ހުކުރު ދުވަހު ބޭއްވި އެމްޑީޕީގެ ޕްރައިމަރީގައި މައްސަލަ ޖެހުނު ދެ ފޮށި އަންގާރަ ދުވަހު އަލުން ގުނަން ނިންމައިފި އެވެ.
އެމްޑީޕީގެ އިންތިޚާބުތަކާބެހޭ ކޮމެޓީގެ މުގައްރިރު މުހައްމަދު އިބްރާހިމް މަނިކު ވިދާޅުވި ގޮތުގައި ޝަކުވާ ހުށަހަޅާފައިވާ، ހޮޅުދޫ ދާއިރާގެ ވޯޓްފޮށި މާލެ ގެނެވިފައިވާ ކަމަށާއި ތިނަދޫ ދެކުނު ދާއިރާގެ ފޮށި އަދި ހުރީ ތިނަދޫގައި ކަމަށެވެ. ތިނަދޫ ވޯޓް ފޮށި މާލެ ގެންނާނީތޯ ނުވަތަ ޕްރައިމަރީގެ ޝަކުވާ ބަލާ ކޮމިޓީން ތިނަދުއަށް ދާނީތޯ ކަނޑައެޅުމަށް މަޝްވަރާކުރާ ކަމަށް އޭނަ ވިދާޅުވި އެވެ.
ކޮންމެ ގޮތަކަށް ކޮމެޓީން ނިންމި ނަމަވެސް މާދަމާ ދެ ފޮށި ގުނާނެ ކަމަށް އޭނާ ވިދާޅުވި އެވެ.
އެމްޑީޕީން އާދިއްތަ ދުވަހު ނެރުނު ނޫސްބަޔާނެއްގައި ބުނީ، ކުރިއަށް އޮތް މަޖިލީހުގެ އިންތިހާބުގައި އެމްޑީޕީން ވާދަ ކުރާ ކެންޑިޑޭޓުން ހޮވުމަށް ބޭއްވި ޕްރައިމަރީއާ ގުޅިގެން އަށް ޝަކުވާއެއް ބަލައި އެއް ދާއިރާއެއްގެ މައްސަލަ އަލުން ބެލުމަށް ވެސް ނިންމާފައި ވާކަމަށެވެ. އަދި ފަސް މައްސަލައެއް ބަލާނެ ތަނެއް ނެތް ކަމަށް އެމްޑީޕީ ޕްރައިމަރީ އާއި ގުޅޭ ޝަކުވާ ކޮމިޓީން ނިންމާފައި ވާކަމަށެވެ.
ހޮޅުދޫ ދާއިރާ އާއި ތިނަދޫ ދެކުނު ދާއިރާގެ ފޮށި ގުނަން ނިންމާފައި ވަނީ ވޯޓްގެ ފަރަގު ކުޑަވުމުންނެވެ.
