އިޓާލިއަން ސުޕަކަޕްގައި އޭސީ މިލާން ބަލިކޮށް ޔުވަންޓަސްއިން ތަށި އުފުލާލައިފިއެވެ.
ބުދަ ދުވަހުގެ ރޭ އޭސީ މިލާންއާ ވާދަކޮށް ޔުވަންޓަސްއިން މެޗު ކާމިޔާބުކުރީ 0-1 ގެ ނަތީޖާއަކުންނެވެ.
ސައުދީ އަރަބިޔާގެ ކިންގް އަބްދުﷲ ސްޕޯޓްސް ސިޓީގައި ކުޅުނު މި މެޗު ފެށިގެން ދެޓީމުގެ ފަރާތުންވެސް ހަމަލާތަކެއް ވަނީ ފެނިގެން ގޮސްފައެވެ. ނަމަވެސް އެ ހަމަލާތަކުގެ ބޭނުން އެންމެ އެދެވޭ ގޮތެއްގައި ހިފިފައެއް ނުވެއެވެ.
ދެވަނަ ހާފް ފެށިގެން ޔުވަންޓަސްގެ ފަރާތުން ގިނަ ހަމަލާތަކެއް ފެނިގެންދިޔައެވެ. އެގޮތުން ކްރިސްޓިއާނޯ ރޮނާލްޑޯ ފޮނުވާލި ހަމަލާތައް ފާހަގަކޮށްލެވެއެވެ.
Cometh the hour, cometh the man! #JuveMilan #SuperCup #CR7JUVE pic.twitter.com/yxHgZTyO2S
— JuventusFC (@juventusfcen) January 16, 2019
މެޗުގައި ޔުވަންޓަސްގެ ފަރާތުން ފެނިގެންދިޔަ ހަމައެކަނި ލަނޑު ފެނުނީ 63 ވަނަ މިނެޓުގައެވެ. މި ލަނޑު ޕިޔަނިޗް ނަގައިދިން ހުރަހަކުން ބޮލުން ކުރިޔަށް ފޮނުވާލައިގެން ކާމިޔާބުކުރީ ރޮނާލްޑޯއެވެ. ރޮނާލްޑޯ ވަނީ އޭނާ އެންމެ ފަހުން ކުޅުނު ހަތް ފައިނަލުގައި 8 ލަނޑު ކާމިޔާބުކޮށްފައެވެ.
މެޗުގެ 74 ވަނަ މިނެޓުގައި އޭސީ މިލާންގެ ކެސީއަށް ވަނީ ރަތް ކާޑެއް ދެއްކުމަށްފަހު ދަނޑުން ފޮނުވާލާފައެވެ. އެގޮތުން މެޗުގެ ފަހު 20 ވަރަކަށް މިނެޓު އޭސީ މިލާނުން ކުޅުނީ 10 ކުޅުންތެރިންނާއެކުގައެވެ.
