އަސްލަމާއި އީވާގެ ފާޑުވިދާޅުވުން ގާސިމަށް
ފާޑުކިޔުން އަމާޒުވީ ބިލުގެ މަރުހަލާތައް ފުރިހަމަ ނުކުރުމުން
ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް
ސަރުކާރު ހިންގާ މައި ޕާޓީ، އެމްޑީޕީ ޕާލަމެންޓްރީ ގްރޫޕުގެ ލީޑަރު މުހައްމަދު އަސްލަމާއި ގަލޮޅު އުތުރު ދާއިރާގެ މެމްބަރު އީވާ އަބްދުﷲ މަޖިލީހުގެ ރައީސް ގާސިމް އިބްރާހިމަށް ފާޑުވިދާޅުވެއްޖެއެވެ.
އަސްލަމާއި އީވާގެ ފާޑުކިޔުން ގާސިމަށް އަމާޒުވީ، 65 އަހަރުން މަތީގެ މީހުންނަށް ވެރިކަމަށް ކުރިމަތި ނުލެވޭ ގޮތަށް ޤާނޫން އަސާސީއަށް ގެނައި އިސްލާހު ބާތިލް ކުރުމަށް ޕީޕީއެމުން މަޖިލީހަށް ހުށަހެޅުމާ އެކު، ބަހުސް ފަށައި ކުރިއަށް ގެންދިއުމުންނެވެ. އެމްޑީޕީގެ ބައެއް މެމްބަރުން ވިދާޅުވީ ބިލެއް މަޖިލީހަށް ހުށަހެޅުމުން ފުރިހަމަ ކުރަންޖެހޭ މަރުހަލާތައް ފުރިހަމަނުކޮށް، އުސޫލުތަކުގެ ބޭރުން ބިލުގެ ބަހުސް ކުރިއަށް ނުގެންދެވޭނެ ކަމަށެވެ.
ހިތަދޫ އުތުރު ދާއިރާގެ މެމްބަރުކަން ވެސް ކުރައްވާ އަސްލަމް ވިދާޅުވީ 65 އަހަރުވުމުން ވެރިކަމަށް ކުރިމަތިނުލެވޭ އިސްލާހު ބާތިލު ކުރުމަށް ސަރުކާރުގެ އިސްލާހީ އެޖެންޑާގައި ހިމެނިފައިވާ ކަމަށާއި ނަމަވެސް ޕީޕީއެމުން ހުށަހެޅި ބިލު އަވަސް އަރުވާލައިގެން މަޖިލީހުގައި ކުރިއަށް ގެންދާތީ އަސްލަމް ވަނީ ކަންބޮޑުވުންފާޅު ކުރައްވާފައެވެ.
"އިއްޒަތްތެރި ރައީސަށް އެނގިވަޑައިގަންނަވާނެ ސަރުކާރުގެ އިސްލާހީ އެޖެންޑާގައި ހިމެނިފައިވާ ކަމެއް، މި އިސްލާހު ގާނޫނުއަސާސީއަށް ގެނައުމަކީ. އެހެންނަމަވެސް މިއަދު އަޅުގަނޑުމެންނަށް ފެނިގެން މިދިޔައީ މިފަދަ އިސްލާހެއް މި މަޖިލީހަށް ހުށަހެޅިފަ، އެ އިސްލާހު އަނބުރާ ގެންދެވީމަ އަލުން އަނބުރާ އިއްޔެ މި އިސްލާހު ހުށަހެޅިގެން، މިއަދުން މިއަދަށް ބަހުސް ވެސް މިތާގައިކޮށް ފާަސްކުރަން އަމާޒު ހިފާފައިވާތަން. މިއީ މިކަން ކުރެވިގެންވާނެ ގޮތެއް ނޫން،" އެމްޑީޕީ ޕާލަމެންޓްރީ ގްރޫޕުގެ ލީޑަރަކަށް އަލަށް ހޮއްވެވި އަސްލަމް ވިދާޅުވިއެވެ.
ގަލޮޅު އުތުރު ދާއިރާގެ މެމްބަރު އީވާ އަބްދުﷲ ވިދާޅުވި ގޮތުގައި ގާސިމް މަޖިލިސް ކުރިއަށް ގެންދަން މަސައްކަތްޕުޅު ކުރައްވަނީ މަޖިލީހުގެ ކުރީގެ ރައީސް އަބްދުﷲ މަސީހު މުހައްމަދު މަޖިލިސް ކުރިއަށް ގެންދެވި ގޮތަށެވެ. މަޖިލީހަށް ހުށަހަޅާ ބިލެއްގެ މަރުހަލާތައް ފުރިހަމަނުކޮށް، ބަހުސެއް ކުރިއަށް ގެންދިއުމަކީ ބަލައިގަނެވޭނެ ކަމެއް ނޫން ކަމަށް ވިދާޅުވެ، އީވާ ވަނީ ގާސިމަށް ބަހުގެ ހަމަލާތަކެއް ރައްދު ކުރައްވާފައެވެ.
"ކުއްލިއަކަށް މިތަނަށް އިދިކޮޅު ޕާޓީގެ މެމްބަރުން ލައްވައި ބިލުތަކެއް ގެނެސްގެން އެއްވެސް ކަހަލަ މަޝްވަރާއެއް ނެތި ގާނޫނުއަސާސީ އިސްލާހު ކުރަންވެގެން މި މަސައްކަތް މި ކުރަނީ. މިއަދު މި އޮތް އިސްލާހަކީ ރައްޔިތުންނާ ސީދާ ގުޅުން އޮތް އިސްލާހެއް ނޫން،" އީވާ ވިދާޅުވިއެވެ.
"މިހެން ބަދަލުތައް އަންނައިރު އަޅުގަނޑުމެން ވެސް ބޭނުންވަނީ އަޅުގަނޑުމެންނާ ވެސް މަޝްވަރާ ކުރެވިގެން، ސިޔާސީ ޕާޓީތަކުގެ ތެރޭގައި މަޝްވަރާ ކުރެވިގެން ރަނގަޅު ލެޖިސްލޭޓިވް އެޖެންޑާއެއް އަޅުގަނޑުމެންގެ ކުރިމައްޗަށް އައިސްގެން ކޮންމެ ވެސް ކަހަލަ ތަރުތީބަކުން ރަނގަޅު އުސޫލަކުން ރައްޔިތުންގެ މަޖިލީހުގެ ހަގީގީ އަސްލު ގަވާއިދާ އެއްގޮތަށް ކަންކަން ކުރުން. މަސީހުގެ ގަވާއިދަށް ކަންކަން ދިއުމެއް ނޫން،" އީވާ ވިދާޅުވިއެވެ.
އަސްލަމާއި އީވާ ރައްދު ކުރެއްވި ފާޑުކިޔުންތަކާ ގުޅިގެން ރިޔާސަތުގައި އިންނެވި ގާސިމް ވިދާޅުވީ އެމަނިކުފާނު މަޖިލިސް ކުރިއަށް ގެންދަނީ މަޖިލީހުގެ ގަވާއިދާ އެއްގޮތަށް ކަމަށެވެ. އަދި މަޖިލީހަށް ހުށަހެޅިފައިވާ ހުރިހާ ބިލެއް މަޖިލީހަށް ހުށަހަޅައި ކުރިއަށް ގެންދިއުމަށް ފުރުސަތު ދެއްވާނެ ކަމަށް ގާސިމް ވިދާޅުވިއެވެ.
އުމުރުން 65 އަހަރުވުމުން ވެރިކަމަށް ކުރިމަތި ނުލެވޭގޮތަށް ޤާނޫން އަސާސީއަށް ގެނައި އިސްލާހް ބާތިލް ކުރުމަށް ރައްޔިތުންގެ މަޖިލީހަށް އެންމެ ފުރަތަމަ ހުށަހެޅީ ޕީޕީއެމްގެ ޕާލަމެންޓްރީ ގްރޫޕުގެ މެމްބަރު އިބްރާހިމް ފަލާހެވެ. އޭނާ ހުށަހެޅުއްވި ބިލު އަނބުރާ ގެންދިއުމުން، އެ ޕާޓީގެ ޕާލަމެންޓްރީ ގްރޫޕުގެ މެމްބަރު އަލީ އާރިފު ވަނީ ހަމަ އެ އިސްލާހު އަންގާރަ ދުވަހު މަޖިލީހަށް ހުށަހަޅުއްވާފައެވެ. އޭނާ އެ ބިލު ހުށަހެޅި ދުވަހު، ބިލުގެ ބަހުސް ފަށައި ގަޑިއެއްހާއިރަށް ބަހުސް ކުރިއަށް ގެންދިޔައެވެ.
