އއ. ތޮއްޑޫއިން ގިނަ އަދަދެއްގެ ރުއް ނަގައިގެން ބޭރު ކުރަމުންދާތީ އެރަށުގެ ގިނަ ރައްޔިތުންތަކެއް ކަންބޮޑުވުންފާޅު ކުރަންފަށައިފިއެވެ.

ރާއްޖެއެމްވީއަށް މައުލޫމާތު ދިން ތޮއްޑޫގެ ދަނޑުވެރިއެއް ބުނީ އެންމެ ފަހުން އެރަށުން ގޯތި ދޫކުރި ސަރަހައްދު ތަކުން ރުއް ނެގުމަށް އީޕީއޭއިން ހުއްދަ ދިނުމާއި ގުޅިގެން ރުއް ނަގަމުންދާ ކަމަށާއި، މިހާރު ދަނޑުބިންތަކުން ވެސް ރުއް ނަގަމުންދާ ކަމަށެވެ. އީޕީއޭގެ ހުއްދައާ ހިލާފަށް މިމަސައްކަތް ކުރަމުންދާތީ ވަރަށް ކަންބޮޑުވާ ކަމަށާއި، މިމައްސަލަ ކައުންސިލްގެ ސަމާލުކަމަށް ގެނައި ނަމަވެސް މާބޮޑު އެއްބާރުލުމެއް ނުލިބޭ ކަމަށް އޭނާ ބުންޏެވެ.

ފުޅާ ދާއިރާއެއްގައި ތޮއްޑޫގައި ގެސްޓް ހައުސް ވިޔަފާރި ހިންގަމުން އަންނަ މީހާކު ބުނީ މިހާރު ވެސް އެރަށުގައި ކުރިއާ އަޅާ ބަލާއިރު ރުއް ވަރަށް މަދު ކަމަށާއި، މިގޮތަށް ރުއް ނަގާނަމަ، މިކަމުގެ ނޭދެވޭ އަސަރު ކުރާނެ ކަމަށެވެ. މިއީ ރަށުގެ ރީތި ފެހިކަން ނަގާލުން ކަމަށް އޭނާ ފާހަގަކުރިއެވެ.

ފަތުރުވެރިންގެ މެދުގައި މަގުބޫލު މަގެއް ކަމަށްވާ އެރަށުގެ ވައު މަގަށް އަލިއަޅުވާލާ އެމީހާ ބުނީ މަގުގެ ދެއަރިމަތީގައި ރުއް އިންދާފައި ހުރިހުރިމަކީ ރަށަށާއި، ވިޔަފާރިއަށް ލިބޭ ކުރިއެރުމެއް ކަމަށެވެ.

މީގެ އިތުރުން އެމީހާ ބުނީ ދަނޑު ހައްދާ ސަރަހައްދުން އެންމެ ފަހުން ރަށުގައި ކެނޑި މަގުތަކުގައި އެއްވެސް ރުކެއް ނެތް ކަމަށާއި، އެމަގުގައި ރުއް ގަސް އިންދުމަކީ ޒުވާނުންނާއި، ރަށުގެ ގިނަ ރައްޔިތުން ބޭނުންވާ ކަމެއް ކަމަށެވެ. ނަމަވެސް އެމަގުގައި ރުއް ނުއިންދާ ރުއްގަސް ނަގައިގެން ރަށުން ބޭރުކުރުމަކީ ބަލައިގެނެވޭނެ ކަމެއް ނޫން ކަމަށެވެ.

މި މައްސަލައާ ގުޅިގެން ކައުންސިލްގެ ރައީސާ ހަދީޖާ ނިއުޝާ ވިދާޅުވީ ރުއް ނަގަނީ އީޕޭއޭގެ ހުއްދައާ އެކު ކަމަށާއި، 200 އަށްވުރެ ގިނަ ރުއް ނަގާނެ ކަމަށެވެ. ރުއް ނަގަނީ ފަހުން ދޫކުރި ގޯތިތަކުންނާއި، މަގު ހެދުމަށް ބޭނުންވާ ސަރަހައްދުތަކުން ކަމަށެވެ. އެރަށުގެ ދަނޑު ހައްދާ ސަރަހައްދުން ރުއް ނަގާ ކަމަށް ދެކޭވޭ ވާހަކަތައް ނިއުޝާ ދޮގުކުރެއްވި އެވެ. އަދި ވިދާޅުވީ މިފަދަ މައްސަލައެއް ދިމާވެއްޖެނަމަ ފިޔަވަޅު އަޅާނެ ކަމަށެވެ.

މީގެ ކުރިން ވެސް ތޮއްޑޫއިން ގިނަ އަދަދެއްގެ ރުއް ބޭރުކުރުމުގައި ހަރަކާތްތެރިވި، އަދި މިހާރު ވެސް މިމަސައްކަތުގައި ހަރަކާތްތެރިވާ މީހަކު ބުނީ ރުއްގަސް ނަގަނީ އީޕީއޭގެ ހުއްދައާ އެއްގޮތްވާ ގޮތުގެ މަތިން ކަމަށެވެ. އަދި ދަނޑުބިމުން ރުއްގަސް ނަގަނީ އެދަނޑު ހައްދާ މީހާގެ އެދުމުގެ މަތިން ކަމަށާއި، އެމީހާއަށް ވަކި އުޖޫރަށް ދިނުމަށްފަހު ކަމަށެވެ.

އޭނާ ބުނި ގޮތުގައި ތޮއްޑުއަކީ ބިމުގެ ބޭނުން ބޮޑު ރަށެއްކަމަށާއި ރަށުގައި މުޅިން އޮތީ ދަނޑުވެރިންގެ ދަނޑުތައް ކަމަށެވެ. އެރަށުގެ ދަނޑުބިން ތަކާއި ގޯތިތަކުގައި ހުރި ރުއްގަސް ކަނޑައި އެހެންތަންތަނަށް ގެންދާތީ އެކަމާ ރައްޔިތުން ކަންބޮޑުވެގެން ނޫޅޭ ކަމަށާއި އެމީހުން ބޭނުންވަނީ އެ ރުއްގަސްތަކުގެ ބަދަލުކަމަށް އޭނާ ބުންޏެވެ.

ތޮއްޑޫއަކީ ރުއްގަސް ބޯރަށެއްކަން ފާހަގަކޮށް، އޭނާ ބުނީ އެރަށުން ރުއް އިންދާނެ ޖާގަ ނެތް ކަމަށެވެ.

"މިރަށުން ރުއްގަސް ނެގުމުގެ މަސައްކަތް ކުރަނީ ގާނޫނާއި ގަވާއިދާއި އެއްގޮތަށް. އީޕީއޭއާ ރަށު ކައުންސިލާއި ދެމެދު ތިން މަސް ވަންދެން ކަމާގުޅުންހުރި އެކިއެކި ލިއުންތައް ބަދަލްކުރެވޭ. ގާނޫނާއި ޚިލާފްކަމެއް އޭގައި އެކުލެވިގެން ނުވާނެ. ރާއްޖެއެމްވީއަށް ވާހަކަ ދެއްކި މީހާ ބުންޏެވެ.

ނަމަވެސް މިރުއްތައް ނަގައިގެން ގެންދަނީ ކޮންތާކަށް ކަމެއް އޭނާ ބުނެފައެއް ނުވެއެވެ. ރުއް ނެގުމަކީ މިހާރު އާންމު މައްސަލައަކަށް ވެފައިވާއިރު، ރުއްގަސް ނަގައިގެން ރިސޯޓުތަކަށްށާއި، ރާއްޖޭން ބޭރުގެ ގައުމުތަކަށް އަގު ބޮޑުކޮށް ވިއްކަނީއެވެ.