ޓީސީ ފަހުރުވެރި ކޮށްދިނުމަށް ފަހު، ނިޒާމްބެ އަލްވަދާއު ކިޔައިފި

ޓީސީ ސްޕޯޓްސް ކްލަބް ފަހުރުވެރިކޮށްދިނުމަށް ފަހު، ކޯޗު މުހައްމަދު ނިޒާމް (ނިޒާމްބެ) އެ ޓީމަށް އަލްވަދާއު ކިޔައިފިއެވެ.

ފާއިތުވެދިޔަ ފަސް ސީޒަނުގައި ޓީސީގެ ކޯޗުކަމުގައި ހުރި ނިޒާމްބެ އެ ކްލަބަށް ދޫކޮށްލީ، ކުރެވުނު މަޝްވަރާ އަށް ފަހު އެއްބަސްވުން އާނުކުރަން ނިންމުމާ އެކުއެވެ.

ނިޒާމްބެ ބުނީ، ޓީސީން އުންމީދުކުރި ވަރަށް ކްލަބަށް އިރުޝާދު ދެވުނު ކަމަށް އުންމީދުކުރާ ކަމަށާއި، މުސްތަގުބަލުގައި ކްލަބަށް ކާމިޔާބީއަށް އެދޭ ކަމަށެވެ.

ނިޒާމްބެއާ ބެހޭ ގޮތުން ޓީސީން ބުނީ، މީހުން ކިޔާ އެއްޗެއްސަށް ނުބަލައި، ދެވަނަ ޑިވިޝަނުން ފަށައިގެން ޓީސީ އޮތް ހިސާބަށް ގެންނަން އެންމެ ބޮޑު ދައުރެއް އަދާކުރީ ނިޒާމްބެ ކަމަށާއި، ނިޒާމްބެ އަދާކުރި ހިދުމަތަށް ޝުކުރު އަދާކުރާ ކަމަށެވެ.

ޓީސީން ބުނީ، އެ ކްލަބަށް އާ ކޯޗެއް ހޯދުމުގެ މަސައްކަތް ފަށާފައިވާ ކަމަށާއި، ބޮޑަށް ބަލަމުން އަންނަނީ ރާއްޖޭގެ ކޯޗަކަށް ކަމަށެވެ.

ފާއިތުވެދިޔަ ދެ އަހަރު ރާއްޖޭގެ އެންމެ މޮޅު ކޯޗުގެ މަގާމު ހޯދާފައިވާ ނިޒާމްބެ އިރުޝާދުގެ ދަށުން ޓީސީން ނިމިދިޔަ ސީޒަނުގެ ދިވެހި ޕްރިމިއާ ލީގު ކާމިޔާބުކޮށްފައިވާއިރު، އެޓީމުން ވަނީ ބަންގްލަދޭޝްގައި ބޭއްވުނު ޝައިހް ކަމާލް އިންޓަނޭޝަނަލް ކަޕް ވެސް ކާމިޔާބުކޮށްފައެވެ.

މީގެ އިތުރުން ނިޒާމްބެ އިރުޝާދުގެ ދަށުން ޓީސީ ވަނީ ދެވަނަ ޑިވިޝަނުން ފުރަތަމަ ޑިވިޝަނަށް ޕްރޮމޯޓްވެ، ވިދިވިދިގެން ތިން އަހަރު ދިވެހި ޕްރިމިއާ ލީގުގެ ދެވަނަ ހޯދާފައެވެ. އަދި ނިޒާމްބެ އިރުޝާދުގެ ދަށުން ޓީސީން ދެ ފަހަރު އެފްއޭކަޕްގެ ދެވަނަ ހޯދާފައިވާއިރު، ޕްރެޒިޑެންޓްސް ކަޕްގެ ދެވަނަ އެއް ފަހަރު ހޯދާފައި ވެއެވެ.