މާލެއަށް އެތެރެކުރާ އުޅަނދުތައް މަދު ކުރަނީ
13 ފެބުރުއަރީ 2019 | ބުދަ 11:38އެތެރެކުރާ އުޅަނދުތަކުގެ ފުޅާ މިނާއި މޮޑެލް ވެސް ބަލަން ޖެހޭ
މާލޭގެ މަގެއް
ވެރިރަށް މާލެއަށް އެތެރެކުރާ ދުއްވާ އުޅަނދުތައް ލިމިޓްކުރުމަށް ޓްރާންސްޕޯޓް މިނިސްޓްރީއާ އެކު މަޝްވަރާ ކުރަމުންދާ ކަމަށް މާލޭ މޭޔާރު ޝިފާ މުހައްމަދު ވިދާޅުވެއްޖެއެވެ.
މާލޭސިޓީ ކައުންސިލްގެ އިދާރާގައި ބުދަ ދުވަހު ބޭއްވި ޕްރެސްކޮންފަރެންސް ގައި ވާހަކަ ދައްކަވަމުން ޝިފާ ވިދާޅުވި، ބޭނުންނުކޮށް މާލޭގެ މަގު މައްޗަށް ދޫކޮށްލާފައިވާ އުޅަނދުތައް ގިނަވެފައިވާ ކަމަށެވެ.
އަދި އެކަމަށް ހައްލެއް ހޯދުމުގެ ގޮތުން އެތެރެ ކުރާ އުޅަނދުތައް ލިމިޓްކުރުމަށް ޓްރާންސްޕޯޓް މިނިސްޓްރީގައި އެދިފައިވާނެ ކަމަށެވެ.
''ޓްރާންސްޕޯޓް މިނިސްޓްރީ އަށް އަޅުގަނޑުމެން ވާނީ ފޮނުވާފައިވަނީ އެތެރެ ކުރާ ވެހިކަލްތަކުގެ ލިމިޓޭޝަން އަންނަން ޖެހޭ ކަމާއި، އަދި ހަމަ އެއާއި އެކުގައި އަޅުގަނޑުމެން ވާނީ ދަންނަވާފައި، އެތެރެ ކުރާ އެއްޗެތިގެ މުއްދަތު ނުވަތަ އަހަރުވެސް ބަލަން އެބަޖެހޭ'' އޭނާ ވިދާޅުވިއެވެ.
އަދި މީގެ އިތުރުން ޝިފާ ވިދާޅުވީ، ކުރިޔަށް އޮތްތާގައި މާލެ އަށް އެތެރެކުރާ އުޅަނދުތަކުގެ ފުޅާ މިނާއި މޮޑެލްވެސް ބަލަން ޖެހޭ ކަމަށް ޓްރާންސްޕޯޓް މިނިސްޓްރީ ގައި އެދިފައިވާ ކަމަށާއި، އެކަމަށް އަވަސް ހައްލެއް ބޭނުންވާ ކަމަށެވެ.
މޭޔަރު ވިދާޅުވީ، މަޖީދިއްޔާ ސްކޫލު ކުރިމަތީގައި އޮންނަ ސަރަހައްދުގެ އިތުރުން ޖާގާ ބޭނުންވާ އެހެނިހެން ސަރަހައްދުތައްވެސް ހުސްކުރުމުގެ މަސައްކަތްވެސް ކުރިޔަށްދާ ކަމަށެވެ.
ލޮނުޒިޔާރަތްކޮޅުގެ މަސައްކަތް ވަރަށް ފުޅާ ދާއިރާއެއްގައި ފެށިގެން ކުރިޔަށްދާ ކަމަށާއި، ރައީސް އިބްރާހީމް މުހައްމަދު ސޯލިހު ބޭނުންފުޅު ވަނީ ވީހާ ވެސް ގިނަ ތަންތަން ހުސްކޮށް، ޕާކްތައް ހަދައި، ރައްޔިތުންނަށް ނިކުމެލައި އުޅުވޭވަރުގެ ތަންތަނަށް އެތަންތަން ހެދުން ކަމަށް ޝިފާ ވިދާޅުވިއެވެ.
ކައުންސިލްގެ ބޭނުމަކީ ރައްޔިތުންނަށް ހިތްހަމަޖެހިލައިގެން މާލޭގައި އުޅެވޭ ގޮތަށް މާލޭ ބައްޓަން ކުރުން ކަމަށާއި، މާލޭ ޕްލޭން ކުރުމުގެ މަސައްކަތް ކުރަމުންދާއިރު، ބޮޑެތި އިމާރާތް ކުރުމުގެ މަސައްކަތް މިހާރު އެއްކޮށް ހުއްޓާލާފައިވާ ކަމަށް އޭނާ ވިދާޅުވިއެވެ.
''އެހެންވީމާ ކުރިޔަތް އޮތްތާގައި މާލޭގައި އިތުރު އިމާރާތްތަކެއް ނަ އަންނަ ކަމަށް ވަންޏާ، މާލޭގެ އިތުރު އިމާރާތް ތަކެއް ނައަންނަ ކަމަށް ވަންޏާ މާލޭގައި ދެން ހުހަށް ހުރި ހުރިހާ ތަނަކީވެސް ޕާކް ތަކާއި ފެހި ކުރުމާއި މި ވިސްނުމުގައި އަޅުގަނޑުމެން ތަރައްގީ ކުރާނެ ކަންތައްތައް'' މާލޭ މޭޔަރު ވިދާޅުވިއެވެ.
މާލޭގެ ޕްލޭން ހެދުމުގައި ކަންތައްތަކުގައި ޕްލޭނިންގް މިނިސްޓްރީއާ އެކު މިހާރު ވެސް މަޝްވަރާ ކުރެވެމުންދާ ކަމަށާއި، އެހުރިހާ ކަމެއް ކުރުމަށް ވަގުތު ބޭނުންވާ ކަމަށް ޝިފާ ވިދާޅުވިއެވެ.
