ޔުނިވަރސަލް ޗިލްޑްރަންސް ޑޭ ފާހަގަކުރުމަށް ލ. ގަމުގައި ކުޑަކުދިންގެ ހަވީރެއް ބާއްވައިފިއެވެ.
ހުކުރު ދުވަހުގެ ހަވީރު ލ. ގަމު ތުނޑީ އަވަށު ސްޓޭޑިއަމްގައި ކުރިއަށް ދިޔަ ކުޑަކުދިންގެ ހަވީރު ފައްޓައި ދީފައި ވަނީ މި ހަވީރުގައި ބައިވެރިވި ކުޑަކުދިންނެވެ. މި ހަވީރުގައި ކުޑަކުދިންގެ މެދުގައި މަޤުބޫލު ކެރެކްޓަރ އެއްކަމަށްވާ މަޝްހޫރު ރޮބޯ މޭންގެ ހަރަކާތްތަކެއް ކުރިއަށް ގެންގޮސްފައިވެއެވެ.
މީގެ އިތުރުން މިހަވީރު ގައި ކުޑަކުދިންނަށް ތަފާތު ކުޅިވަރު ހަރަކާތްތަކެއް ކުރިއަށް ގެންގޮސްފައިވެއެވެ. މި ހަވީރަށް ލ. ގަމާއި ފޮނަދޫ ގުޅިފައިވާ ސަރަޙައްދުގެ ގިނަ ޢަދަދެއްގެ ކުޑަކުދިންނާއި ބެލެނިވެރިންނާއި އާންމުން ޒިޔާރަތްކޮށްފައިވާ އިރު މި ހަވީރަށް ވަރަށް ބޮޑު ތަރުޙީބެއް ލިބިފައިވާކަމަށް ފުލުހުން ވަނީ ބުނެފައެވެ.
ޔުނިވަރސަލް ޗިލްޑްރަންސް ޑޭ ފާހަގަ ކުރުމަށް މި ނޮވެމްބަރު މަހުގެ 20ން 23ށް ލ. ގަމާއި ފޮނަދޫގައި ތަފާތު ހަރަކާތްތަކެއް ކުރިއަށް ގެންގޮސްފައިވާއިރު، މިހަރަކާތްތަކަކީ މޯލްޑިވްސް ޕޮލިސް ސަރވިސް އާއި، ޔުނިސެފް މޯލްޑިވްސް އާއި، ޖުވެނައިލް ޖަސްޓިސް ޔުނިޓާއި، މިނިސްޓްރީ އޮފް ޖެންޑަރ ފެމިލީ އެންޑް ސޯޝަލް ސަރވިސަސް އާއި، މިނިސްޓްރީ އޮފް އެޑިއުކޭޝަނާއި، މޯލްޑިވްސް ނެޝަނަލް ޑިފެންސް ފޯސްގެ ސެންޓްރަލް އޭރިޔާ އާއި ލ. އަތޮޅު ކައުންސިލް އިދާރާ އާއި ފޮނަދު އާއި ގަމުގައި ހުރި ސަރުކާރުގެ މުއައްސަސާތަކާއި އަމިއްލަ ބައެއް ފަރާތްތަކުގެ ބައިވެރިވުމާއި އެކު ކުރިއަށް ގެންދިޔަ ހަރަކާތްތަކެކެވެ.
