ސްޕެނިޝް ލަލީގާގައި ޖިރޯނާ އަތުން ބަލިވެ، ޕޮއިންޓް ތާވަލުގެ ދެވަނައަށް އަރަން ލިބުނު ފުރުސަތު ރެއާލް މެޑްރިޑަށް ގެއްލިއްޖެއެވެ.

އާދީއްތަ ދުވަހުގެ ރޭ ކުޅުނު މެޗު ޖިރޯނާއާ ވާދަކޮށް ރެއާލް ބަލިވީ 1-2 ގެ ނަތީޖާއަކުންނެވެ.

ރެއާލް ދަނޑުގައި ކުޅުނު މި މެޗުގައި ބޯޅަ ކޮންޓްރޯލްކޮށް ރަނގަޅަށް ކުޅުނީ އެޓީމުންނެވެ. އެގޮތުން ޖިރޯނާގެ ހާފަށް ބާރުބޮޑުކޮށް ރެއާލުން ވަނީ ގިނަ ހަމަލާތަކެއް އުފައްދާފައެވެ.

މެޗުގައި ފުރަތަމަ ލަނޑު ޖަހާ ލީޑު ނެގީވެސް ރެއާލުންނެވެ. މި ލަނޑު 25 ވަނަ މިނެޓުގައި ޓޯނީ ކްރޫޒްގެ އެހީތެރިކަމާއެކު ކާމިޔާބުކުރީ ކަސެމީރޯއެވެ.

މި ލަނޑަށްފަހު ވެސް ރެއާލްއަށް ވަނީ ލީޑު ފުޅާކުރުމަށް ފުރުސަތުތަކެއް ލިބި ބޭކާރުވެފައެވެ. މި ހާފްގައި ޖިރޯނާއަށް ވެސް ލަނޑު ޖެހުމަށް ފުރުސަތުތަކެއް ލިބި ބޭކާރުވިއެވެ.

ފުރަތަމަ ހާފް ނިމުނީ 0-1 ގެ ނަތީޖާއިން ޖިރޯނާގެ މައްޗަށް ރެއާލް ކުރީގައި އޮވެގެންނެވެ.

ދެވަނަ ހާފްގައިވެސް ރެއާލްގެ ފަރާތުން ގިނަ ހަމަލާތަކެއް ފެނުނު ނަމަވެސް، އެ ހަމަލާތަކުގެ ބޭނުން އެންމެ އެދެވޭ ގޮތެއްގައި ހިފިފައެއް ނުވެއެވެ.

ޖިރޯނާއިން މެޗުގެ ނަތީޖާ ހަމަހަމަކުރީ 66 ވަނަ މިނެޓުގައެވެ. މި ލަނޑު އެޓީމަށް ލިބުނު ޕެނަލްޓީއަކުން ކާމިޔާބުކުރީ ސްޓުއާނީއެވެ. މި ލަނޑާއެކު ޖިރޯނާއިން އެޓީމުގެ އެޓޭކްތައް އިތުރަށް ވަރުގަދަކުރިއެވެ.

ޖިރޯނާ މެޗުން މޮޅުވި ލަނޑު 77 ވަނަ މިނެޓުގައި ކާމިޔާބުކުރީ ޕޯޓޫއެވެ. މި ލަނޑާއެކު ރެއާލްގެ ގިނަ ހަމަލާތަކެއް ޖިރޯނާގެ ގޯލަށް އަމާޒުވެގެންދިޔައެވެ. ނަމަވެސް އެ ހަމަލާތަކުގެ ބޭނުން އެންމެ އެދެވޭ ގޮތެއްގައި އެޓީމަށް ހިފިފައެއް ނުވެއެވެ.

މެޗުގެ އިތުރުވަގުތުގައި ރެއާލްގެ ކެޕްޓަން ސާޖިއޯ ރާމޮސްއަށް ވަނީ ދެވަނަ ރީނދޫ ކާޑާއެކު ރަތް ކާޑު ދައްކާ ދަނޑުން ފޮނުވާލާފައެވެ.

މި ނަތީޖާއާއެކު ރެއާލް އޮތީ ކުޅުނު 24 މެޗުން ލިބުނު 45 ޕޮއިންޓާއެކު ޕޮއިންޓް ތާވަލުގެ ތިންވަނައިގައެވެ. މެޗުން މޮޅުވިނަމަ 48 ޕޮއިންޓާއެކު ރެއާލަށް ދެވަނައަށް ޖެހިލެވޭނެއެވެ. މެޗުން މޮޅުވި ޖިރޯނާ އޮތީ 24 މެޗުން ލިބުނު 27 ޕޮއިންޓާއެކު ޕޮއިންޓް ތާވަލުގެ 15 ވަނައިގައެވެ.

ޕޮއިންޓް ތާވަލުގެ އެއްވަނައިގައި 24 މެޗުން ލިބުނު 54 ޕޮއިންޓާއެކު އޮތީ ބާސެލޯނާއެވެ. ދެވަނައިގައި އޮތީ 24 މެޗުން 47 ޕޮއިންޓް ލިބުނު އެޓްލެޓިކޯ މެޑްރިޑެވެ.