ކެމިކަލް އެލެމެންޓްތައް އެއްކޮށް، ތަރުތީބު ކުރެވިފައިވާ 'ޕީރިއޮޑިކް ޓޭބަލް އޮފް ކެމިކަލް އެލެމެންޓްސް' އެކުލަވާލިތާ 150 އަހަރު ފުރުން ފާހަގަކުރުމުގެ ގޮތުން މި ހިނގާ 2019 ވަނަ އަހަރަކީ 'ޕީރިއޮޑިކް ޓޭބަލްގެ އަހަރު' ކަމުގައި އދގެ ސައިންސާއި ބެހޭ އިދާރާ، ޔުނެސްކޯއިން ކަނޑައަޅައިފިއެވެ.

'ޕީރިއޮޑިކް ޓޭބަލް އޮފް ކެމިކަލް އެލެމެންޓްސް' އަކީ މިހާތަނަށް ހޯދިފައިވާ އެކިއެކި ކެމިކަލް މާއްދާތައް އޭގެ އެކި ސިފަތަކާއި ގުޅުވައިގެން ބައިބަޔަށް ބައިކޮށް، އެ ބައިތައް އެކުގައި ތަރުތީބު ކުރެވިފައިވާ ތާވަލެކެވެ. މިހާރު ހުރި ވަރަށްވުރެ މަދު ކެމިކަލް މާއްދާތަކަކާއި އެކު މިތާވަލުގެ އަސްލު އެންމެ ފުރަތަމަ އެކުލަވައިލެއްވީ 1869 ވަނަ އަހަރު ރޫސީ ކެމިސްޓް ޑިމިޓްރީ މެންޑެލީވްއެވެ.

'އިންޓަރނޭޝަނަލް އިޔަރ އޮފް ދި ޕީރިއޮޑިކް ޓޭބަލް އޮފް އެލެމެންޓްސް' އާއި ގުޅިގެން ކުރިއަށްގެންދާ ހަރަކާތްތައް ފަށާފައިވަނީ ނިމިގެންދިޔަ ހަފްތާގައި ޔުނެސްކޯއިން ރަޝިއާގައި ބޭއްވި ހަފްލާއެއްގައެވެ. މި ހަފްލާގައި ކެމިސްޓްރީގެ ދާއިރާއިން ނޮބެލް އިނާމު ހާސިލްކުރައްވާފައިވާ ފަރާތްތަކާއި، ރަޝިއާގެ ސައިންސާއި ބެހޭ ވަޒީރުގެ އިތުރުން އެކި ޤައުމުތަކުގެ ސައިންސްވެރިން ވަނީ ބައިވެރިވެފައެވެ.

މި އަހަރު ފާހަގަކުރުމަށް ޔުނެސްކޯއިން ގިނަ ހަރަކާތްތަކެއް ހިންގުމަށް ވަނީ ނިންމާފައެވެ. އެގޮތުން ބައިނަލްއަޤުވާމީ ފެންވަރުގައި، އޮންލައިންކޮށް، ހައި ސްކޫލް ދަރިވަރުންނަށް އަމާޒުކޮށްގެން ޕީރިއޮޑިކް ޓޭބަލް އާއި ގުޅޭ ކުއިޒެއް ކުރިއަށްގެންދިއުމަށް ވަނީ ނިންމާފައެވެ. އަދި ހަމަ މިއާއިއެކު ދުނިޔޭގެ އެކި ހިސާބުތަކުގައި ތިބި ދަރިވަރުން ކެމިސްޓްރީއަށް އަހުލުވެރިކޮށް އެ ދާއިރާއަށް ޝައުޤުވެރިކަން އިތުރު ކުރުމަށް އެކުދިންނަށް ކެމިސްޓްރީ އާއި ގުޅޭ އެކިއެކި ތަހުލީލުތައް ކުރެވޭނެ މަގުފަހިކޮށްދިނުމަށްވެސް ޔުނެސްކޯއިން ވަނީ ރާވާފައެވެ.