އެމްޑީޕީގެ ރައީސް އަދި ކުރީގެ ރައީސުލް ޖުމްހޫރިއްޔާ މުޙައްމަދު ނަޝީދު ހުންނެވީ ޝަރުއީ ނިޒާމް އިސްލާހު ކުރެއްވުމަށް ފުރިހަމައަށް ތައްޔާރުވެވަޑައިގެން ކަމަށާއި، ރައްޔިތުން ފިޔަވައި ބައްލަވަން ޖެހިވަޑައިގަންނަވާނެ އިތުރު ބަޔަކު ނެތްކަމަށް އެމަނިކުފާނު ވިދާޅުވެއްޖެވެ.

ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި ހއ ހޯރަފުށީ ދާއިރާއަށް އެމްޑީޕީގެ ޓިކެޓުގައި ވާދަކުރައްވާ އަޙުމަދު ސަލީމް(ސައްލެ)ގެ ކެމްޕއިން ލޯންޗު ކުރުމަށް ބޭއްވި ހަފްލާގައި ވާހަކަފުޅު ދައްކަވަމުން ކުރީގެ ރައީސް ނަޝީދު ވިދާޅުވީ، އެމްޑީޕީއަށް މަޖިލީހުގެ މެޖޯރިޓީ ދޭންޖެހޭ ސަބަބަކީ ޝަރުއީ ނިޒާމު އިސްލާހު ކުރުމަށް އެ ޕާޓިން މަސައްކަތްތަކެއް ކުރަމުންދިއުން ކަމަށެވެ.

"ކީއްވެގެންތޯ އެމްޑީޕީއަށް މި އަޢުލަބިއްޔަތު ދޭންވަނީ. ވަރަށް ސާފު. އަޅުގަނޑުގެ މަސްލަހަތު ހިމެނޭ އެތައް މިލިއަން ރުފިޔާއެއްގެ މައްސަލައެއް ނެތް އެއްވެސް ކޯޓަކު. އެހެންވީމާ އަޅުގަނޑުގެ ދެ އަތް އޮތީ ވަރަށް ދޫވެފައި ޝަރުއީ ނިޒާމު އިސްލާހު ކުރަން. އަޅުގަނޑު ބަލަން ޖެހޭ އިތުރު މީހެއް ނެތް އެކަމަކަށް. ތި ބޭފުޅުން ފިޔަވައި. އިންސާފު ފިޔަވާ''، އެމަނިކުފާނު ވިދާޅުވިއެވެ.

މީގެ އިތުރުން ނަޝީދު ވިދާޅުވީ، 19 ވަނަ ރައްޔިތުންގެ މަޖިލީހަށް އިންތިޚާބުވާ އެމްޑީޕީގެ އެއްވެސް މެމްބަރެއްގެ އަމިއްލަ މަސްލަހަތެއް މަޖިލީހުގައި ހިމާޔަތް ނުކުރާނެ ކަމަށާއި، އެ މަޖިލީހުގައި ހިމާޔަތް ކުރާނީ ރައްޔިތުންގެ މަސްލަހަތު ކަމަށެވެ.

ރައީސް ނަޝީދު އިތުރަށް ވިދާޅުވީ، އެމްޑީޕީގެ ޓިކެޓްގައި މަޖިލީހަށް ވާދަ ކުރައްވާ ފަރާތްތަކުގެ އެންމެ އިސް ކަމަކަށް ވާން ޖެހޭނީ ރައްޔިތުންގެ އުއްމީދުތައް ފުރިހަމަ ކޮށްދިނުން ކަމަށެވެ. އަދި އެކަން އެންމެ ރަނގަޅަށް ފުރިހަމަ ކޮށްދެވޭނީ އެމްޑީޕީގެ މެމްބަރުން މަޖިލީހަށް އިންތިހާބު ކޮށްގެން ކަމަށް އެމަނިކުފާނު ވިދާޅުވިއެވެ. އެގޮތުން ހއ. އަތޮޅުން އެމްޑީޕީގެ ޓިކެޓްގައި ކުރިމަތިލާފައިވާ ހުރިހާ މެމްބަރުން ހޮވައި ދިނުމަށް އެ އަތޮޅުގެ ރައްޔިތުން އަރިހުން ރައީސް ނަޝީދު އެދިވަޑައިގެންނެވިއެވެ.

އެމްޑީޕީ ޓިކެޓްގައި ހޯރަފުށި ދާއިރާއަށް ކުރިމަތިލައްވާފައިވާ އެރަށު ރަބީއީމަންޒިލް، އަޙުމަދު ސަލީމް (ސައްލެ) އާއިއެކު ކުރެއްވި މަސައްކަތްޕުޅު ހަނދުމަފުޅު އާކުރައްވަމުން ރައީސް ނަޝީދު ވިދާޅުވީ، އެ ދައިރާގެ ގޮނޑި ސައްލެ ކާމިޔާބު ކުރައްވާނެ ކަމަށެވެ.

''އަޅުގަނޑު އަޙުމަދު ސަލީމާއި އެކުގައި މަސައްކަތް ކޮށްފިން. ފުރަތަމަ އެމްޑީޕީގެ ސަރުކާރުގައި ހިންގުނު ވަރަށް ގިނަ މަޝްރޫއު ތަކަކީ ސަލީމް އޭގެ އިންތިޒާމް ތަކުގައި އަދި ގިނަ ފަހަރަށް މޭސްތިރި ކަމުގައި ހަގީގަތުގައި މަސައްކަތް ކުރަމުން އައި މަޝްރޫއުތައް...އަޅުގަނޑަށް ޔަގީން ކަށަވަރު ސަލީމް މި ގޮނޑި ކާމިޔާބުކުރައްވާނެ''، ނަޝީދު ވިދާޅުވިއެވެ.

އެމްޑީޕީގެ މަޖިލިސް ޕްރައިމަރީ ކާމިޔާބު ކުރެއްވައި މަޖިލީހުގެ މައްޗަންގޮޅި މެދު ދާއިރާއަށް ވާދަވެސް ކުރައްވާ ނަޝީދު މި ހަފްލާގައި އިތުރަށް ވިދާޅުވީ، 19 ވަނަ ރައްޔިތުންގެ މަޖިލީސް ވެގެންދާނީ ދަތުރު ފަތުރުގެ ނިޒާމުން ރާއްޖެ ގުޅުވާލައި ދިނުމަށް ގާނޫނީ އޮނިގަނޑު އެކުލަވާލާ މަޖިލީހަށް ކަމަށެވެ. މީގެ އިތުރުންއެމަނިކުފާނުގެ ބޮޑު ހިއްސާއަކާއިއެކު ތާއާރަފު ކުރެވިފައިވާ ގެސްޓް ހައުސްގެ ވިޔަފާރީގެ މުހިއްމުކަން ބަޔާން ކުރައްވަމުން ރައީސް ނަޝީދު ވިދާޅުވީ، ގެސްޓް ހައުސް ވިޔަފާރި ރާއްޖޭގައި ފުޅާވެ، ކުރިއަރަމުންދާ ކަމަށާއި، ހަމަ އެހެން ރަށްތަކެކޭ އެއްފަދައިން ހޯރަފުށީގައިވެސް ގެސްޓް ހައުސް ވިޔަފާރި ކުރިއެރުވޭނެ ކަމަށް ގަބޫލުފުޅު ކުރައްވާ ކަމަށެވެ.