ޕްރިމިއާ ލީގުގައި މެންޗެސްޓާ ޔުނައިޓެޑާއި، ލިވަޕޫލް އަދި މެންޗެސްޓާ ސިޓީންވެސް މަގާމު ދަމަހައްޓައިފިއެވެ.

ބުދަ ދުވަހުގެ ރޭ ކުޅުނު މެޗު ކްރިސްޓަލް ޕެލަސްއާ ވާދަކޮށް ޔުނައިޓެޑުން ކާމިޔާބުކުރީ 1-3 ގެ ނަތީޖާއަކުންނެވެ.

ޔުނައިޓެޑު ދަނޑުގައި ކުޅުނު މި މެޗު ފެށިގެން ފުރަތަމަ ލަނޑު ޖަހާ ލީޑު ނެގީ ޔުނައިޓެޑުންނެވެ. މި ލަނޑު 33 ވަނަ މިނެޓުގައި ލޫކް ޝޯގެ އެހީތެރިކަމާ އެކު ކާމިޔާބުކުރީ ރޮމެލޫ ލުކާކޫއެވެ.

ދެވަނަ ހާފް ފެށިގެން ޔުނައިޓެޑުން ވަނީ ލީޑު ފުޅާކޮށްފައެވެ. މި ލަނޑު ލިންޑެލޮފްގެ އެހީތެރިކަމާއެކު ކާމޔާބުކުރީ ލުކާކޫއެވެ. ނަމަވެސް 66 ވަނަ މިނެޓުގައި ވާޑްގެ ލަނޑާއެކު ޕެލަސްއިން ވަނީ ނަތީޖާގެ ފަރަގު ކުޑަކޮށްފައެވެ.

ޔުނައިޓެޑުގެ ތިންވަނަ ލަނޑު 83 ވަނަ މިނެޓުގައި ކާމިޔާބުކުރީ އޭޝްލީ ޔަންގްއެވެ. މި ލަނޑު އޭނާ ކާމިޔާބުކުރީ ޕައުލް ޕޮގްބާގެ އެހީތެރިކަމާއެކުގައެވެ.

މި ނަތީޖާއާ އެކު ޔުނައިޓެޑު އޮތީ ކުޅުނު 28 މެޗުން ލިބުނު 55 ޕޮއިންޓާއެކު ޕޮއިންޓް ތާވަލުގެ ފަސްވަނައިގައެވެ. މެޗުން ބަލިވި ކްރިސްޓަލް ޕެލަސް އޮތީ ކުޅުނު 28 މެޗުން ލިބުނު 30 ޕޮއިންޓާ އެކު ޕޮއިންޓް ތާވަލުގެ 14 ވަނައިގައެވެ.

ބުދަ ދުވަހުގެ ރޭ ކުޅުނު މެޗުން ލިވަޕޫލް މޮޅުވީ ވަޓްފޯޑްއާ ވާދަކޮށް 0-5 ގެ ނަތީޖާއަކުންނެވެ.

ލިވަޕޫލް ދަނޑުގައި ކުޅުނު މި މެޗު ފެށިގެން ފަސްވަނަ މިނެޓުގައި އެޓީމުން ވަނީ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ އެލެގްޒެންޑްރާ އާނޮލްޑްގެ އެހީތެރިކަމާ އެކު ސާޑިއޯ މާނޭއެވެ.

މި ލަނޑަށްފަހު ވެސް ލިވަޕޫލްއިން ދިޔައީ މޮޅު ކުޅުމެއް ދައްކަމުންނެވެ. އެގޮތުން 20 ވަނަ މިނެޓުގައި އެޓީމުން ވަނީ ލީޑު ފުޅާކޮށްފައެވެ. މި ލަނޑު ވެސް ކާމިޔާބުކުރީ އާނޮލްޑްގެ އެހީތެރިކަމާ އެކު މާނޭއެވެ.

ދެވަނަ ހާފް ފެށިގެން ލިވަޕޫލުން ވަނީ ތިންވަނަ ލަނޑު ޖަހާފައެވެ. މި ލަނޑު 66 ވަނަ މިނެޓުގައި އެންޑީ ރޮބަޓްސަންގެ އެހީތެރިކަމާ އެކު ކާމިޔާބުކުރީ ޑޭވޮކް އޮރިގީއެވެ.

ލިވަޕޫލްގެ ހަތަރު ވަނަ ލަނޑު 79 ވަނަ މިނެޓުގައި އާނޮލްޑްގެ އެހީތެރިކަމާ އެކު ވެންޑައިކް ކާމިޔާބުކުރިއިރު، ފަސްވަނަ ލަނޑު 82 ވަނަ މިނެޓުގައި ރޮބަޓްސަންގެ އެހީތެރިކަމާ އެކު ކާމިޔާބުކުރީ ވެސް ވެންޑައިކްއެވެ.

މި ނަތީޖާއާ އެކު ލިވަޕޫލް އޮތީ ކުޅުނު 28 މެޗުން ލިބުނު 69 ޕޮއިންޓާއެކު ޕޮއިންޓް ތާވަލުގެ އެއްވަނައިގައެވެ. މެޗުން ބަލިވި ވަޓްފޯޑް އޮތީ ކުޅުނު 28 މެޗުން ލިބުނު 40 ޕޮއިންޓާއެކު ޕޮއިންޓް ތާވަލުގެ އަށް ވަނައިގައެވެ.

ބުދަ ދުވަހުގެ ރޭ ކުޅުނު މެޗުން ސިޓީ މޮޅުވީ ވެސްޓްހޭމް ޔުނައިޓެޑްއާ ވާދަކޮށް 0-1 ގެ ނަތީޖާއަކުންނެވެ.

ސިޓީ ދަނޑުގައި ކުޅުނު މި މެޗުގައި އެ ޓީމުގެ ފަރާތުން ގިނަ ހަމަލާތަކެއް ފެނިގެންދިޔައިރު، ލަނޑު ޖެހުމަށް ވެސް ހުސް ގިނަ ފުރުސަތުތައް އެ ޓީމަށް ވަނީ ލިބި ބޭކާރުވެފައެވެ.

މުޅި މެޗުގައި ވެސް ވެސްޓްހޭމްގެ ފަރާތުން މޮޅު ޑިފެންސެއް ފެނިގެން ގޮސްފައިވާއިރު، އެޓީމުން ވަނީ ސިޓީގެ ގިނަ ހަމަލާތައް ހުށިއާރުކަމާއެކު ދިފާއުކޮށްފައެވެ.

މެޗުގައި ފެނިގެންދިޔަ ހަމައެކަނި ލަނޑު 59 ވަނަ މިނެޓުގައި ކާމިޔާބުކުރީ ސާޖިއޯ އަގުއެރޯއެވެ. މި ލަނޑު އޭނާ ކާމިޔާބުކުރީ އެ ޓީމަށް ލިބުނު ޕެނަލްޓީއަކުންނެވެ. މިއީ އޭނާ ސިޓީ ދަނޑުގައި ކުޅުނު 119 މެޗުގައި ކާމިޔާބުކުރި 96 ވަނަ ލަނޑެވެ.

މި ނަތީޖާއާ އެކު ސިޓީ އޮތީ ކުޅުނު 28 މެޗުން ލިބުނު 68 ޕޮއިންޓާއެކު ޕޮއިންޓް ތާވަލުގެ ދެވަނައިގައެވެ. މެޗުން ބަލިވި ވެސްޓްހޭމް އޮތީ ކުޅުނު 28 މެޗުން ލިބުނު 36 ޕޮއިންޓާއެކު ޕޮއިންޓް ތާވަލުގެ 10 ވަނައިގައެވެ.