މިނިސްޓަރު މާރިޔާގެ އިތުބާރު ނެތް ކަމުގެ މައްސަލަ މަޑުޖައްސާލައިފި

ސުޕްރީމް ކޯޓުން އަންގާފައިވާ ގޮތަށް އިތުބާރު ނެތް ކަމުގެ މައްސަލަތަކުގައި އަމަލު ކުރާނެ ގޮތް، މަޖިލީހުގެ ގަވާއިދުގައި ހިމަނާފައި ނެތުމުން، ޑިފެންސް މިނިސްޓަރު މާރިޔާ އަހުމަދު ދީދީގެ އިތުބާރު ނެތް ކަމުގެ މައްސަލަ ކުރިއަށް ނުގެން ގޮސް، މަޑުޖައްސާލައިފިއެވެ.

ރައްޔިތުންގެ މަޖިލީހުގެ ބުދަ ދުވަހުގެ ޖަލްސާ ނިންމަވާލައްވަމުން ރިޔާސަތުގައި އިންނެވި މަޖިލީހުގެ ރައީސް ގާސިމް އިބްރާހިމް ވިދާޅުވީ ސުޕްރީމް ކޯޓުން ހުކުމް ކޮށްފައިވާ ގޮތަށް މަޖިލީހުގެ ގަވާއިދު އިސްލާހުކޮށްފައި ނުވާ ކަމަށެވެ. މަޖިލީހުގެ ގަވާއިދަށް އެ އިސްލާހު ގެނެސް މަޖިލީހުގެ ތަޅުމަށް ފޮނުވައި ފާސްކުރުމުން، މިނިސްޓަރު މާރިޔާގެ އިތުބާރު ނެތް ކަމުގެ މައްސަލަ އެޖެންޑާ ކުރައްވާނެ ކަމަށް ގާސިމް ވިދާޅުވިއެވެ.

"ސުޕްރީމް ކޯޓުން ނިންމަވާފައިވާ ހުކުމެއްގައި އެބަ އޮވޭ، އިންޕީޗުމަންޓުގެ އުސޫލުން ކަންތައްތަކެއް ގެންދަންޖެހޭނެ ވާހަކަ. މަޖިލީހުގެ ގަވާއިދުގައި އެބައި އަދި ހިމެނިފައި ނުވާތީ އިދާރީ ބޭފުޅުން ލައްވައި އެ ގަވާއިދު އަޅުގަނޑު މަޖިލީހުގެ ގަވާއިދަށް އިތުރު އެބޭފުޅުން ލައްވައި އިންޕީޗުމަންޓުގެ ބައި ގަވާއިދަށް އިތުރު ކުރުމަށް މަސައްކަތް ކުރަމުންދާ ވާހަކަ ވެސް ދަންނަވާލަން. އިސްލާހު ލިބުމުން ކޮމެޓީއަށް ފޮނުވައި، އެ ހިސާބުން މަޖިލީހުގެ ޖަލްސާއަކަށް އަޅުގަނޑު ދަންނަވާނަން،" ގާސިމް ވިދާޅުވިއެވެ.

އިންޑިއާ ބޭނުންވެއްޖެނަމަ، ރާއްޖެ "ހިފިދާނެ ކަމަށް" އެ ގައުމުގެ މީޑިއާއަކަށް ދެއްވި އިންޓަވިއުއެއްގައި މާރިޔާ ވިދާޅުވި ކަމަށް ބުނެ، ޕީޕީއެމްގެ 14 މެމްބަރަކު ސޮއި ކުރައްވައި މިނިސްޓަރު މާރިޔާގެ އިތުބާރު ނެތް ކަމުގެ މައްސަލަ މަޖިލީހަށް ހުށަހެޅީ މިދިޔަ މަހުގެ 25 ވަނަ ދުވަހުއެވެ.

ގާނޫނުއަސާސީގައި ބުނެފައި ވަނީ ރައްޔިތުންގެ މަޖިލީހުގެ މަދުވެގެން 10 މެމްބަރުން، ސަބަބު ބަޔާންކޮށް، ސޮއިކޮށް ހުށަހަޅާ ހުށަހެޅުމަކުން ވަޒީރުންގެ މަޖިލީހުގެ މެމްބަރެއްގެ އިތުބާރު ނެތް ކަމުގެ ވޯޓެއް ނެގުމަށް ހުށަހެޅިދާނެ ކަމަށެވެ. އަދި އެ މައްސަލައިގެ ބަހުސް ފެށުމުގެ 14 ދުވަސް ކުރިން އެ ވަޒީރަކަށް އެކަން އަންގަންވާނެ ކަމަށާއި ޖަވާބުދާރީވުމަށް ފުރުސަތު ދޭންޖެހޭނެ ކަމަށް ގާނޫނުއަސާސީގައި ބުނެފައިވެއެވެ.

ވަޒީރެއްގެ އިތުބާރު ނެތް ކަމަށް ފާސްވާނީ މަޖިލީހުގެ ޖުމްލަ މެމްބަރުންގެ އަގުލަބިއްޔަތު ކަމަށްވާ، 43 މެމްބަރުންގެ ވޯޓު ލިބިގެންނެވެ.

މަޖިލީހަށް އިތުބާރު ނެތް ކަމުގެ މައްސަލައެއް ހުށަހެޅުމުން އަމަލު ކުރާނެ ގޮތް ސުޕްރީމް ކޯޓުން 2017 ވަނަ އަހަރުގެ މެއި މަހުގެ 22 ވަނަ ދުވަހު ކުރި ހުކުމެއްގައި ވަނީ ކަނޑައަޅާފައެވެ. އެ ހުކުމްގައި ބުނެފައި މަޖިލީހުން ނަގާ އިތުބާރު ނެތްކަމުގެ ވޯޓުތަކަކީ އެކަށީގެންވާ ސަބަބުތަކެއް އޮވެގެން ނަގާ ވޯޓަކަށް ވާންޖެހޭނެ ކަމަށާއި އިތުބާރު ނެތް ކަމަށް މަޖިލީހުން ފާސްކުރިޔަސް އެކަމުގައި ފަހުގެ ނިންމުން ނިންމާނީ ސުޕްރީމް ކޯޓުން ކަމަށް އެ ހުކުމްގައިވެއެވެ.

އެގޮތުން ރައީސުލްޖުމްހޫރިއްޔާ އާއި ރައީސުލްޖުމްހޫރިއްޔާގެ ނައިބާއި ވަޒީރުންނާއި ފަނޑިޔާރުން އަދި މިނިވަން މުއައްސަސާތަކުގެ މެމްބަރުންގެ އިތުބާރު ނެތްކަމުގެ ވޯޓުތަކުގައި ވެސް މަޖިލީހުން ނިންމާ ނިންމުންތަކަށް ފަހު ބަސް ބުނާނީ ވެސް ސުޕްރީމް ކޯޓުން ކަމަށް ހުކުމްގައިވެއެވެ.

ސުޕްރީމް ކޯޓުގައި އޭރު ތިއްބެވި ފަސް ފަނޑިޔާރުންގެ އިއްތިފާގުން ކުރެއްވި ހުކުމްގައި ބުނެފައި ވަނީ އިތުބާރު ނެތް ކަމުގެ މައްސަލަތައް މަޖިލީހުން ކުރިއަށް ގެންދަން ވާނީ ގާނޫނުއަސާސީގައި ބަޔާންވެފައިވާ އުސޫލުތަކާ ހިލާފުނުވާނެ ގޮތަށް އިންޕީޗްމަންޓެއްގެ އުސޫލުން ކަމަށެވެ. އަދި އެ އުސޫލު ވާންޖެހޭނީ ވެރިކަން ހިންގުމުގެ ބާރާއި އަދުލު އިންސާފު ގާއިމުކުރުމުގެ ބާރުގެ މަސްއޫލިއްޔަތުތަކާއި ބާރުތަކާއި އިހްތިޔާރުތަކަށް ހުރަސް އެޅުމެއް ނެތި ދައުލަތުގެ ތިން ބާރުގެ ތެރެއިން ކޮންމެ ބާރަކުން ވެސް އެ ބާރަކާ ހަވާލުވެފައިވާ މަސްއޫލިއްޔަތުތައް އެއްވެސް ނުފޫޒަކާ ނުލައި އަދާ ކުރަމުން ގެންދިއުން ކަށަވަރު ކޮށްދޭ ގޮތެއްގެ މަތިން ހަދާ އުސޫލަކަށް ކަމަށެވެ.