ޗެމްޕިއަންސް ލީގު: ޕޯޓޯ ބަލިކޮށް ރޯމާއިން ކުއާޓާގެ އުންމީދު އާކޮށްފި

ޔުއެފާ ޗެމްޕިއަންސް ލީގުގައި އެފްސީ ޕޯޓޯ ބަލިކޮށް ރޯމާއިން ކުއާޓާ ފައިނަލުގެ އުންމީދު އާކޮށްފިއެވެ.

އަންގާރަ ދުވަހުގެ ރޭ ކުޅުނު މެޗު ރޯމާއިން ކާމިޔާބުކުރީ ޕޯޓޯއާ ވާދަކޮށް 1-2 ގެ ނަތީޖާއަކުންނެވެ.

ރޯމާ ދަނޑުގައި ކުޅުނު މި މެޗު ފުރަތަމަ ހާފްގައި ދެޓީމުގެ ފަރާތުންވެސް މާ އެދެވޭ ކުޅުމެއް ފެނިގެންގޮސްފައެއް ނުވެއެވެ. ނަމަވެސް ފުރަތަމަ ހާފްގައި ލަނޑު ޖެހުމަށް ރޯމާއަށް ވަނީ ހުސް ފުރުސަތުތަކެއް ލިބި ބޭކާރުވެފައެވެ.

މި ހާފްގައި ޕޯޓޯގެ ފަރާތުންވެސް ހަމަލާތަކެއް ފެނުނު ނަމަވެސް، އެޓީމުގެ ފަރާތުން މާ ނުރައްކާތެރި ހަމަލާތަކެއް ފެނިގެންގޮސްފައެއް ނުވެއެވެ.

ދެވަނަ ހާފް ފެށިގެން ދެޓީމުގެ ފަރާތުންވެސް ގިނަ ހަމަލާތަކެއް ވަނީ ފެނިގެން ގޮސްފައެވެ. އެގޮތުން ލަނޑު ޖަހަން ދެޓީމަށްވެސް މި ހާފްގައި ގިނަ ފުރުސަތުތަކެއް ލިބި ބޭކާރުވިއެވެ.

މެޗުގެ ފުރަތަމަ ލަނޑު ޖެހީ ރޯމާއިންނެވެ. މި ލަނޑު 70 ވަނަ މިނެޓުގައި އެޓީމަށް ކާމިޔާބުކޮށްދިނީ އެޑިން ޒެކޯގެ އެހީތެރިކަމާއެކު ޒަނިއޯލޯއެވެ. މި ލަނޑަށްފަހުވެސް ރޯމާއިން ދިޔައީ ޕޯޓޯގެ ގޯލަށް ނުރައްކާ ކުރަމުންނެވެ.

އެގޮތުން 78 ވަނަ މިނެޓުގައި ރޯމާއިން ވަނީ ލީޑު ފުޅާކޮށްފައެވެ. މި ލަނޑުވެސް ކާމިޔާބުކުރީ އުމުރުން 19 އަހަރުގެ ޒަނިއޯލޯއެވެ. އޭނާ ވެގެން ގޮސްފައިވަނީ ޗެމްޕިއަންސް ލީގުގައި ރޯމާއަށް ލަނޑެއް ކާމިޔާބުކޮށްދިން އެންމެ ޒުވާން ކުޅުންތެރިޔާއަށެވެ.

ޕޯޓޯގެ ފަރާތުން މެޗުގައި ފެނިގެންދިޔަ ހަމައެކަނި ލަނޑު 79 ވަނަ މިނެޓުގައި ކާމިޔާބުކުރީ އެޑްރިއަންއެވެ. މި ލަނޑު އޭނާ ކާމިޔާބުކުރީ ޓިކީނޯގެ އެހީތެރިކަމާއެކުގައެވެ.

ރޯމާ އަދި ޕޯޓޯ ބައްދަލުކުރާ ދެވަނަ ލެގުގެ މެޗު އޮންނާނީ އަންނަ މަހުގެ ހަވަނަ ދުވަހު ރޯމާ ދަނޑުގައެވެ. އެ މެޗު 0-1 ގެ ނަތީޖާއިން ކާމިޔާބުކޮށްގެން ކުއާޓާއަށް ދިޔުމުގެ ފުރުސަތު ޕޯޓޯއަށް އެބަތެވެ.