ވައްކަމާއި މަސްތުވާތަކެތީގެ މައްސަލަތައް މަދުވެއްޖެ
ވައްކަމުގެ 3،155 މައްސަލަ މިއަހަރު ހުށަހަޅާފައިވޭ
ފުލުހުން މަގުމަތި ބެލެހެއްޓުމުގައި
ފުލުހުންނަށް ހުށަހެޅުނު ވައްކަމާއި މަސްތުވާތަކެތީގެ މައްސަލަތައް މަދުވެއްޖެއެވެ.
ފުލުހުންގެ ތަފާސް ހިސާބުތަކުން ދައްކާ ގޮތުން ނިމިދިޔަ ނޮވެމްބަރު މަހު ކުށުގެ މައްސަލަތައް ވަނީ 16 ޕަސެންޓް ދަށްވެފައެވެ.
އެގޮތުން ގެވެށި އަނިޔާގެ މައްސަލަތަކާއި ވައްކަމާއި މަސްތުވާތަކެއްޗާއި މާރާމާރީ އާއި ޖިންސީ އަނިޔާގެ މައްސަލަތަކާ އެކު މިދިޔަ ނޮވެމްބަރު މަހު ފުލުހުންނަށް ހުށަހަޅާފައި ވަނީ 945 މައްސަލައެވެ. ނަމަވެސް އޮކްޓޯބަރު މަހު ފުލުހުންނަށް ހުށަހަޅާފައިވާ މައްސަލަތަކުގެ އަދަދަކީ 1124 އެވެ.
ފުލުހުންގެ ތަފާސް ހިސާބުތަކުން ދައްކާ ގޮތުން މި ހަފްތާގެ އަންގާރަ ދުވަހާ ހަމައަށް، މިއަހަރުގެ މިހާތަނަށް ފުލުހުންނަށް ހުށަހަޅާފައިވާ ވައްކަމުގެ މައްސަލަތަކުގެ އަދަދަކީ 3،155 އެވެ. މިދިޔަ އަހަރު ފުލުހުންގެ ހުށަހެޅުނު މައްސަލަތަކުގެ އަދަދަކީ 3،503 އެވެ.
ނޮވެމްބަރު މަހު މަސްތުވާތަކެތީގެ 189 މައްސަލަ ފުލުހުންނަށް ހުށަހަޅާފައިވެއެވެ. ނަމަވެސް އޮކްޓޯބަރު މަހު ފުލުހުންނަށް ހުށަހެޅި މަސްތުވާތަކެތީގެ މައްސަލަތަކުގެ އަދަދަކީ 245 އެވެ.
ކުށުގެ މައްސަތަކާ ގުޅޭ ގޮތުން ފުލުހުން ދަނީ ކޮންމެ ދުވަހަކު 12 ދާއިރާއަކުން ފުލުހުންނަށް ހުށަހަޅާ ކުށުގެ މައްސަލަތަކުގެ ތަފާސް ހިސާބު އާންމުކުރަމުންނެވެ.
