ޕްރިމިއާ ލީގުގައި ބޮޑު ތަފާތަކުން އާސެނަލް މޮޅުވިއިރު، ޗެލްސީން ޓޮޓެންހަމް ހޮސްޕާ ބަލިކޮށްފިއެވެ.
ބުދަ ދުވަހުގެ ރޭ ކުޅުނު މެޗުން އާސެނަލް މޮޅުވީ އޭއެފްސީ ބޯންމައުތުއާ ވާދަކޮށް 1-5 ގެ ތަފާތު ބޮޑު ނަތީޖާއަކުންނެވެ. އާސެނަލް ދަނޑުގައި ކުޅުނު މި މެޗު ފެށިގެން ހަތަރުވަނަ މިނެޓުގައި އެޓީމުން ވަނީ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ މެސުތު އޮޒިލްއެވެ.
މި ލަނޑަށް ފަހު ވެސް އާސެނަލްއިން ދިޔައީ މޮޅަށް ކުޅެމުންނެވެ. އެގޮތުން 27 ވަނަ މިނެޓުގައި އާސެނަލް އިން ވަނީ ލީޑު ފުޅާކޮށްފައެވެ. މި ލަނޑު ކާމިޔާބުކުރީ އޮޒިލްގެ އެހީތެރިކަމާ އެކު ހެންރިކް މިކިޓަރިޔާންއެވެ. ނަމަވެސް 30 ވަނަ މިނެޓުގައި ބޯންމައުތުން ވަނީ ނަތީޖާގެ ފަރަގު ކުޑަކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ މޮސެޓްއެވެ.
ފުރަތަމަ ހާފް ނިމުނީ 1-2 ގެ ނަތީޖާއަކުން ބޯންމައުތުގެ މައްޗަށް އާސެނަލް ކުރީގައި އޮވެގެންނެވެ.
This... THIS is a mood rn #ARSBOU pic.twitter.com/mBm1BXJX1A
— Arsenal FC (@Arsenal) February 27, 2019
ދެވަނަ ހާފް ފެށިގެން މާގިނައިރުތަކެއް ނުވަނީސް އާސެނަލް އިން ވަނީ ތިން ވަނަ ލަނޑު ޖަހާފައެވެ. މި ލަނޑު އެ ޓީމަށް ކާމިޔާބުކޮށްދިނީ ލައުރެންޓް ކޮޝިއެލްނީއެވެ.
އާސެނަލްގެ ހަތަރު ވަނަ ލަނޑު 59 ވަނަ މިނެޓުގައި އެމެރިކް އޮބަމަޔަންގް ކާމިޔާބުކޮށްފައިވާއިރު، 78 ވަނަ މިނެޓުގައި އެލެގްޒެންޑްރާ ލަކަޒޭޓް ވަނީ އެ ޓީމުގެ ފަސްވަނަ ލަނޑު ކާމިޔާބުކޮށްފައެވެ.
މި ނަތީޖާއާ އެކު އާސެނަލް އޮތީ ކުޅުނު 28 މެޗުން ލިބުނު 56 ޕޮއިންޓާއެކު ޕޮއިންޓް ތާވަލުގެ ހަތަރުވަނައިގައެވެ. މެޗުން ބަލިވި ބޯންމައުތު އޮތީ ކުޅުނު 28 މެޗުން ލިބުނު 34 ޕޮއިންޓާ އެކު ޕޮއިންޓް ތާވަލުގެ 12 ވަނައިގައެވެ.
Get in there! #CHETOT pic.twitter.com/R5hctkhUDB
— Chelsea FC (@ChelseaFC) February 27, 2019
ބުދަ ދުވަހުގެ ރޭ ކުޅުނު މެޗުން ޓޮޓެންހަމް ބަލިވީ ޗެލްސީއާ ވާދަކޮށް 0-2 ގެ ނަތީޖާއަކުންނެވެ.
ޗެލްސީ ދަނޑުގައި ކުޅުނު މެޗު ފެށިގެން ބޯޅަ ކޮންޓްރޯލްކޮށްގެން ރަނގަޅަށް ކުޅުނީ އެޓީމުންނެވެ. އެގޮތުން އެޓީމުން ވަނީ ޓޮޓެންހަމްގެ ހާފަށް ބާރުބޮޑުކޮށް ގިނަ ހަމަލާތަކެއް އުފައްދާފައެވެ.
މި ހާފްގައި ޓޮޓެންހަމްގެ ފަރާތުން ވެސް ހަމަލާތަކެއް ވަނީ ފެނިގެން ގޮސްފައެވެ. ނަމަވެސް އެ ހަމަލާތަކުގެ ބޭނުން އެޓީމަށް އެންމެ އެދެވޭ ގޮތެއްގައި ހިފިފައެއް ނުވެއެވެ.
ފުރަތަމަ ހާފް ނިމުނީ 0-0 ގެ ނަތީޖާއިން ދެޓީމު އެއްވަރުވެގެންނެވެ.
That feeling! #CHETOT pic.twitter.com/J70jioIySb
— Chelsea FC (@ChelseaFC) February 27, 2019
ނަމަވެސް ދެވަނަ ހާފް ފެށިގެން ޗެލްސީން ވަނީ އެޓީމުގެ އެޓޭކްތައް ވަރުގަދަކޮށްފައެވެ. އެގޮތުން 57 ވަނަ މިނެޓުގައި ޗެލްސީން ވަނީ ލީޑު ނަގާފައެވެ. މި ލަނޑު އަޒްޕިލިކުއެޓާގެ އެހީތެރިކަމާ އެކު ކާމިޔާބުކުރީ ޕެޑްރޯ ރޮޑްރިގޭޒްއެވެ.
މި ލަނޑަށް ފަހު ވެސް ޗެލްސީގެ ފަރާތުން ވަނީ ހަމަލާތަކެއް ފެނިގެން ގޮސްފައެވެ. ނަމަވެސް އެ ހަމަލާތަކުގެ ބޭނުން އެންމެ އެދެވޭ ގޮތެއްގައި އެޓީމަށް ހިފިފައެއް ނުވެއެވެ.
މެޗުގެ ފަހު 10 ވަރަކަށް މިނެޓު ތެރޭގައި ޓޮޓެންހަމްގެ ފަރާތުން ފުލުފުލުގައި ހަމަލާތަކެއް ވަނީ ފެނިގެން ގޮސްފައެވެ. ނަމަވެސް އެ ހަމަލާތައް ގޯލަށް ފޮނުވާލަން އެޓީމަށް ވަނީ އުނދަގޫވެފައެވެ.
މި ނަތީޖާއާއެކު ޗެލްސީ އޮތީ ކުޅުނު 27 މެޗުން ލިބުނު 53 ޕޮއިންޓާއެކު ޕޮއިންޓް ތާވަލުގެ ހަވަނައިގައެވެ. މެޗުން ބަލިވި ޓޮޓެންހަމް އޮތީ ކުޅުނު 28 މެޗުން ލިބުނު 60 ޕޮއިންޓާއެކު ޕޮއިންޓް ތާވަލުގެ ތިންވަނައިގައެވެ.
