ރާއްޖޭގެ ހުރިހާ ސްކައުޓް ގްރޫޕްތަކަށް ޚާއްސަ ކޮށްގެން ޕެޓްރޯލް ލީޑަރސް ޓްރެއިންން ކޭމްޕް (ޕީއެލްޓީސީ) އެއް ފަށައިފިއެވެ. 

ހުޅުމާލެ ޣާޒީ ސްކޫލުގައި ހުކުރު ދުވަހު ފެށި މިޕޮރްގްރާމް އަމާޒު ކޮށްފައިވަނީ ޕެޓްރޯލް ލީޑަރުންނާއި، އެސިސްޓެންޓް ޕެޓްރޯލް ލީޑަރުންނަށް ކަމަށް ސްކައުޓް އެސޯސިއޭޝަން އިން މައުލޫމާތުދެއެވެ.

ސްކައުޓް އެސޯސިއޭޝަނުން ބުނީ މި ތަމްރީން ކޭމްޕްގެ ބައިވެރިންނަށް ދަސްކޮށްދޭނީ، ލީޑަރޝިޕް ހުނަރުތަކާއި، ޕެޓްރޯލް ސިސްޓަމާއި، އެކި ހާލަތްތަކުގައި ސްކައުޓުން އަމަލު ކުރަންޖެހޭ ގޮތްތައް ކަމަށެވެ.

އެގޮތުން ގުޅިގެން މަސައްކަތް ކުރުމާއި، މުހިއްމު ނިންމުތައް ނިންމާނެ ގޮތާއި ކަންކަމަށް ފާޑު ކިޔުމާއި ކަންތައްތަކުގައި އިސްނެގުމަށް ކޭމްޕްގެ ބައިވެރިން ތަމްރީނު ކުރެވޭނެއެވެ. މި ޕްރޮގްރާމްގައި ރާއްޖޭގެ އެކި ކަންކޮޅުތަކުން އުމުރުން 12 އަހަރާއި 15 އަހަރާއި ދެމެދުގެ 181 ސްކައުޓުން ބައިވެރިވެއެވެ.

މި ކޭމްޕްގައި ސްކައުޓުން ތަމްރީން ކުރުމުގައި 50 އަށް ވުރެ ގިނަ ލީޑަރުން ބައިވެރިވާނެ ކަމަށް ވެސް ސްކައުޓް އެސޯސިއޭޝަން އިން މައުލޫމާތުދެއެވެ. މި ކޭމްޕް ނިންމުމުގެ ހަފްލާ އޮންނާނީ ހޮނިހިރު ދުވަހު ހަވީރުއެވެ.