އޫރުން ތައްޔާރުކޮށްފައިވާ އުފެއްދުމެއް ރާއްޖޭގެ ބާޒާރުގައި ވިއްކަމުންދާކަން މައްސަލަ ބަލަމުންދާ ކަމަށް ކަސްޓަމުން ބުނެފިއެވެ.
އާދިއްތަ ދުވަހު ކަސްޓަމުން ނެރުނު ނޫސް ބަޔާނެއްގައި ބުނެފައިވަނީ އޫރުން ތައްޔާރު ކޮށްފައިވާ "ޖެލަޓިން ޕޯރކައިން" އެކުލެވޭ އުފެއްދުމެއް ރާއްޖޭގެ ބާޒާރުގައި ވިއްކަމުންދާ ކަމަށް އެކި ފަރާތްތަކުން ހާމަކުރަމުންދާ މައުލޫމާތުތަކާއި ގުޅިގެން ޚާއްސަ އިސްކަމެއް ދީގެން އެ މައްސަލަ މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އާއި ކަސްޓަމުސްއިން ބަލަމުންދާ ކަމަށާއި، އެ މުދާ އެތެރެކޮށްފައިވާ ކަމަށް ބެލެވޭ ވިޔަފާރިތައް އިންސްޕެކްޓް ކުރަމުންދާ ކަމަށެވެ.
އެކަމާ ގުޅިގެން ރާއްޖެޓީވީގެ ފަށާއިރު ޕްރޮގްރާމަށް މައުލޫމާތު ދެއްވަމުން އެމްއެފްޑީއޭގެ އިސް އޮފިޝަލަކު ވިދާޅުވީ އެފަދަ ޕްރޮޑަކްޓްތައް ވިއްކާ ކަމުގެ ޝަކުވާ ވަރަށް ގިނައިން ލިބޭ ކަމަށާއި، މިހާރުވެސް އެފަދަ މައްސަލައެއް ބަލަމުންދާ ކަމަށެވެ. މީގެ އިތުރުން އިމްޕޯރޓް ކުރާއިރު ހަލާލް ލޭބަލް ޖަހަން ކޮންމެހެން ނުޖެހޭނެ ކަމަށްވެސް އެ އޮފިޝަލު ވިދާޅުވިއެވެ
"މިހާރު އޮންނަ ޤަވައިދުގަ އޮންނަ ގޮތުން އެކްސްޕޯރޓް ކުރާ އެއްޗެހީގަ މި އޮންނަނީ ހަލާލުވެއްޖެއްޔާ ހަލާލު ޖަހަން. ދެން އެކަމަކު އަޅުގަނޑުމެން މިހެން އެތެރެވާއިރުވެސް ބަލާނެ. ދެން އެތެރެވާއިރު އަޅުގަނޑުމެން ސީދާ މި ބަލަނީ ވަކި ޕަސެންޓޭޖަކުން. އެއްކޮށް ފުލް ޝިޕްމަންޓެއް ނުބަލާނެ. އެހެން ވީމަ ފަހަރެއްގަ ހަމަ އެކަށީގެންވޭ މާކެޓައް ނިކުމެދާނެކަން "ރާއްޖެޓީވީއަށް މައުލޫމާތު ދެއްވި އޮފިޝަލު ވިދާޅުވެފައިވެއެވެ.
ރާއްޖޭގެ މަޝްހޫރު ސުޕަމާކެޓެއްގެ އިތުރުން އެހެން ބައެއް ފިހާރަތަކުގައި ވިއްކަމުންދަނީ އޫރުން އުފައްދާފައިވާ ޖެލިޓާ ބްރޭންޑްގެ ޖެލަޓިން އެވެ. އެއީ އޫޖެލީ އާއި އައިސްކްރީމް ފަދަ ފޮނި ކާތަކެތި ތައްޔާރުކުރާއިރު ބޭނުންކުރާ އެއްޗެކެވެ. ޖަނުމަނުވިލާތުގެ މި އުފެއްދުމުގައި ހަލާލު ލޭބަލް ވެސް ޖަހާފައެއް ނެތެވެ. މާލޭގެ މަޝްހޫރު ސުޕަމާކެޓަކުން މި އުފެއްދުން ގަތް މީހަކު ރާއްޖެއެމްވީއަށް ބުނި ގޮތުގައި، އެއީ 100 ޕަސެންޓް އޫރުން ތައްޔާރުކޮށްފައިވާ އުފެއްދުމެއްކަން އެނގުމުން އެ ފިހާރައަށް ގޮސް އެކަމުގެ ޝަކުވާ ކުރި ކަމަށެވެ. އަދި ޖެހިގެން އައި ދުވަހު އެ ހުރިހާ އުފެއްދުމެއް ފިހާރައިގެ ހަރުން ނަގާފައިވާ ކަމަށް އޭނާ ބުންޏެވެ..
