ޕްރިމިއާ ލީގް: ފަރަގު ކުޑަކުރުމަށް ލިބުނު ފުރުސަތު ސިޓީން ގެއްލުވާލައިފި

ޕްރިމިއާ ލީގުގައި ނިއުކާސަލް ޔުނައިޓެޑު އަތުން ބަލިވެ، ފަރަގު ކުޑަކުރަން ލިބުނު ފުރުސަތު މެންޗެސްޓާ ސިޓީން ނަގާލައިފިއެވެ.

އަންގާރަ ދުވަހު ކުޅުނު މި މެޗު ސިޓީއާ ވާދަކޮށް ނިއުކާސަލްއިން ކާމިޔާބުކުރީ 1-2 ގެ ނަތީޖާއަކުންނެވެ.

ސިޓީ ދަނޑުގައި ކުޅުނު މެޗު ފެށިގެން އެޓީމުން ވަނީ ދެވަނަ މިނެޓުގައި ލަނޑު ޖަހައި ލީޑް ހޯދާފައެވެ. މި ލަނޑު އެ ޓީމަށް ޖަހައިދީފައި ވަނީ ޑޭވިޑް ސިލްވާގެ އެހީތެރިކަމާ އެކު ސާޖިއޯ އަގުއެރޯއެވެ.

މެޗުގެ ފުރަތަމަ ހާފްގައި ބޯޅަ ކޮންޓްރޯލްކޮށް ރަނގަޅަށް ކުޅެފައި ވަނީ ސިޓީންނެވެ. ދެ ޓީމަށް ވެސް ވަނީ ލަނޑު ޖަހަން ގިނަ ފުރުސަތުތަކެއް ލިބި ބޭކާރުވެފައެވެ.

ފުރަތަމަ ހާފް ނިމުނީ 0-1 ގެ ނަތީޖާއިން ނިއުކާސަލްގެ މައްޗަށް ސިޓީ ކުރީގައި އޮވެގެންނެވެ.

ދެވަނަ ހާފްގައި ނިއުކާސަލްއިން ވަނީ އެޓީމުގެ ކުޅުން ރަނގަޅުކޮށް ސިޓީގެ ގޯލަށް ނުރައްކާކޮށްފައެވެ. ނަތީޖާއެއްގެ ގޮތުން އެޓީމުގެ ފުރަތަމަ ލަނޑު 67 ވަނަ މިނެޓުގައި އިސާކް ހައިޑެންގެ އެހީތެރި ކަމާއިއެކު ކާމިޔާބު ކޮށްދިނީ ސަލްމަން ރޮންޑޮންއެވެ.

ދެ ޓީމްގެ ފަރާތުން ވެސް ވާދަވެރި ކުޅުމެއް ފެނުނު މި މެޗްގައި ނިއުކާސަލް މޮޅުވި ލަނޑު 80 ވަނަ މިނެޓުގައި ލިބުނު ޕެނަލްޓީއަކުން ކާމިޔާބު ކޮށްދިނީ މެޓް ރިޗީއެވެ.

މި ނަތީޖާއާ އެކު ނިއުކާސަލް ވަނީ ކުޅުނު 24 މެޗުން 23 ޕޮއިންޓް ހޯދާ ތާވަލްގެ 14 ވަނާގައި ހަމަ ޖެހިލާފައެވެ.

މި ނަތީޖާއާ އެކު ސިޓީ ދެވަނައިގައި އޮތީ 24 މެޗުން ލިބުނު 56 ޕޮއިންޓާއެކުގައެވެ. ތާވަލުގެ އެއްވަނާގާ އޮތް ލިވަޕޫލް ކުޅުނު 23 މެޗުން 60 ޕޮއިންޓާއެކުގައެވެ.

އެގޮތުން އެއް މެޗު އިތުރަށް ކުޅެގެން ޕޮއިންޓް ތާވަލުގެ އެއްވަނައިގައި ހަތް ޕޮއިންޓްގެ ލީޑެއް ނެގުމުގެ ފުރުސަތު ލިވަޕޫލްއަށް ވަނީ ތަނަވަސްވެފައެވެ. އެޓީމު ބުދަ ދުވަހުގެ ރޭ ނިކުންނާނީ ލެސްޓާއާ ދެކޮޅަށެވެ.