އެފްރިކާގެ އެންމެ މޮޅު ކުޅުންތެރިޔަކަށް އަނެއްކާވެސް ސަލާހު

އެފްރިކާގެ އެންމެ މޮޅު ފުޓުބޯޅަ ކުޅުންތެރިޔާގެ އެވޯޑު އަނެއްކާވެސް ލިވަޕޫލަށް ކުޅެމުން އަންނަ މުހައްމަދު ސަލާހު ހޯދައިފިއެވެ.

މިދިޔަ އަހަރުގެ އެންމެ މޮޅު ކުޅުންތެރިޔާގެ މަގާމު ސަލާހު ހޯދާފައިވާއިރު، އޭނާ ވަނީ 2017 ވަނަ އަހަރުގެވެސް އެންމެ މޮޅު ކުޅުންތެރިޔާގެ މަގާމު ހޯދާފައެވެ.

ސަލާހުއާއެކު އެންމެ މޮޅު ކުޅުންތެރިޔާއަށް ވާދަކުރީ އޭނާއާއެކު ލިވަޕޫލަށް ކުޅެމުން އަންނަ ސާޑިއޯ މާނޭ އާއި އާސެނަލްއަށް ކުޅެމުން އަންނަ އެމެރިކް އޮބަމަޔަންގް އެވެ.

އެފްރިކާގެ މޮޅު ކުޅުންތެރިޔާގެ އެވޯޑް އެންމެ ގިނައިން ހޯދާފައިވަނީ ޔާޔާ ޓޫރޭ އާއި ސެމުއެލް އެޓޫއެވެ. މި ދެ ކުޅުންތެރިންވެސް ވަނީ މި އެވޯޑް ހަތަރު ފަހަރެއްގެ މަތިން ހޯދާފައެވެ.

ސަލާހު ވަނީ މިދިޔަ އަހަރު ލިވަޕޫލް އަދި މިސްރަށް 44 ލަނޑު ކާމިޔާބުކޮށްދީފައެވެ. އަދި އޭނާ ވަނީ މިދިޔަ ސީޒަނުގެ ޕްރިމިއާ ލީގުގައި 32 ލަނޑު ކާމިޔާބުކޮށް، ރަން ބޫޓްވެސް ހާސިލްކޮށްފައެވެ.

ސަލާހު ވަނީ މިދިޔަ ސީޒަނުގައި ލިވަޕޫލް ޔުއެފާ ޗެމްޕިއަންސް ލީގުގެ ފައިނަލަށް ގެންގޮސްދިނުމަށް މުހިންމު ދައުރެއް އަދާކޮށްފައެވެ. ނަމަވެސް ނިމިގެންދިޔަ އަހަރުގެ ވޯލްޑް ކަޕްގައި އަނިޔާގެ ސަބަބުން އޭނާއަށް މާމޮޅު ކުޅުމެއް ނުދެއްކެއެވެ.

ދުނިޔޭގެ ހަވަނައަށް އެންމެ މޮޅު ކުޅުންތެރިޔާގެ މަގާމު މިދިޔަ އަހަރު ހޯދި ސަލާހު ވަނީ މިދިޔަ އަހަރު ޔުއެފާއިން ހޮވާ އެންމެ މޮޅު ތިންވަނަ ކުޅުންތެރިޔާގެ މަގާމުވެސް ހޯދާފައެވެ.