މިސްޓަރ މޯލްޑިވްސް އެޕްރިލް 26 ގައި، ބައިވެރިވުމަށް ހުޅުވާލައިފި
30 ޖެނުއަރީ 2019 | ބުދަ 08:30މިސްޓަ މޯލްޑިވްސް މިއަހަރު ބާއްވަނީ އެއް އަހަރުގެ މެދުކެނޑުމަކަށްފަހު
2017 ވަނަ އަހަރުގެ މިސްޓަ މޯލްޑިވްސް
ބޮޑީ ބިލްޑިން އެސޯސިއޭޝަނުން އިންތިޒާމުކޮށްގެން ބާއްވާ ނޭޝަނަލް ބޮޑީ ބިލްޑިން ޗެމްޕިއަންޝިޕް "މިސްޓަ މޯލްޑިވްސް" އެޕްރިލް މަހުގެ 26 ވަނަ ދުވަހު ބޭއްވުމަށް ނިންމާ، ބައިވެރިވުމަށް ފުރުސަތު ހުޅުވާލައިފިއެވެ.
މި އަހަރުގެ މިސްޓަ މޯލްޑިވްސްގައި ބައިވެރިވުމުގެ ފުރުސަތު މި މަހުގެ 15 ވަނަ ދުވަހު ހުޅުވާލާފައި ވާއިރު، އެކެއް އެޕްރީލްވާ ހޯމަ ދުވަހުގެ 14:00 އާހަމައަށް ރަޖިސްޓްރޭޝަންގެ ކަންތައް ފުރިހަމަކުރެވޭނެއެވެ.
ބޮޑީބިލްޑިން އެސޯސިއޭޝަނުން ބުނީ، މުބާރާތުގައި އަމިއްލަ ފަރުދެއްގެ ގޮތުން ބައިވެރިވެވިދާނެ ކަމަށާއި، އޭގެ އިތުރުން ޖިމްއެއްގެ ފަރާތުން ނުވަތަ ރާއްޖޭގެ ރިސޯޓެއްގެ ފަރާތުންވެސް ބައިވެރިވެވިދާނެ ކަމަށެވެ.
މުބާރާތުގެ ރަޖިސްޓްރޭޝަން ފޯމް ބޮޑީބިލްޑިން އެސޯސިއޭޝަނުން ލިބެން ހުންނާނެ ކަމަށް އެ އެސޯސިއޭޝަނުން ބުނެއެވެ. އަދި އިތުރު މައުލޫމާތު ހޯދުމަށް 7777207 ނަމްބަރަށް ގުޅުއްވުމަށްވެސް އެ އެސޯސިއޭޝަނުން އެދެއެވެ.
މިސްޓަ މޯލްޑިވްސް މި އަހަރު ބާއްވަނީ އެއް އަހަރުގެ މެދުކެނޑުމަކަށް ފަހުއެވެ.
2017 ވަނަ އަހަރުގެ މިސްޓަ މޯލްޑިވްސްގެ މަގާމު ހޯދާފައިވަނީ މުހައްމަދު ޔާމީން (ޔާމްބެ) އެވެ. އޭނާއަށް ވަނީ 50،000 ރުފިޔާގެ ފައިސާގެ އިނާމެއް ލިބިފައެވެ.
މިސްޓަ މޯލްޑިވްސްގެ މަގާމު ޔާމްބެ ހޯދީ ލައިޓް ވެއިޓް ބައިން އެއްވަނަ ޓައިޓަލް ވިނާކަން ހޯދި ޝާހީން އިބްރާހިމްއާ ވާދަކޮށްގެންނެވެ.
މީގެއިތުރުން މި މުބާރާތުގެ ޓައިޓަލް ވިނާއަކަށް ޔާމްބެ ހޮވިފައިވާ އިރު، އޭނާ ވަނީ ބޮޑީ ބިލްޑިން ކެޓަގަރީގެ ހެވީ ވެއިޓް ބައިންވެސް ޓައިޓަލް ވިނާކަން ހޯދާފައެވެ. ހެވީ ވެއިޓް ބައިގައި ޔާމްބެ ވާދަކޮށްފައިވަނީ ގިޔާސް އިބްރާހިމްއާ އެވެ.
2017 ވަނަ އަހަރުގެ މިސްޓަ ފިޒީކްގެ އަކަށް ހޮވިފައިވަނީ ފާލިހު މުހައްމަދެވެ. އޭނާއަށް ވަނީ 30،000 ރުފިޔާގެ ފައިސާގެ އިނާމެއް ލިބިފައެވެ.
