އިކާޑީގެ އެއްބަސްވުން އާކުރަން އިންޓައިން މަޝްވަރާއަށް ތައްޔާރުވެއްޖެ

އިންޓަ މިލާނަށް ކުޅެމުން އަންނަ އިކާޑީގެ އެއްބަސްވުން އާކުރަން އެ ކްލަބުން އޭނާއާ މަޝްވަރާ ކުރަން ތައްޔާރުވެއްޖެ ކަމަށް ރިޕޯޓްތައް ބުނެފިއެވެ.

ސްކައި އިޓަލީން ބުނީ، އިކާޑީގެ އެއްބަސްވުން އާކުރުމާ ގުޅޭ ގޮތުން އިންޓައިން މަޝްވަރާ ކުރަން ނިންމާފައިވާ ކަމަށާއި، އެގޮތުން ހުކުރު ދުވަހު އޭނާގެ އެޖެންޓާއެކު އިންޓައިން މަޝްވަރާތައް ފަށާނެ ކަމަށެވެ.

އިކާޑީއާ އެކު އިންޓައިން ހަދާފައިވާ އެއްބަސްވުން 2021 ވަނަ އަހަރު ހަމަވާއިރު، އޭނާ ހޯދުމަށް ގިނަ ކްލަބްތަކުން އަންނަނީ މަސައްކަތް ކުރަމުންނެވެ. އެގޮތުން އިންޓައިން ބޭނުންވަނީ ދިގު މުއްދަތަކަށް އިކާޑީ ކްލަބުގައި ބެހެއްޓުމަށެވެ.

އުމުރުން 25 އަހަރުގެ އިކާޑީގެ ރިލީޒް ފީއަކަށް 110 މިލިއަން ޔޫރޯ ކަނޑައަޅާފައިވާއިރު، ރެއާލް މެޑްރިޑުން އަންނަނީ އޭނާ ހޯދުމަށް ވަރަށް ބޮޑަށް މަސައްކަތް ކުރަމުން ކަމަށް ރިޕޯޓްތައް ބުނެއެވެ.

އިކާޑީގެ ޓްރާންސްފާއާ ގުޅިގެން މީޑިއާތަކުގައި ތަފާތު ވާހަކަތައް ފެތުރެމުންދާ ދަނޑިވަޅެއްގައި ދާދި ފަހުން އޭނާގެ އެޖެންޓް އަދި އަނބިމިހާ ކުރި ޓުވީޓެއްގައި ބުނީ، އިކާޑީގެ އެއްބަސްވުމުގެ ގަނޑުތައް ކިޔާފައިވާ ކަމަށެވެ. އަދި އިޓަލީ ބަހުން ކޮށްފައިވާ މި ޓުވީޓުގައި އޭނާ ވަނީ އިކާޑީ ޓެގު ވެސް ކޮށްފައެވެ.

އިންޓަގެ އެއްބަސްވުން އިކާޑީ އާކުރާނެ ކަމާމެދު ޝައްކު ނުކުރާ ކަމަށް މިދިޔަ އަހަރު ކުރީކޮޅު ނާރާ ވަނީ ބުނެފައެވެ. އޭރު އޭނާ ބުނީ، އިކާޑީ ބޭނުން ވަނީ ދުނިޔޭގެ އެންމެ މޮޅު ކްލަބްތަކުގެ ތެރޭގައި އިންޓަ ހިމެނުން ކަމަށެވެ.

ސަމްޕްޑޯރިއާއިން ސީނިއާ ކެރިޔަރު ފެށި އިކާޑީ އިންޓައާ ގުޅުނީ 2013 ވަނަ އަހަރެވެ. އޭނާ ވަނީ މިހާތަނަށް އިންޓައަށް ކުޅުނު 205 މެޗުގައި 121 ލަނޑު ކާމިޔާބުކޮށްފައެވެ. އިކާޑީ ވަނީ އާޖެންޓީނާ ގައުމީ ޓީމަށް މިހާތަނަށް 8 މެޗު ކުޅެފައެވެ. އޭނާ ވަނީ އިޓާލިއަން ލީގުގެ އެންމެ ގިނަ ލަނޑު ޖެހި ކުޅުންތެރިޔާގެ މަގާމު އެއްފަހަރު ހޯދާފައެވެ.

އިޓާލިއަން ލީގުގެ އެންމެ މޮޅު ކުޅުންތެރިޔާގެ މަގާމު ހޯދާފައިވާ، އިކާޑީ ވަނީ ފާއިތުވެދިޔަ ދެ ސީޒަނުގައި ވެސް އިޓަލީ ލީގުގައި މޮޅު ކުޅުމެއް ދައްކާފައެވެ.