ޒީރޯގައި ސްރީދޭވީ ފެނިގެންދާނީ ލަވައަކުން ނޫން: ޑައިރެކްޓަރ

ޝާހުރުކު ޚާންގެ ފިލްމް "ޒީރޯ" ގައި ސްރީދޭވީ ފެނިގެން ދާނީ ލަވައަކުން ކަމަށް ދެކެވޭ ވާހަކަތައް އެ ފިލްމްގެ ޑައިރެކްޓަރ އާނަންދް އެލް ރާއި ދޮގޮކޮށްފި އެވެ.

މިއަހަރުގެ ފެބްރުއަރީ މަހު ކުއްލިގޮތަކަށް މަރުވެފައިވާ ސްރީދޭވީ އެންމެ ފަހުން ކުޅެފައިވަނީ "ޒީރޯ" ގެ ލަވައެއް ކަމަށް މީޑިއާ ރިޕޯޓްތައް ބުނެއެވެ.

އަދި އެ ފިލްމް ރިލީޒް ކުރުމުގެ ކުރިން އެ ލަވަ ރިލީޒް ނު ކުރާނެ ކަމަށް ވެސް ރިޕޯޓްކޮށްފައި ވެއެވެ.

ނަމަވެސް އެވާހަކަތައް ދޮގުކޮށް އާނަންދު ބުނެފައިވަނީ ސްރީދޭވީ ފެނިގެންދާނީ ލަވައަކުން ނޫން ކަމަށާއި އެ ފިލްމުގެ އެހެންތަރިންނެކޭ އެއްގޮތަށް އެ ފިލްމްގެ މަންޒަރަކުން ކަމަށެވެ.

މި ފިލްމުގައި ސްރީދޭވިގެ އިތުރުން އާލިއާ ބަޓް، ކަރިޝްމާ ކަޕޫރް، ކާޖޮލް އަދި ރާނީ ގެ ޚާއްސަ ފެނިލުމެއް ހިމެނެއެވެ.

އަންނަ މަހު 21 ގައި ރިލީޒް ކުރާ މި ފިލްމްގައި ޝާހްރުކް ޚާން އާއި އެކު މި ފިލްމްގައި ލީޑްރޯލުން ފެނިގެން ދާނީ އަނުޝްކާ ޝްރަމާ އާއި ކެޓްރީނާ ކެއިފް އެވެ.

"ޒީރޯ"ގައި ޝާހުރުކްގެ ނަމަކީ ބައުއާ ސިންގް އެވެ. އަދި އޭނާ މި ފިލްމްގައި ފެނިގެން ދާނީ އާދަޔާ ޚިލާފަށް ކުރު މީހެއްގެ ރޯލުންނެވެ.

އަނުޝްކާ ފެނިގެން ދާނީ ނުކުޅެދުންތެރިކަން ހުންނަ ސައިންޓިސްޓެއްގެ ރޯލުންނެވެ. އަދި ކެޓްރީނާ ފެނިގެން ދާނީ ސުޕަ ސްޓާރ އެއްގެ ރޯލުންނެވެ.