އެއާޕޯޓަށް ދިމާވި ކަރަންޓްގެ މައްސަލަ ހައްލުކޮށް، ހިދުމަތްތައް އާންމު ހާލަތަށް ގެނެސްފި
28 ޖެނުއަރީ 2019 | ހޯމަ 15:56އެއާޕޯޓުން ކަރަންޓް ކެނޑިފައިވަނީ ހޯމަ ދުވަހުގެ މެންދުރުފަހު 5:00 ހާއިރު
ވެލާނާ އިންޓަނޭޝަނަލް އެއާޕޯޓް
ވެލާނާ އިންޓަނޭޝަނަލް އެއާޕޯޓްގެ ބޮޑު ބަޔަކުން ކަރަންޓް ކެނޑުނުތާ 3 ވަރަކަށް ގަޑިއިރުފަހުން ކަރަންޓެ ދެވި، އޮޕަރޭޝަންތައް އާންމު ހާލަތަކަށް ގެނެސްފި އެވެ.
އެއާޕޯޓުން ކަރަންޓް ކެނޑިފައިވަނީ ހޯމަ ދުވަހުގެ މެންދުރުފަހު 5:00 ހާއިރުއެވެ. އަދި ކަރަންޓްގެ މައްސަލަ ހައްލުކުރެވި، އެޕަރޭޝަންތައް އާންމު ހާލަތަށް ގެނެވިފައިވަނީ 7:45 ހާއިރު އެވެ.
ކަރަންޓް ކެނޑުމާއެކު ޓާމިނަލް އޭރިއާއިން ކަރަންޓް ކެނޑި، ބައެއް ހިދުމަތްތަކަށް ބުރޫ އަރާފައިވެއެވެ. އެގޮތުން ބައެއް ފްލައިޓްތައް ފުރަން ހަމަޖެއްސި ގަޑިއަށް ނުފުރި، ލަސްވުން ފަދަ މައްސަލަތައް ދިމާވެފައިވެއެވެ.
އެއާޕޯޓް ހިންގާ، މޯލްޑިވްސް އެއާޕޯޓްސް ކޮމްޕެނީ (އެމްއޭސީލް) އިން ބުނީ ކަރަންޓް ކެނޑުނީ މެއިން ޕަވާ ސަޕްލައިއަށް ދިމާވި މައްސަލައަކާއި ގުޅިގެން ކަމަށެވެ. އަދި ކަރަންޓް ކެނޑުމާއެކު، އެމްއޭސީއެލްގެ އިންޖީނަރުންގެ ޓީމާއި، ޓެކްނިކަލް ޓީމް އެކުގައި މައްސަލަ ހައްލެއް ހޯދުމަށް މަސައްކަތްކޮށްފައިވާކަމަށް އެ ކުންފުނިން ބުންޏެވެ.
ކުންފުނިން ބުނީ މައްސަލަ ދިމާވުމާއެކު، އެމްއޭސީއެލްގެ އިސްވެރިން ހިމެނޭގޮތަށް ހުރިހާ ޑިޕާޓްމެންޓުގެ މުވައްޒިފުންވެސް، ފަސެންޖަރުންނަށް އެހީތެރިވެ ދިނުމުގަޔާއި، މައްސަލަ ހައްލުކުރުމުގައި ވަރަށް ބުރަކޮށް މަސައްކަތްކޮށްފައިވާކަމަށެވެ.
އެމްއޭސީއެލުން ވަނީ ކަރަންޓް ކެނޑި ދިމާވާ ދަތިތަކަށް ފަސިންޖަރުންގެ ކިބައިން މައާފަށްވެސް އެދިފައެވެ.
މީގެކުރިންވެސް އެއާޕޯޓުން ކަރަންޓު ކެނޑުމުގެ މައްސަލަ ދިމާވެއެވެ. ނަމަވެސް އެ މައްސަލައަށް މިހާތަނަށް ދާއިމީ ހައްލެއް ހޯދިފައެއް ނުވެއެވެ.
ވެލާނާ އިންޓަނޭޝަން އެއާޕޯޓަކީ، ރާއްޖޭގެ މައި ދޮރާއްޓެވެ. އެގޮތުން ކޮންމެ ދުވަހަކުވެސް އެތައް ހާސް ފަތުރުވެރިންނާއި، ދަތުރުވެރިން ރާއްޖެއިން އައިސްގޮސްވުމަށް ބޭނުންކުރަނީ ވެލާނާ އިންޓަނޭޝަނަލް އެއާޕޯޓެއެވެ.
