ރާއްޖޭގެ މައްޗަށް އެއާ އިންޑިއާ ޓީމު ކުރިހޯދައިފި

ޔޫތު މިނިސްޓްރީ އާއި ކްރިކެޓް ބޯޑް އޮފް މޯލްޑިވްސް އަދި އިންޑިއާ އެމްބަސީ ގުޅިގެން ކޮންމެ އަހަރަކު ބާއްވަން ނިންމާފައިވާ އިންޑިއާ-މޯލްޑިވްސް ފްރެންޑްޝިޕް ކްރިކެޓް ސީރީސްގެ ދަށުން ރާއްޖެ އާއި އެއާ އިންޑިއާ ބައްދަލުކުރި މެޗު އެއާ އިންޑިއާ ޓީމު ކާމިޔާބުކޮށްފިއެވެ.

ހުކުރު ދުވަހު ހެނދުނު ކުޅުނު މި މެޗު އެއާ އިންޑިއާ ޓީމާ ވާދަކޮށް ރާއްޖެ ބަލިވީ 8 ވިކެޓުންނެވެ. އެކުވެނި ޓްރެކް ދަނޑުގައި ކުޅުނު މި މެޗުގައި ރާއްޖެއިން ވަނީ ކުޅެން އަރާ 15 އޯވަރު ތެރޭގައި 8 ކުޅުންތެރިން ނުބައިވެގެން 129 ލަނޑު ހަދާފައެވެ.

ޖަވާބުގައި އެއާ އިންޑިއާއިން ވަނީ ކުޅެން އަރާ 14.3 އޯވަރު ތެރޭގައި ދެ ކުޅުންތެރިޔަކު ނުބައިވެގެން 130 ލަނޑު ހަމަކޮށް، މެޗު ކާމިޔާބުކޮށްފައެވެ.

އެއާ އިންޑިއާ ޓީމުގައި އިންޑިއަން ޕްރިމިއާ ލީގުގައި ކުޅޭ ބައެއް ކްރިކެޓް ކުޅުންތެރިން ވަނީ ކުޅެފައެވެ.

މެޗަށްފަހު ރާއްޖޭ ގައުމީ ޓީމުގެ ކޯޗު އާސިފް ހާން ބުނީ، މިއީ ރާއްޖެއަށް ވަރަށް އުފާވެރި ދުވަހެއް ކަމަށާއި، އެއާ އިންޑިއާފަދަ ވަރުގަދަ ކުޅުންތެރިން ހިމެނޭ ޓީމަކާ ދެކޮޅަށް ކުޅެން ލިބުމަކީވެސް ފަހުރެއް ކަމަށެވެ.

މެޗުގައި ރާއްޖޭ ކުޅުންތެރިން ދެއްކި ކުޅުމަށް ތައުރީފް ކުރަމުން ކޯޗު ބުނީ، ރާއްޖެއަށް ދިމާވާ ހަމައެކަނި މައްސަލައަކީ ނިންމުން ކަމަށާއި، އެކަމަށް ތަޖުރިބާވެސް މަދުކަމަށެވެ.

މެޗަށްފަހު ރާއްޖޭގެ ކެޕްޓަން މުހައްމަދު މަހުފޫޒް ބުނީ، ރާއްޖޭގެ ކުޅުންތެރިން ވަރަށް މޮޅަށް ކުޅުނު ކަމަށާއި، ކްރިކެޓަށް އުންމީދެއް އޮތްކަން ދިވެހިންނަށް އެނގިގެންދިޔަކަމަށް އުންމީދުކުރާ ކަމަށެވެ.

މަހުފޫޒް ބުނީ، ކޮންމެ ފަހަރަކުވެސް ބަލިވަނީ ފަހު އޯވަރުން ކަމަށާއި، ދިމާވަނީ ތަޖުރިބާގެ މައްސަލަ ކަމަށެވެ. އެގޮތުން މިފަދަ ފުރުސަތު ގިނައިން ލިބޭނަމަ ތަފާތުވާނެ ކަމަށްވެސް އޭނާ ވަނީ ބުނެފައެވެ.