ހުވާކުރެއްވިތާ ދެ ގަޑިއިރު ނުވަނީސް މެކްސިކޯގެ ލަސިއާކޯ އަވަށުގެ މޭޔަރު މަރާލައިފި
ހަމަލާދިނީ އަޕަރާޗިއޯގެ އެޑްވައިޒަރުންނާއި އެހީތެރިންނާއި އެކު ނިކުމެވަޑައިގެން އުޅުއްވަނިކޮށް
މަރާލެވުނު މޭޔަރު އަލިހާންދްރޯ އަޕަރީޗިއޯ
ހުވާކުރެއްވުމުގެ ރަސްމިއްޔާތަށް ދެ ގަޑިއިރު ނުވަނީސް މެކްސިކޯގެ އޮހާކާ ސްޓޭޓުގެ އަވަށެއް ކަމުގައިވާ ލަސިއާކޯގެ މޭޔަރަށް ބަޑިން ހަމަލާދީ މަރާލައިފިއެވެ.
މަރާލެވުނު މޭޔަރު، އަލިހާންދްރޯ އަޕަރާޗިއޯއަށް ހަމަލާދިނީ ލަސިއާކޯ އަވަށުގެ މޭޔަރުގެ ހައިސިއްޔަތުން ކުރައްވާ ފުރަތަމަ މަސައްކަތަށް، އަޕަރާޗިއޯގެ އެޑްވައިޒަރުންނާއި އެހީތެރިންނާ އެކު ނިކުމެވަޑައިގެން އުޅުއްވަނިކޮށެވެ.
މި ހަމަލާގައި އިތުރު ހަތަރު މީހަކަށް ހަމަލާ ދީފައިވާ އިރު، އެކެއްގެ ހާލު ވަރަށް ސީރިއަސް ކަމަށް އެ މީހުން ގެންދިޔަ ހޮސްޕިޓަލުން ވަނީ މައުލޫމާތު ދީފައެވެ.
އޮހާކާ ސްޓޭޓްގެ ގަވަރުނަރު އަލިހާންދްރޯ މުރާތު ވިދާޅުވީ މި ހަމަލާ ދިން މައްސަލައިގައި މީހަކު ހައްޔަރުކޮށްފައިވާ ކަމަށެވެ. މުރާތު ވަނީ އެޓާނީ ޖެނެރަލްގެ މައްޗަށް މި މައްސަލަ ވަރަށް ރަނގަޅަށް ތަހުގީގުކުރުމަށް އަމުރުކުރައްވާފައެވެ.
މަރާލެވުނު މޭޔަރަކީ މެކްސިކޯގެ ރައީސް މަނުއެލް ލޮޕޭޒް އޮބްރާޑޯގެ ޕާޓީއަށް ނިސްބަތްވާ ބޭފުޅެކެވެ. އެ ޕާޓީގެ ރައީސް ޔެދްކޯލް ޕޮލެވްންސްކީ ވިދާޅުވީ ރައްޔިތުން ސަރުކާރަށް އިންތިހާބު ކުރާ އޮފިޝަލުންނާއި ދެކޮޅަށް ހިންގާ ފިނޑި ހަމަލާ ދިނުމުގެ އަމަލުތައް ކުށްވެރި ކުރާ ކަމަށެވެ.
މިއީ މެކްސިކޯގައި މި ހަފުތާގެ ތެރޭގައި މަރާލެވުނު ސަރުކާރުގެ ދެވަނަ މީހާއެވެ. އާދިއްތަ ދުވަހު އެ ގައުމުގެ މަޒަޓެޕޭކްގެ ކައުންސިލް މެމްބަރު މަރިއާ އަސުންސިއޯ ޓޮރެސް ކްރޫޒް ވެސް ވަނީ ބަޑިން ހަމަލާދީ މަރާލާފައެވެ. މިދިޔަ އަހަރު އެކަނި ވެސް މެކްސިކޯގައި ވަނީ ސިޔާސީ މައިދާނުގައި އުޅޭ 150 އަށް ވުރެ ގިނަ މީހުން ވަނީ މަރާލާފައެވެ.
