އެމްބީއޭ ޗެމްޕިއަންޝިޕް: ރެޑްވިންގސްއާއި ވަން 30 އެސްސީގެ ފަރާތުން ރަނގަޅު ކުޅުމެއް
20 ފެބުރުއަރީ 2019 | ބުދަ 13:31ރެޕްޓޯރސް ބީސީ ކާމިޔާބުކުރީ ރެޑްވިންގްސް ބީސީއާއި ވާދަކޮށް 73 ޕޮއިންޓް 64 ޕޮއިންޓުން
އެމްބީއޭ ޗެމްޕިއަންޝިޕްގެ ތެރެއިން
އެމްބީއޭ ޗެމްޕިއަންޝިޕްގައި އަންގާރަ ދުވަހުގެރޭ ކުޅުނު މެޗު ރެޕްޓޯރސް ބީސީ އާއި ވަން 30 އެސްސީ ކާމިޔާބު ކޮށްފިއެވެ.
އެމްބީއޭ ޗެމްޕިއަންޝިޕްގެ ފިރިހެން ޑިވިޝަންގެ 13 ވަނަ މެޗު ރެޕްޓޯރސް ބީސީ ކާމިޔާބުކުރީ ރެޑްވިންގްސް ބީސީއާއި ވާދަކޮށް 73 ޕޮއިންޓް 64 ޕޮއިންޓުންނެވެ.
މެޗުގެ ފުރަތަމަ ދެ ކުއާޓާގައި ރެޑްވިންގްގެ ފަރާތުން ރަނގަޅު ކުޅުމެއް ފެނިގެން ދިޔައެވެ.
ފުރަތަމަ ކުއާޓާގައި ރެޑްވިންގްސް 13 ޕޮއިންޓް ހޯދިއިރު ރެޕްޓޯރސްއަށް ކާމިޔާބު ކުރެވުނީ 10 ޕޮއިންޓެވެ. ދެވަނަ ކުއާޓާގައި ރެޑްވިންގްސް 15 ޕޮއިންޓް ހޯދިއެވެ. ލީޑް ކުޑަކޮށް ރެޕްޓީރސް ވަނީ މި ކުއާޓާގައި 13 ޕޮއިންޓް ހޯދާފައެވެ.
އެމްބީއޭ ޗެމްޕިއަންޝިޕްގައި ރެޕްޓޯރސް އާއި ރެޑްވިނގްސް މެޗުގެ ތެރެއިން
ފަހު ދެ ކުއާޓާގައި ރެޕްޓޯރސްގެ ކުޅުން ރަނގަޅުކޮށް ރެޑްވިންގްގެ މައްޗަށް ކުރި ހޯދިއެވެ.
ފަހަތުން އަރާ ރެޕްޓޯރސް މެޗު ކާމިޔާބުކުރީ އެ ޓީމުގެ މައާޒް މުހައްމަދު ހޯދައިދިން 23 ޕޮއިންޓުންނެވެ. މެޗުގެ މޮޅު ކުޅުން ތެރިއަކަށްވެސް ހޮވުނީ ރެޕްޓޯރސްގެ މައާޒް މުހައްމަދެވެ.
މުބާރާތުގެ 14 ވަނަ މެޗުގައި ވޮލްވްސްއާއި ވާދަކޮށް ވަން 30 އެސްސީ މެޗު ކާމިޔާބުކުރީ އުނދަގޫކަމާއިއެކުއެވެ.
އާދައިގެ ކުޅުމެއް ދެ ޓީމުގެ ފަރާތުން ފެނިގެންދިޔަ މި މެޗުގެ ފުރަތަމަ ކުއާޓާ ވަން 30 ކާމިޔާބު ކުރީ 16 ޕޮއިންޓުންނެވެ. މި ކުއާޓާގައި ވޮލްވްސްއަށް ކާމިޔާބު ކުރެވުނީ 11 ޕޮއިންޓެވެ.
ދެވަނަ ކުއާޓާގައި ވޮލްވްސްއިންވަނީ އެއް ޕޮއިންޓްގެ ފަރަގަކަށް ލީޑް ކުޑަ ކޮށްފައެވެ. ނަމަވެސް ތިންވަނަ ކުއާޓާގައްޔާއި ހަތަރުވަނަ ކުއާޓާގައި ކުޅުން ރަނގަޅުކޮށް ވަން30 އިންވަނީ ލީޑް ފުޅާކޮށްފައެވެ.
މެޗުގެ ފުރިހަމަ ވަގުތު ހަމަވިއިރު ނަތީޖާއަކީ ވަން 30 އެސްސީ 60، ވޮލްވްސް ބީސީ 54 ކެވެ.
ދެ ޓީމުގެ ފަރާތުން ރަނގަޅު ހަމަލާތަކެއް ފެނުނު މި މެޗުގެ މޮޅު ކުޅުންތެރިއަކަށް ހޮވުނީ ވަން 30 އެސްސީގެ އިބްރާހިމް މައާޒުއެވެ.
