ޕްރަބާސްގެ ސާހޯ އޯގަސްޓް 15 ގައި ސްކްރީނަށް

" ބާހުބަލީ" އިން ދުނިޔެއަށް މަޝްހޫރު ވެގެންދިޔަ ސައުތުގެ އެކްޓަރު ޕްރަބާސްގެ ފުރަތަމަ ބޮލީވުޑް ފިލްމު "ސާހޯ" ރިލީޒް ކުރަން ހަމަޖެހިފައިވަނީ 2019 ވަނަ އަހަރު އޮގަސްޓު 15 ވަނަ ދުވަހު ކަމަށް އިންޑިއާގެ ނޫސްތަކުން ރިޕޯޓްކޮށްފިއެވެ.

ފިލްމުގެ ޕްރޮޑިއުސަރާއި ހަވާލާދީ ރިޕޯޓްތަކުގައިވަނީ ފިލްމުގެ ބޮޑު ބައި ނިމިފައިވާ ކަމާށާއި، ދެން އޮތީ ޕޯސްޓް ޕޮރޮޑަކްޝަންގެ މަސައްކަތް ކަމަށެވެ.

ސާހޯ ހަދާފައިވަނީ 300 ކުރޯރު ރުޕީސްގެ ބަޖެޓަކުންނެވެ. މި އަދަދަކީ ޕްރަބާސް އެންމެ ފަހުން ކުޅެފައިވާ ''ބާހުބަލީ 2" އަށް ވުރެ ބޮޑު ހޭދައެއް ކޮށްގެން ހަދާފައިވާ ފިލްމެކެވެ. ފިލްމުގެ ބޮޑު ބައި ޝޫޓް ކޮށްފައިވަނީ ދުބާއި، އަބޫދާބީ އަދި ރޮމޭނިއާގެ އިތުރުން ޔޫރަޕްގެ އެހެނިހެން ގައުމުތަކުގައެވެ.

މި ފިލްމަކީ އެކްޝަން ފިލްމަކަށް ވާއިރު ފިލްމުގައި ކަނޑު އަޑީގެ ބައެއް މަންޒަރުތައްވެސް ހިމެނެއެވެ. އެ ގޮތުން އެކަމަށް ތައްޔާރުވުމަށްޓަކައި ޕްރަބާސް ސްކޫބާ ޑައިވިން ދަސްކޮށްފައިވާ ކަމަށް ރިޕޯޓްތައް ބުނެއެވެ.

މި ފިލްމުގައި ޕްރާބާސް އާއި އެއްކޮށް ފެނިގެންދާ ތަރިންގެ ތެރޭގައި ޝްރައްދާ ކަޕޫރު، ނީލް ނިތިން މުކޭޝް، އެވެލިން ޝަރްމާ، ކޮމޭޑިއަން ޗަންކީ ޕާންޑޭ، މަހޭޝް މަންޖްރޭކަރުގެ އިތުރުން މުރްލީ ޝަރުމާވެސް ހިމެނެއެވެ. ބޮޑު ބަޖެޓެއްގައި އުފައްދާ މި ފިލްމުގައި ދުބާއީގެ ބުރްޖް ޚަލީފާ ކައިރީގައި ނަގާފައިވާ އެކްޝަން ސީން އަކަށް 25 ކުރޯރް ރުޕީސް ހޭދަ ކޮށްފައިވާ ކަމަށް ފިލްމު ހެދު ފަރާތައި ހަވާލާދީ ރިޕޯޓްތައް ބުނެއެވެ.