެ. އަދި އެ މެނިފެސްޓޯއަކީ އެތައް ކަންތަކެއް ބެލުމަށް ފަހު ހަދާފައިވާ މެނިފެސްޓޯ އެއް ކަމަށް އޭނާ ވިދާޅުވިއެވެ.
''އަޅުގަނޑުމެން މި މަޖިލީހަށް ގޮސް ކުރަން އުޅޭ ކަމުގެ ވާހަކަ އަޅުގަނޑުމެން މި ދައްކަނީ. އެކަން ކުރަމުށް އަޅުގަނޑު ހުޅުދޫ ދާއިރާއިން ރައްޔިތުންގެ މަޖިލީހަށް އެމްޑީޕީ ޓިކެޓްގައި ނިކުމެ މިހިރީ. އެޖެންޑާ 19 ގައި ހިމެނިފައިވަނީ މުޅި ހުޅުދޫގެ ތަރައްގީ،'' އިލްޔާސް ވިދާޅުވިއެވެ.
އިލްޔާސް ވިދާޅުވީ، އެ ތަރައްގީ ވަނީ 19 ވަނަ ގާނޫނީ އޮނިގަނޑު ތެރޭގައި ހިމެނިފައި ކަމަށެވެ. އެގޮތުން އެޖެންޑާގައި ހިމެނޭ ބައެއް ކަންކަމުގެ ތަފްސީލު އިލްޔާސް ވަނީ ދެއްވާފައެވެ.
ފޭދު ދާއިރާގެ ކެންޑިޑޭޓް މުހައްމަދު ނިހާދު ވިދާޅުވީ، އެމްޑީޕީގެ ފަރާތުން ރައްޔިތުންގެ މަޖިލީހަށް ކުރިމަތިލައްވާފައިވާ ހަތް ކެންޑިޑޭޓުން ނުކުމެ ތިބި އައްޑޫ ރައްޔިތުންގެ ހައްގުގައި ކަމަށެވެ. އަދި ހަމައެއާ އެކު ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ އެޖެންޑާ ތަންފީޒުކޮށް އައްޑޫ ރައްޔިތުންނާ ހަމަޔަށް ޖަޒީރާ ރާއްޖޭގެ މެނިފެސްޓޯ ގެނެސްދޭނެ ކަމުގެ ޔަގީންކަން ނިހާދު ވަނީ ދެއްވާފައެވެ.
''މި އެޖެންޑާ 19 ނިމިގެންދާއިރުގައި އެޖެންޑާ 19ގެ ތެރެއިން ތިބޭފުޅުންނަށް އަޅުގަނޑު ގެނެސްދޭނެ ކަމުގެ ޔަގީންކަން މި އަރުވަނީ، ތަރައްގީގެ އިންގިލާބެއް,'' އޭނާ ވިދާޅުވިއެވެ.
އައްޑޫ މަރަދޫ ދާއިރާގެ ރައްޔިތުންގެ މަޖިލީހުގެ މެމްބަރު އިބްރާހިމް ޝަރީފް (މަވޯޓާ ޝަރީފު) ވިދާޅުވީ، އެޖެންޑާ 19 އަކީ އައްޑޫ ރައްޔިތުންގެ ހައްގު ހިމާޔަތްކޮށް ތަރައްގީ ގެނެސްދޭނެ އެޖެންޑާ ކަމަށެވެ.
''މި އަތޮޅުގައި 800 އަށް ވުރެ ގިނަ ބެޑް ތަރައްގީ ކުރާނެ އެޖެންޑާ. މަރަދޫގައި ނުހިއްކި އޮތް ބިން ހިއްކާ ރައްޔިތުންނަށް ގޮތި ގެދޮރު ބޯހިޔާވަހިކަން ހޯދައިދޭނެ އެޖެންޑާ. މިރަށުގެ މަސްވެރިން ގާތުން މަސްވިއްކާ މަހަށް ހެޔޮ އަގު ހޯދައިދޭނެ އެޖެންޑާ. މިއޮތް ބަނދަރުގައި ރައްޔިތުން އެދޭ ގޮތަށް ތާރު އަޅައިދޭނެ އެޖެންޑާ'' ޝަރީފް ވިދާޅުވިއެވެ.
