ސީލައިފުން ލަނޑުދިން މީހުން ފުލުހުންނަށް މައްސަލަ ހުށަހަޅަން އަންގައިފި
30 ނޮވެމްބަރު 2018 | ހުކުރު 14:49ފުލުހުން ވަނީ އެކަމަށް އިލްތިމާސްކޮށްފައި
ސީލައިފްގެ އޮފީސް
ހައުސިންގ ޔުނިޓް އަޅައިދޭނެކަމަށް ބުނެ އެޑްވާންސްކޮށް ފައިސާ ނަގައިގެން ސީލައިފުން ލަނޑުދިން އެންމެން ވެސް އެ މައްސަލަ ފުލުހުންނަށް ހުށަހެޅުމަށް އެ އިދާރާ އިން އިލްތިމާސް ކޮށްފިއެވެ.
ފުލުހުން ބުނީ ހުޅުމާލޭގައި 3،000 ހައުސިން ޔުނިޓް އަޅާނެ ކަމަށް ބުނެ އެ ތަންތަން ގިނަ ބަޔަކަށް ވިއްކައި، މަކަރާއި ހީލަތް ހަދައިގެން ބޮޑެތި އަދަދުތަކުން ފައިސާ ނެގި މައްސަލަ އިކޮނޮމިކް ކްރައިމް ޑިޕާރޓްމަންޓުން ތަހުގީގު ކުރަމުންދާ ކަމަށެވެ.
އެ މައްސަލައިގެ ތަހުގީގުގައި، ސީލައިފަށް ދައުވާ ކުރުމަށް ވަރަށް ގިނަ ފަރާތްތަކުން މައްސަލަ ހުށަހަޅާފައިވާ ކަމަށާއި، މިހާތަނަށް މައްސަލަ ހުށަހަޅާފައިވާ ފަރާތްތަކުގެ އިތުރުން ވެސް މިމައްސަލައިގައި ގެއްލުން ލިބިފައިވާ ބަޔަކު ތިބިކަމަށް ތަހުގީގަށް ގަބޫލުކުރެވޭ ކަމަށް ފުލުހުން ވަނީ ބުނެފައެވެ.
ފުލުހުން ބުނީ އެޕާރޓްމަންޓްތައް ގަތުމަށް ފައިސާ ދައްކާފައިވާ ފަރާތްތަކަށް މިފަދަ މައްސަލައެއް ކުރިމަތިވެފައިވޭތޯ ބެލުމަށް ބޭނުންވާތީ ސީލައިފް ގްލޯބަލް އިންކް ޕްރައިވެޓް ލިމިޓެޑާއި އެފަރާތްތަކާއި ދެމެދު ލިޔެކިޔުމުން ކުރެވިފައިވާ މުޢާމަލާތްތަކާއި އެކު، އެސަރވިސް އަށް މައްސަލަ ހުށަހެޅުމަށް އިލްތިމާސްކުރާ ކަމަށެވެ.
