މޯލްޑިވްސް ޕޯސްޓް ލިމިޑެޓުން ޚިދުމަތް ދެމުންގެންދާ ޕިކްޕޯސްޓް ސެންޓަރު ތަކުން ތަކެތި ދޫކުރާ ވަގުތު ކުޑަކޮށްފި އެވެ.
މޯލްޑިވްސް ޕޯސްޓް ލިމިޓެޑް އިން ބުނީ ކޮންމެ އަހަރެއްގެ ފަހު ދުވަސްވަރު ގިނަ އަދަދަކަށް ރާއްޖެ އިން ބޭރުން ޕޯސްޓް މެދުވެރިކޮށް ރާއްޖެއަށް ގެންނަ ކަމަށެވެ.
އެހެންކަމުން ކަސްޓަމަރުންނަށް ޚިދުމަތް ދިނުމަށް ކުރިން 24 ގަޑިއިރު އޮތް އޮތުން 12 ގަޑިއިރަށް ކުޑަކޮށްފައިވާ ކަމަށް އެކުންފުނިން މައުލޫމާތުދެއެވެ.
މިގޮތަށް ނިންމީ ގިނަ ތަކެތި މަދު ވަގުތުކޮޅެއްގެ ތެރޭގައި ކަސްޓަމަރުންނަށް ފޯރުކޮށްދިނުމުގެ ބޭނުމުގައި ކަމަށާއި އެގޮތުން ކަސްޓަމަރަށް މެސެޖް ލިބުމުން ކަނޑައަޅާފައިވާ 12 ގަޑިއިރުގެ ތެރޭގައި ބަލާ އަންނަން ވާނެ ކަމަށެވެ.
ޕިކް ޕޯސްޓް އިން 24 ގަޑިއިރު ޚިދުމަތް ދޭން ފަށާފައި ވަނީ 2017 ވަނަ އަހަރުގެ އޮކްޓޯބަރ މަހުން ފެށިގެންނެވެ. އަދި 14 ރަށެއްގައި ޕޯސްޓްގެ އޮފީސްތައް ޤާއިމް ކޮށް 170 އެޖެންޓުން މެދުވެރިކޮށް ދަނީ ޕޯސްޓްގެ ޚިދުމަތް ރައްޔިތުންނާއި ހަމައަށް ފޯރުކޮށްދެމުންނެވެ.
އަދި ކޮންމެ ދުވަހަކު ވެސް އެތައް ހާސް ޕްރޮޑަކްޓެއް ޕޯސްޓް މެދުވެރިކޮށް ރާއްޖެއަށް ގެންނަ ކަމަށާއި މިޚިދުމަތް އަވަހަށް ކަސްޓަމަރުންނާއި ހަމައަށް ފޯރުކޮށް ދިނުމަށްޓަކައި ޕޯސްޓުން ގެންދަނީ ކައުންޓަރ ޑެލިވަރީ މެކޭނިޒަމް އާއި، އެސްއެމްއެސް ނޮޓިފިކޭޝަންސް އަދި އޮންލައިން ކިއު މެނޭޖްމަންޓް ސިސްޓަމް ބޭނުންކުރަމުންނެވެ.
