އިސްކަންދަރު ސްކޫލުގެ ޕޯސްޓް އެވޯޑިން ސެރަމޮނީ ބާއްވާއިފި
5 މާރިޗު 2019 | އަންގާރަ 05:09މި އަހަރަށް ހޮވުނު ޕްރިފެކްޓަރުންނަށް ވަނީ މަގާމު ހަވާލުކޮށްފައި
އިސްކަންދަރު ސްކޫލުގެ ޕޯސްޓް އެވޯޑިން ސެރަމޮނީގެ ތެރެއިން
އިސްކަންދަރު ސްކޫލުގެ މި އަހަރުގެ ޕޯސްޓް އެވޯޑިން ސެރެމޮނީ ބާއްވައިފިއެވެ.
އަންގާރާ ދުވަހު ހެނދުނު ބޭއްވި އެ ސްކޫލުގެ އެވޯޑިން ސެރެމޮނީގައި ގްރޭޑް އަށެއް، ނުވައެއްގެ އިތުރުން ގްރޭޑް 10ގެ މި އަހަރަށް ހޮވުނު ޕްރިފެކްޓަރުުންނަށް ވަނީ ޕްރިފެކްޓް ކަމުގެ ސެޓްފިކެޓް ހަވާލުކޮށްފައެވެ. އަދި މީގެ އިތުރުން އިސްކަންދަރު ސްކޫލުގެ ކްލަބްތަކުގެ މަގާމުތަކަށް ދަރިވަރުން ވަނީ ހޮވާފައެވެ.
ގްރޭޑް އަށެއްގެ ޕްރިފެކްޓަރުކަން 20 ދަރިވަރުންނަށް ދީފައިވާއިރު ގްރޭޑް ނުވައެއްގެ 16 ދަރިވަރުންނަށް ވަނީ ޕްރިފެކްޓް ކަން ލިބިފައެވެ. ގްރޭޑް 10ގެ 25 ދަރިވަރުންނަށް ޕްރިފެކްޓަރުކަން ވަނީ ދީފައެވެ. މީގެ އިތުރުން އެ ސްކޫލުގެ އިންގްލިޝް ކްލަބް، ސްޓެމް ކްލަބް، ފިޓްނެސް ކްލަބް، ބިސްނަސް ކްލަބްގެ އިތުރުން އެހެން ކްލަބްތަކުގެ މަގާމުތަކަށް ދަރިވަރުން ވަނީ އައްޔަކޮށްފައެވެ.
އިސްކަންދަރު ސްކޫލުގެ މި އަހަރުގެ ކެޕްޓަން އަށް އައްޔަންކޮށްފައި ވަނީ މުހައްމަދު ޒައުލް އަޒްމީލްއެވެ. ސްކޫލުގެ އެކްޓިވިޓީސް ކެޕްޓަންގެ މަގާމު ލިބުނީ ޝަދްހަ އަބްދުލް ވާހިދުއަށެވެ.
އިސްކަންދަރުގެ ސްކޫލުގެ ޓީޗަރުންނާއި އެޑިއުކެޝަން މިނިސްޓްރީގެ އިސް ބޭފުޅުން ބައިވެރިވެވަޑައިގަތް މި ހަފްލާ ޝަރަފްވެރި ކޮށްދެެއްވީ، އެޑިއުކޭޝަން މިނިސްޓަރީގެ ސްޓޭޓް މިނިސްޓަރު ޑރ. އަބްދުﷲ ރަޝީދުއެެވެ. މި ރަސްމިއްޔާތުގައި ވާހަކަ ދައްކަމުން ޑރ. ރަޝީދު ވިދާޅުވީ، އިސްކަންދަރު ސްކޫލަކީ ރާއްޖޭގެ އެންމެ ރަނގަޅު އެއް ސްކޫލު ކަމަށާއި، އެ ސްކޫލުން ވަންނަ ބޭނުންވެގެން ކޮންމެ އަހަރަކުވެސް ގިނަ ކުދިންތަކެއް ސްކޫލުގެ ޕްލެސްމެންޓް ހޯދުމަށް މަސައްކަތް ކުރާ ކަމަށެވެ.
މީގެ އިތުރުން ރަޝީދު ވިދާޅުވީ، މިއަދު މަގާމުތައް ހަވާލުކުރެވުނު ދަރިވަރުން ސްކޫލު ނިމިގެން ވަޒީފާގެ މައިދާނަށް ނިކުންނައިރު އެ ދަރިވަރުންގެ ސީވީއަށް އޭގެ ސަބަބުން އިތުުރު ފުރިހަމަ ކަމެއް ލިބިގެންދާނެ ކަމަށެވެ. ހުރިހާ ދަރިވަރުންވެސް މަސައްކަތް ކުރަން ޖެހޭނީ މި އަހަރަކީ ކާމިޔާބު އަހަރަކަށް ހެދުމަށް ކަމަށް މަޖީދިއްޔާ ސްކޫލުގގެ ކުރީގެ ޕްރިންސިޕަލް ޑރ. ރަޝީދު ވިދާޅުވިއެވެ.
