ބީއެމްއެލް އަދި އެފްއައިޔޫ މުއައްޒަފުންގެ މައްސަލަ އޭސީސީން ބަލަނީ
ހިޔާނާތުގެ މިންވަރު 1.4 ބިލިއަން ރުފިޔާ އަށް އަރާ
އެމްއެމްޕީއާރުސީގެ އޮފީސް
ރާއްޖޭގައި މިހާތަނަށް ހިންގާފައިވާ އެންމެ ބޮޑު ޚިޔާނާތްކަމަށްވާ އެމްއެމްޕީއާރުސީގެ ޚިޔާނާތުގައި ބޭންކް އޮފް މޯލްޑިވްސް, (ބީއެމްއެލް) އަދި އެމްއެމްއޭގެ ފައިނޭންޝިއަލް އިންޓަލިޖެންސް ޔުނިޓް(އެފްއައިޔޫ)ގެ މުވައްޒަފުންގެ އިހުމާލެއް އޮތްތޯ އޭސީސީން ބަލަން ފަށައިފިއެވެ.
އޭސީސީން ބުނީ އެމްއެމްޕީއާރުސީގެ ޚިޔާނާތުގައި ބީއެމްއެލްގެ މުވައްޒަފުންތަކެއްގެ ބައިވެރިވުމެއް އޮތް ކަމަށް ތުހުމަތުކުރެވޭ ކަމަށާއި އަދި އެފްއައިޔޫ އިން ތަހުގީގުކޮށް ފިޔަވަޅު އެޅުމަށް ކަމާ ބެހޭ އިދާރާތަކަށް ފޮނުވާފައި ނުވާ މައްސަލަ ބަލަމުންދާ ކަމަށެވެ.
ދިގު ދެމިގެން ދިޔަ އެމްއެމްޕީއާރުސީގެ ތަހްގީގުގެ ރިޕޯޓް ރައީސް އަބްދުﷲ ޔާމީންގެ ވެރިކަން ނިމުނު ފަހުން އޭސީސީން ނެރެފައި ވަނީ ހޯމަ ދުވަހު އެވެ.
އެ ރިޕޯޓްގައި ބުނެފައިވާ ގޮތުގައި އޭސީސީގެ ތަހްގީގުން އެނގުނު ގޮތުގައި އެމްއެމްޕީއާރުސީއަށް ލިބުނު 22 މިލިއަން ޑޮލަރު (339 މިލިއަން ރުފިޔާ) އަމިއްލަ ކުންފުންޏެއްގެ އެކައުންޓަށް ޖަމާކުރުމުގައި ބީއެމްއެލްގެ މުވައްޒަފުންތަކެއްގެ ބައިވެރިވުން އޮތް ކަމަށް ތުހުމަތުކުރެވެ އެވެ. އެހެންކަމުން އެކަން ވަކި މައްސަލައެއްގެ ގޮތުގައި އަންނަނީ ބަލަމުންނެވެ.
"އެމްއެމްޕީއާރްސީގެ މައްސަލައިގައި ހިމެނޭ ރަށްތަކާއި ފަޅުތަކުގެ އެކުއިޒިޝަން ކޮސްޓްގެ ގޮތުގައި އެމްއެމްޕީއާރސީއަށް ދޫކޮށްފައިވާ "ބޭންކަރސް ޗެކް" ނުވަތަ "ބޭންކް އޯޑަރ" ޗެކްތަކުގައި ޕޭއީއެއްގެ ގޮތުގައި އެމްއެމްޕީއާރސީ ލިޔެފައިވީ ނަމަވެސް، އެ ޗެކްތައް އެންޑޯޒްކުރުމަށް އެމްއެމްޕީއާރްސީގެ އޭރުގެ މެނޭޖިންގ ޑިރެކްޓަރ ސޮއިކޮށް، ބޭންކް އޮފް މޯލްޑިވްސްގައި ހުޅުވާފައިވާ ޕްރައިވެޓް ކުންފުންޏެއްގެ އެކައުންޓަށް ޖުމުލަ 22,145,000.00 (ބާވީސް މިލިއަން އެއްސަތޭކަ ސާޅީސްފަސްހާސް) އެމެރިކާ ޑޮލަރު ޖަމާކޮށްފައިވާތީ، އެކަމުގައި ބޭންކް އޮފް މޯލްޑިވްސްގެ މުވައްޒަފުންތަކެއްގެ ބައިވެރިވުމެއް އޮތްކަމަށް ތުހުމަތުކުރެވޭ މައްސަލައެވެ. މި މައްސަލަ ވަކި މައްސަލައެއްގެ ގޮތުގައި އޭ.ސީ.ސީ އިން ދަނީ ތަޙްޤީޤުކުރަމުންނެވެ." އޭސީސީން ބުނެފައިވެ އެވެ.
އެމްއެމްޕީއާރުސީ މެދުވެރިކޮށް ހިންގި ހިޔާނާތް 1.4 ބިލިއަން ރުފިޔާ އަށް އަރާކަމަށް އޭސީސީން ބުނެ އެވެ. އޮޑިޓަރ ޖެނެރަލް ކުރިން ބުނެފައިވަނީ އެމްއެމްޕީއާރުސީގެ ހިޔާނާތް އަރަނީ 1.22 ބިލިއަން ރުފިޔާ އަށް ކަމަށެވެ.
ބީއެމްއެލްގެ މުވައްޒަފުންތަކަކާމެދު ތުހްމަތުކުރާއިރު، އެ ބޭންކުން ކުރިން ބުނެފައިވަނީ އެމްއެެމްޕިއާރުސީގެ ފައިސާތައް ޖަމާކުރި އަމިއްލަ ކުންފުންޏެއްކަމަށްވާ އެސްއޯއެފްގެ އެކައުންޓްގެ މުއާމަލާތްތަކާމެދު ޝައްކުވެގެން އެކަން އެމްއެމްއޭގެ ދަށުން ހިންގާ ފައިނޭންޝަލް އިންޓެލިޖެންސް ޔުނިޓަށް ރިޕޯޓް ކުރި ކަމަށެވެ.
އެސްއޯއެފް އަށް ފައިސާތައް ޖަމާކުރިކަން އެނގިގެން ދިޔައީ ކޮރަޕްޝަން މައްސަލައިގެ ހަގީގަތް ހާމަކުރި ބީއެމްއެލްގެ ފ. ނިލަންދޫ ބްރާންޗްގެ ކުރީގެ އެސިސްޓަންޓް މެނޭޖަރު ގާސިމް އަބްދުލްކަރީމް ހާމަކުރެއްވި މައުލޫމާތާއި ގުޅިގެންނެވެ. އެމައްސަލައާއި ގުޅިގެން ޖިނާއީ ކުށް ސާބިތުވެ އޭނާއަށް އެއް އަހަރާއި ހަތަރު މަހުގެ ޖަލު ހުކުމް އިއްވިއެވެ. މިހާރު ވަނީ ތަންފީޒުކޮށް އޭނާ ވަނީ މިނިވަންވެފަ އެވެ.
ދައުލަތަށް ލިބެންޖެހޭ ބިލިއަނަކަށް ވުރެ ގިނަ ރުފިޔާ އެސްއޯއެފް އެކައުންޓްތަކަކަށް ޖަމާކޮށް، މުއާމަލާތް ހިންގަމުންދާ ކަން އެނގި ތިބެ އެކަމަށް އެމްއެމްއޭ އިން އޭރު ފިޔަވަޅު ނާޅައި އޮތުމަކީ އެމްއެމްއޭއަށް ބޮޑެތި ފާޑު ކިޔުންތަކެއް މީގެ ކުރިންވެސް އަމާޒު ވި ކަމެކެވެ. އެމްޕީއާރުސީގެ ހިޔާނާތް ހިނގިއިރު އެމްއެމްއޭ ގަވަރނަރުގެ މަގާމުގައި އޭރު ހުންނެވި އަޒިމާ އެ ތުހުމަތުތަކަށް ދެކޮޅު ހައްދަވައެވެ.
