ސަރުކާރުން އަތޮޅުތެރޭގައި އެޅުމަށް ހަމަޖެހިފައިވާ 550 ހައުސިން ޔުނިޓްގެ ތެރެއިން ލ. ގަމުގައި 200 ހައުސިން ޔުނިޓް އެޅުމަށް ޑިޒައިންކޮށް، އިމާރާތްކޮށްދޭނެ ފަރާތެއް ހޯދުމަށް އިއުލާނުކޮށްފިއެެވެ.

މިނިސްޓްރީ އޮފް ފިނޭންސް އިން އާދިއްތަ ދުވަހު ކޮށްފައިވާ އިއުލާނެއްގައި ބުނެފައިވަނީ، ލ. ގަމުގައި 200 ހައުސިންގ ޔުނިޓް އިމާރާތްކުރުމުގެ މަސައްކަތް ޑިޒައިން އެންޑް ބިލްޑް އުޞޫލުން ކޮށްދޭނެ ފަރާތެއް ހޯދުމަށް ބީލަން ހުށަހެޅުމުގެ ފުރުސަތު ހުޅުވާލާ ކަމަށެވެ. އަދި މިކަމަށް ޝަރުޠުހަމަވާ ރާއްޖެ އާއި ރާއްޖެއިން ބޭރުގެ ފަރާތްތަކަށް ވެސް ފުރުސަތު އޮތް ކަމަށް ފިނޭންސުން ބުނެއެވެ.

މި ބީލަމުގައި ބައިވެރިވުމަށް -/1500ރ. (ފަނަރަސަތޭކަ ރުފިޔާ ނުވަތަ 100 ޔޫއެސް ޑޮލަރު) ނޮން ރިފަންޑަބަލް ރަޖިސްޓްރޭޝަން ފީއެއް ދައްކަން ޖެހެއެވެ. ފިނޭންސުން ބުނީ ފައިސާ ބަލައިގަންނާނީ 13 ފެބުރުވަރީ 2019 އިން 4 މާޗް 2019 އަށް، ބަންދު ނޫން ކޮންމެ ދުވަހަކު 08:30 އިން 12:00 އަށް އެ މިނިސްޓްރީ އިން ކަމަށެވެ. ބިޑް ސެކިޔުރިޓީގެ ގޮތުގައި 100,000 (އެއްލައްކަ) ޔޫއެސް ޑޮލަރު ނުވަތަ އެ ޢަދަދާ އެއްވަރެއްގެ ޢަދަދެއްގެ ދިވެހި ރުފިޔާ ހުށަހަޅަން ޖެހެއެވެ.

ލ. ގަމުގައި 200 ހައުސިން ޔުނިޓް އިމާރާތް ޑިޒައިންކޮށް، އިމާރާތްކޮށްދޭނެ ފަރާތެއް ހޯދުމަށް އިއުލާނުކޮށްފައިވާއިރު، ރައްޔިތުންގެ މަޖިލިސް މިއަހަރަށް ހުޅުވުމަށް ބޭއްވި ޖަލްސާގައި ރިޔާސީ ބަޔާން އިއްވަވަމުން ރައީސުލްޖުމްހޫރިއްޔާ އިބުރާހިމް މުހައްމަދު ވިދާޅުވެފައި ވަނީ ރާއްޖޭގެ ރައްޔިތުންނަށް ދިމާވެފައިވާ ބޯހިޔާވަހިކަމުގެ ދަތިކަމަށް ހައްލު ހޯއްދަވައިދެއްވުމަށް ހުޅުމާލޭގައި އިތުރު 4،000 ހައުސިންގ ޔުނިޓާއި، އަތޮޅު ތެރޭގައި އިތުރު 550 ހައުުސިންގ ޔުނިޓް އެޅުމުގެ މަސައްކަތް ފަށައި، ބޯހިޔާވެހިކަމުގެ އަގު ހެޔޮކުރައްވަނެ ކަމަށެވެ. 

އޭގެ އިތުރުން މަސައްކަތް ފަށައި ނުނިމި ހުރި 1500 އަށް ވުރެ ގިނަ ހައުސިން ޔުނިޓް ނިންމުމުގެ މަސައްކަތް ވެސް މިހާރު ވަނީ އަލުން ފަށާފައި ކަމަށާއި، މާލޭގައި ދިރިއުޅޭ މީހުންނަށް ހުޅުމާލޭގައި އިތުރު 4000 ހައުސިން ޔުނިޓް އެޅުމުގެ މަސައްކަތް ވެސް މި އަހަރުގެ ތެރޭގައި ފެށިގެންދާނެ ކަމަށް ރައީސް ސޯލިހް ވިދާޅުވިއެވެ.