ޗެމްޕިއަންސް ލީގު: ޔުނައިޓެޑު ބަލިކޮށް ޕީއެސްޖީން ކުއާޓާގެ އުންމީދު އާކޮށްފި

ޔުއެފާ ޗެމްޕިއަންސް ލީގުގައި މެންޗެސްޓާ ޔުނައިޓެޑު ބަލިކޮށް ޕެރިސް ސެއިންޓް ޖާމަން (ޕީއެސްޖީ) އިން ކުއާޓާ ފައިނަލުގެ އުންމީދު އާކޮށްފިއެވެ.

އަންގާރަ ދުވަހުގެ ރޭ ކުޅުނު މެޗުން ޔުނައިޓެޑު ބަލިވީ ޕީއެސްޖީއާ ވާދަކޮށް 0-2 ގެ ނަތީޖާއަކުންނެވެ.

ޔުނައިޓެޑު ދަނޑުގައި ކުޅުނު މި މެޗަށް ޕީއެސްޖީ ނިކުތީ އެޓީމުގެ އެންމެ އިތުބާރު ދެ ފޯވާޑުން ކަމަށްވާ އެޑިންސަން ކަވާނީ އާއި ނޭމާ ނުލައެވެ. މި ދެ ކުޅުންތެރިންނަށް މެޗުގައި ނުކުޅެވުނީ އަނިޔާގެ ސަބަބުންނެވެ.

މެޗުގެ ފުރަތަމަ ހާފްގައި ޔުނައިޓެޑުގެ ފަރާތުން މާ އެދެވޭ ކުޅުމެއް ފެނިގެން ގޮސްފައިނުވާއިރު، ލަނޑު ޖެހުމަށް މާއެދެވޭ ފުރުސަތުތަކެއްވެސް ލިބިފައެއް ނުވެއެވެ.

ނަމަވެސް ފުރަތަމަ ހާފްގައި ޕީއެސްޖީން ވަނީ ޔުނައިޓެޑުގެ ހާފަށް ބާރުބޮޑުކޮށް ލަނޑު ޖެހުމަށް ރަނގަޅު ފުރުސަތުތަކެއް ތަނަވަސްކޮށްފައެވެ. އެގޮތުން ކީލިއަން އެމްބަޕޭއަށް ލިބުނު ފުރުސަތުތައް ފާހަގަކޮށްލެވެއެވެ.

ފުރަތަމަ ހާފް ނިމުމުގެ ކުރިން އަނިޔާގެ ސަބަބުން ޔުނައިޓެޑުން ވަނީ އެޓީމުގެ ޖެސޭ ލިންގާޑްގެ ބަދަލުގައި އެލެކްސަސް ސަންޗޭޒް ކުޅެން އަރުވާފައެވެ. ފުރަތަމަ ހާފް ނިމުނީ ދެޓީމުންކުރެ ޓީމަކަށްވެސް ލަނޑެއް ނުޖެހި އެއްވަރުވެގެންނެވެ.

ދެވަނަ ހާފް ފެށިގެން ޕީއެސްޖީން ވަނީ އެޓީމުގެ އެޓޭކްތައް ވަރުގަދަކޮށްފައެވެ. އެގޮތުން 53 ވަނަ މިނެޓުގައި އެޓީމުން ވަނީ ލީޑު ނަގާފައެވެ. މި ލަނޑު އެންހަލް ޑިމަރިއާ ނަގައިދިން ކޯނަރަކުން ކާމިޔާބުކުރީ ކިމްޕެމްބޭއެވެ.

މި ލަނޑަށްފަހުވެސް ޕީއެސްޖީން ދިޔައީ ފުލުފުލުގައި ޔުނައިޓެޑުގެ ގޯލަށް ނުރައްކާ ކުރަމުންނެވެ. އެގޮތުން 60 ވަނަ މިނެޓުގައި އެޓީމުން ވަނީ ލީޑު ފުޅާކޮށްފައެވެ. މި ލަނޑު ކާމިޔާބުކުރީ ޑިމަރިއާގެ އެހީތެރިކަމާއެކު އެމްބަޕޭއެވެ.

މި ދެ ލަނޑަށްފަހުވެސް ޕީއެސްޖީއަށް ވަނީ ލީޑު އިތުރަށް ފުޅާކުރުމަށް ގިނަ ފުރުސަތުތަކެއް ލިބި ބޭކާރުވެފައެވެ. އެގޮތުން އެމްބަޕޭއަށް ލިބުނު ފުރުސަތުތައް ހިމެނެއެވެ.

މެޗުގެ ފަހު މިނެޓުގައި ޔުނައިޓެޑުގެ ޕައުލް ޕޮގްބާއަށް ވަނީ ދެވަނަ ރީނދޫ ކާޑަކާއެކު ރަތް ކާޑެއް ދައްކާ ދަނޑުން ފޮނުވާލާފައެވެ. އެގޮތުން މެޗުގެ ފަހުވަގުތުކޮޅު ޔުނައިޓެޑުން ކުޅެން ޖެހުނީ 10 ކުޅުންތެރިންނާއެކުގައެވެ.

ޔުނައިޓެޑު އަދި ޕީއެސްޖީ ބައްދަލުކުރާ ދެވަނަ ލެގުގެ މެޗު އޮންނާނީ އަންނަ މަހުގެ ހަވަނަ ދުވަހުއެވެ. ކުއާޓާގެ ޖާގަ ހޯދަން ޕީއެސްޖީ ދަނޑުގައި ޔުނައިޓެޑު ކުޅޭ މި މެޗުން އެޓީމު ތިން ލަނޑުގެ ތަފާތުން މޮޅުވާންޖެހޭނެއެވެ. އެ މެޗުގައި ޕޮގްބާއަށް ނުކުޅެވޭނެއެވެ.