"އެހެން އެއްވެސް ކަމެއް ނުކޮށް، ރެއާ ދުވާލު މަސައްކަތްކޮށްގެން މާސްޓާސް ޑިގްރީއެއް އަޅުގަނޑުމެންނަށް ލިބުނީ. އެކަމަކު މިހާރު މި ފެންނަނީ ހަފްތާ ބަންދުގައި ކޮންމެ ވެސް ތަނަކަށް ގޮސްލާފައި، އިތުރު މާ ބޮޑު މަސައްކަތެއް ނުކުރިޔަސް، ހަމަ މާސްޓަރސް ޑިގްރީއެއް ހިފައިގެން ނުކުންނަތަން،"

މެދު ނުކެނޑި 33 އަހަރު ވަންދެން ރާއްޖޭގެ ތައުލީމީ ދާއިރާއަށް ހިދުމަތް ކުރައްވަމުން ގެންދަވާ އިބްރާހިމް އިސްމާއިލްގެ ވާހަކަ ފެށީ މި ހިސާބުންނެވެ.

ރާއްޖޭގެ ތައުލީމީ ދާއިރާއިން ނާޖައިޒު ފައިދާތަކެއް ހޯދައި، ސެޓްފިކެޓްތަކެއް ބަޔަކު ހޯދަމުންދާ ވާހަކައެވެ. މި ވާހަކަތައް އިބްރާ "ރާއްޖެއެމްވީ"އާ ހިއްސާ ކުރެއްވީ ކޮލެޖުތަކާއި ޔުނިވާސިޓީތަކުގައި ދަރިވަރުންނަށް ކިޔަވައިދޭންޖެހޭ ވަގުތު ހަމަނުކޮށް، ބްލޮކް މޯޑް ނަމުގައި ކިޔަވައި ދެމުންދާތީ، އެކަން ހުއްޓުވުމަށް މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ)އިން ނެރުނު ސާކިއުލަރއާ ގުޅިގެންނެވެ. އެ އޮތޯރިޓީން އެ ސާކިއުލާ ނެރުނީ ތައުލީމީ ޕްރޮގްރާމްތަކުގެ ފެންވަރު ހިފެހެއްޓުމަށާއި ދަރިވަރުންގެ ހައްގުތައް ރައްކާތެރި ކުރުމަށްޓަކައެވެ.

އެމްކިޔޫއޭގެ އެ ނިންމެވުމަށް މަރުހަބާ ވިދާޅުވެ، އެޑިއުކޭޝަން މިނިސްޓްރީގެ އިސް މަގާމުތަކެއް ފުރުއްވެވި އިބްރާ ވިދާޅުވީ އެ ފިޔަވަޅު އެ އޮތޯރިޓީން އެޅީ ތައުލީމީ ދާއިރާގައި މަސައްކަތް ކުރަމުންދާ މީހުން އެ ވާހަކަ ދައްކަމުންދާތާ އެތައް ދުވަހެއް ވީ ފަހުން ކަމަށެވެ.

"އެމްކިޔޫއޭއިން މި ފިޔަވަޅު އެޅުއްވި ކަމަށްޓަކާ ވަރަށް ބޮޑަށް މަރުހަބާ ކިޔަން. އަޅުގަނޑުމެން މި ވާހަކަ، ތައުލީމީ ދާއިރާގައި މަސައްކަތް ކުރަން މިތިބަ މީހުން ކިތަންމެ ދުވަހެއް ވެއްޖެ މި ވާހަކަ ދައްކާތާ،" އިބްރާ ވިދާޅުވިއެވެ.

އެމްކިޔޫއޭ އިން ބުދަ ދުވަހު ނެރެފައިވާ ސާރކިއުލާގައި ބުނެފައި ވަނީ ފުލްޓައިމްކޮށް ހިންގުމަށް ހުއްދަ ދީފައިވާ ޕްރޮގްރާމްތައް ރާއްޖޭގެ ގައުމީ ސަނަދުގެ އޮނިގަނޑުގައިވާ ފުލްޓައިމް މިންގަނޑަށް ނުފެތޭ ގޮތް ގޮތަށް, ބްލޮކް މޯޑް ކިޔަމުންދާ ކަމުގެ ޝަކުވާތައް ވެސް އެ އޮތޯރިޓީއަށް ލިބެމުންދާ ކަމަށެވެ. ފުލްޓައިމް ޕްރޮގްރާމެއް ހިންގުމަށް ކަނޑައަޅާފައިވާ ގަޑި ހަމަނުކޮށް ކޯސްތައް ހިންގުމަކީ ދީފައިވާ ހުއްދައާ ޚިލާފް ކަމެއް ކަމުގައި ވާތީ ހުއްދަ ދީފައިވާ ގޮތާ ޚިލާފަށް ހިންގާ ޕްރޮގްރާމްތައް އެމްކިއުއޭއިން ގަބޫލު ނުކުރާނެ ކަމަށް އެ އޮތޯރިޓިން ބުންޏެވެ. އަދި ރާއްޖޭގެ މަތީ ތައުލީމު ދޭ މަރުކަޒްތަކުގައި ކިޔަވައި ދިނުމަށް ހުއްދަ ދީފައި ވާނީ ދުނިޔޭގެ އެހެން ގައުމުތަކުގައި ވެސް ގަބޫލުކުރާ ދެ ވައްތަރު ކަމުގައި ވާ "ފުލްޓައިމް" އާއި "ޕާރޓް ޓައިމް" ޕްރޮގްރާމް ހިންގުމަށް ކަމަށް އެމްކިޔޫއޭއިން ބުންޏެވެ.

ރާއްޖޭގެ ތައުލީމަށާއި ޑިމޮކްރަސީ އާއި އިންސާނީ ހައްގުތަކަށް ކުރެއްވި މަސައްކަތާ ގުޅިގެން، އޮސްޓްރޭލިއާގެ ޔުނިވާސިޓީ އޮފް ކެމްބެރާއިން ޑިސްޓިންގުއިޝްޓް އެލަމްނައިން ހޯއްދަވާފައިވާ އިބްރާ ވިދާޅުވީ ބޮލޮކް މޯޑަށް ކިޔަވާ ދިނުން ނުހުއްޓުވާނަމަ، ދެ ގެއްލުމެއް ލިބޭނެ ކަމަށެވެ.

"ކަރުދާސްކޮޅެއް އަތަށް ލިބުނު ކަމުގައިވިޔަސް، އެއްޗެއް އެނގިފައެއް ނޫން ތިބޭނީކީ. ހުނަރު ދަސްވެފައެއް ނޫން ތިބޭނީކީ. މަސައްކަތުގެ މާހައުލަށް ނުކުތީމަ، ނުވަތަ އެއަށްވުރެ މަތީ ފަންތިއަށް ކިޔަވަން ނުކުތީމަ، ދަތިތަކާ ކުރިމަތިވާނެ... ދިވެހިރާއްޖޭގެ ތަންތަނުން ދޫކުރާ ސަނަދުތަކަކީ ދުނިޔޭގެ އެހެން ތަންތަނުން ގަބޫލު ނުކުރާ އެއްޗެއްސަށް އިސާކިތަކު ވެދާނެއޭ، މިކަންކަމަށް ފިޔަވަޅު ނޭޅުނިއްޔާ،" އިބްރާ ވިދާޅުވިއެވެ.

ބްލޮކް މޯޑަށް ކިޔަވައި ދިނުމަކީ މަނާ ކަމެއް ކަމަށް އެމްކިއުއޭއިން ކަނޑައަޅައި, އެކަން ނުކުރުމަށް އެންގިއިރު ދައުލަތުން ހަރަދުކޮށްގެން ހިންގާ ގައުމީ ޔުނިވާސިޓީގައި ވެސް މިހާރު ވެސް ދަނީ ބްލޮކް މޯޑަށް ކިޔަވަދެމުންނެވެ. އަދި ރާއްޖޭގެ އަމިއްލަ ކޮލެޖުތަކުގައި ބްލޮކް މޯޑުގެ ނަމުގައި، ވަގުތު ހަމަނުކޮށް، މާސްޓާސްއަށް ވެސް ދަނީ ކިޔަވައިދެމުންނެވެ. އެމްކިއުއޭގެ ނިންމުމަށް ޔުނިވާސިޓީއަކުން ވެސް އަދި ކޮލެޖަކުން ވެސް އެއްޗެއް ބުނެފައިނުވާއިރު، ދަރިވަރުން ސަލާމުވެ، ރައްކާތެރިވާންވީ އެމްކިއުއޭގެ މިންގަނޑަށް ނުފެތޭ ގޮތަށް ކިޔަވައިދީގެން ދޫކުރާ ސެޓްފިކެޓުތައް އެމްކިއުއޭއިން އެކްރެޑިޓް ނުކުރާނެ ކަމެވެ.