ޕްރައިމަރީން ބަލިވި 4 ކެނޑިޑޭޓަކު އިންތިޚާބުގައި ވާދަކުރޭ: އީސީ
5 މާރިޗު 2019 | އަންގާރަ 02:32ޕްރައިމަރީގައި ވާދަކޮށް ބަލިވި ފަރާތްތަކުން ވާދަ ކުރާނަމަ ފިޔަވަޅު އަޅާނެކަމަށް ނަޝީދު ވިދާޅުވި
ޕްރައިމަރީން ބަލިވި ކެނޑިޑޭޓުންގެ ތެރެއިން ވާދަކުރާ ބައެއް ބޭފުޅުން
މަޖިލިސް އިންތިހާބުގެ ޕްރައިމާގައި ވާދަކޮށް ބަލިވި ހަތަރު ކެންޑިޑޭޓަކު އިންތިހާބުގައި ވާދަކުރާ ކަމަށް އިލެކްޝަންސް ކޮމިޝަނުން ބުނެފި އެވެ.
ރާއްޖެއެމްވީއަށް މައުލޫމާތު ދެއްވަމުން އިލެކްޝަންސް ކޮމިޝަންގެ މެންބަރު އަހުމަދު އަކުރަމް ވިދާޅުވީ، ޕްރައިމަރީން ބަލިވި ފަރާތްތަކުގެ ތެރެއިން އިންތިޚާބުގައި ވާދަކުރައްވާ ފަރާތްތަކަކީ، ހިތަދޫ އުތުރު ދާއިރާއަށް އަހުމަދު މުހައްމަދު، ހެންވޭރު ދެކުނު ދާއިރާއަށް މުހައްމަދު އަބްދުލްކަރީމް، އިހަވަންދޫ ދާއިރާއަށް ވާދަކުރާ މުހައްމަދު އަބްދުﷲ އާއި ކާށިދޫ ދާއިރާއަށް ވާދަކުރައްވާ އަބްދުﷲ ޖާބިރު ކަމަށެވެ.
ސުޕްރީމް ކޯޓުގެ ހުކުމާއެކު ކުރީގެ ރައީސް މުހައްމަދު ނަޝީދު ވިދާޅުވެފައި ވަނީ އެމްޑީޕީ ޕްރައިމަރީގައި ވާދަކޮށް ބަލިވި ފަރާތްތަކުން ވާދަ ނުކުރާނެ ކަމަށް އުއްމީދު ކުރައްވާ ކަމަށެވެ. އަދި އެގޮތަށް ވާދަކޮށްފިނަމަ އެ ފަރާތަކާއި މެދު ފިޔަވަޅު އަޅާނެ ކަމަށްވެސް އެމަނިކުފާނު ވިދާޅުވިއެވެ. އެހެންނަމަވެސް އަޅާނީ ކޮންކަހަލަ ފިޔަވަޅެއްކަމެއް އެއްވެސް ޕާޓީއަކުން މިހާތަނަށް އަދި ހާމައެއް ނުކުރެއެވެ.
ޕްރައިމަރީން ބަލިވުމުން، އަމިއްލަ ގޮތުން އިންތިޚާބުގައި ވާދަކުރެއްވުމަކީ ޕާޓީއަށް ވެވޭ ބޮޑު ބޭވަފާތެރިކަމެއް ކަމަށް ވެސް އެ މަނިކުފާނު ވަނީ ވިދާޅުވެފަ އެވެ.
ޕްރައިމަރީން ބަލިވާ ފަރާތްތަށް މަޖިލިސް އިންތިހާބުގައި ވާދަނުކުރެވޭނެ ކަމަށް ބުނާ މާއްދާ ބާތިލް ކުރަން ސުޕްރީމް ކޯޓަށް ހުށަހެޅީ ކާށިދޫ ދާއިރާއަށް ވާދަކުރައްވާ އަބްދުﷲ ޖާބިރު ޕްރައިމަރީން ބަލިވުމުންނެވެ. ސުޕްރީމް ކޯޓުން ވަނީ ޖާބިރާ އެއްކޮޅަށް ހުކުމްކޮށް ސިޔާސީ ޕާޓީތަކުގެ ގާނޫނުގެ 10 ވަނަ މާއްދާ ބާތިލް ކުރި އެވެ.
