ވޮލީބޯލް އެސޯސިއޭޝަނުން އިންތިޒާމުކޮށްގެން ބާއްވާ ވޮލީބޯލް އެސޯސިއޭޝަން ކަޕްގެ އަންހެން ޑިވިޝަނުގައި ލޮރެންޒޯ ބަލިކޮށް ފައިނަލުގެ ފަހު ޖާގަ ވެމްކޯ ހޯދައިފިއެވެ.

ބުރާސްފަތި ދުވަހުގެ ރޭ ކުޅުނު ދެވަނަ ސެމީގެ މެޗު ލޮރެންޒޯއާ ވާދަކޮށް ވެމްކޯއިން މެޗު ކާމިޔާބުކުރީ ސީދާ ތިން ސެޓުންނެވެ.

ފޯރިގަދަ ކުޅުމެއް ފެނިގެންދިޔަ މި މެޗުގެ ފުރަތަމަ ދެ ސެޓް ވެމްކޯއިން ގެންދިޔައީ 24-26 އިންނެވެ. ތިންވަނަ ސެޓް ވެމްކޯއިން ގެންދިޔައީ 16-25 އިންނެވެ. މެޗުގެ މޮޅު ކުޅުންތެރިޔަކަށް ހޮވުނީ އައިމިނަތު އަރީޝާއެވެ.

މުބާރާތުގެ ފައިނަލުގައި ވެމްކޯ ވާދަކުރަންޖެހޭނީ ކުޅުނު ހުރިހާ މެޗަކުން މޮޅުވެ، ފައިނަލުގެ ޖާގަ ކަށަވަރުކުރި ޕޮލިސް ކްލަބާއެވެ.

ޕޮލިސް އަދި ވެމްކޯ ވަނީ މުބާރާތުގެ ފުރަތަމަ ސެމީގައި ބުދަ ދުވަހުގެ ރޭ ބައްދަލުކޮށްފައެވެ. އެ މެޗު ތިން ސެޓް އެއް ސެޓުން ކާމިޔާބުކުރީ ޕޮލިހެވެ.

މުބާރާތުގެ ޕްރިލިމިނަރީ ބުރުގެ އެއްވަނަ ހޯދައިގެން ދެވަނަ ބުރަށް ދަތުރުކުރި ލޮރެންޒޯ ސެމީއަށް ދަތުރުކުރީ ދެވަނަ ބުރުގެ ތިންވަނަ ޓީމުގެ ގޮތުގައެވެ.

މިދިޔަ އަހަރުގެ ފައިނަލުގައި ވެމްކޯގެ މައްޗަށް ކުރިހޯދައި މުބާރާތުގެ ތަށި އުފުލާލީ މާފަންނު ޔޫތު ޑިވެލޮޕްމަންޓް އެސޯސިއޭޝަން (މައިޑާ) އެވެ. ނަމަވެސް މި ފަހަރުގެ މުބާރާތުގައި މައިޑާ ވާދައެއް ނުކުރެއެވެ.