އިޓާލިއަން ލީގު: ސަމްޕްޑޯރިއާ ބަލިކޮށް އިންޓައިން ފަރަގު ކުޑަކޮށްފި

އިޓާލިއަން ލީގުގައި ސަމްޕްޑޯރިއާ ބަލިކޮށް އިންޓަ މިލާނުން ޕޮއިންޓް ތާވަލުގެ ދެވަނައިގައި އޮތް ނަޕޯލީއާ ދެމެދު އޮތް ފަރަގު ކުޑަކޮށްފިއެވެ.

އާދީއްތަ ދުވަހުގެ ރޭ ކުޅުނު މެޗު ސަމްޕްޑޯރިއާއާ ވާދަކޮށް އިންޓައިން މެޗު ކާމިޔާބުކުރީ 1-2 ގެ ނަތީޖާއަކުންނެވެ.

އިންޓަ ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށް ރަނގަޅަށް ކުޅުނީ އިންޓައިންނެވެ. އެގޮތުން އެޓީމުގެ ފަރާތުން ފުރަތަމަ ހާފްގައި ގިނަ ހަމަލާތަކެއްވެސް ފެނިގެންދިޔައެވެ.

މި ހާފްގައި ސަމްޕްޑޯރިއާގެ ފަރާތުންވެސް ގިނަ ހަމަލާތަކެއް ފެނިގެންދިޔައިރު، އެ ހަމަލާތަކުގެ ބޭނުން އެންމެ އެދެވޭ ގޮތެއްގައި އެޓީމަށް ހިފިފައެއް ނުވެއެވެ.

ފުރަތަމަ ހާފް ނިމުނީ 0-0 ގެ ނަތީޖާއިން ދެޓީމުވެސް އެއްވަރުވެންނެވެ.

ދެވަނަ ހާފް ފެށިގެން ދެޓީމަށްވެސް ފުލުފުލުގައި ލަނޑު ޖެހުމަށް ގިނަ ފުރުސަތުތަކެއް ވަނީ ލިބި ބޭކާރުވެފައެވެ.

މެޗުގައި ފުރަތަމަ ލަނޑު ޖަހާ ލީޑު ނެގީ އިންޓައިންނެވެ. މި ލަނޑު 75 ވަނަ މިނެޓުގައި ކާމިޔާބުކުރީ އެމްބްރޯސިއޯއެވެ. ނަމަވެސް އޭގެ ދެ މިނެޓު ފަހުން ސަމްޕްޑޯރިއާގެ ގެބިއާޑިނީ ވަނީ އެޓީމަށް ނަތީޖާ ހަމަހަމަކޮށްދީފައެވެ.

އިންޓައިން މެޗުގެ ލީޑު އަނބުރާ ހޯދީ 78 ވަނަ މިނެޓުގައެވެ. މި ލަނޑު އެޓީމަށް ކާމިޔާބުކޮށްދިނީ ނައިގޮލަންއެވެ. އޭނާ މި ލަނޑު ކާމިޔާބުކުރީ އޭރިޔާ ބޭރުން ފޮނުވާލި ހަމަލާއަކުންނެވެ.

މި ނަތީޖާއާއެކު އިންޓަ އޮތީ ކުޅުނު 24 މެޗުން ލިބުނު 46 ޕޮއިންޓާއެކު ޕޮއިންޓް ތާވަލުގެ ތިންވަނައިގައެވެ. އެއްވަނައިގައި 24 މެޗުން ލިބުނު 66 ޕޮއިންޓާއެކު ޔުވަންޓަސް އޮތްއިރު، ދެވަނައިގައި 24 މެޗުން 53 ޕޮއިންޓާއެކު އޮތީ ނަޕޯލީއެވެ.